空姐空少 空姐 空少 航空
空姐空少 空姐 空少 航空

空姐空少 書展連環出書 分享最爆騎呢事

旅遊

廣告

香港人平均一年旅行兩三次,坐飛機已經是貼身事,所以每有 空姐空少 爆料航空界秘聞奇事,都引來很大回響。有見題目夠吸睛,今年 書展 空姐空少 出嘅新書特別多,幾本主打航空工作實況的繪本、散文都超好賣,但礙於航空公司唔畀高調唱衰乘客,不少作者都以插畫形式揞名爆,講下職場上、機場上和客艙內遇到的騎呢怪客,拗著數、求艷遇光怪陸離乜都有。於是我們找來幾位新書作者繼續戴頭盔,分享工作遇過最爆最騎呢事。

撰文:yuki|圖片:相關機構、新傳媒資料室

早前一班空姐上ViuTV《又要威又要戴頭盔》節目大爆驚嚇內幕,航空秘聞原來好受歡迎。

乘客派卡片畀空姐是性暗示?

「很多人以為做空姐空少有很多艷遇,雖然稱不上多,但總會聽過一兩單。最常見是客人同空姐傾幾句偈後派卡片,老實講,我做空少三年幾,我都目睹過幾次,而且派卡片未必係富豪,坐經濟艙嘅客都會想有一段浪漫艷遇。以為收卡片只係空姐專利?少年你太年輕了,其實我身邊不少空少朋友都收過內地土豪派的卡片,HEHE味濃。我就無咁榮幸,只試過被外籍男邀約落機飲杯酒,我當然即刻Say No啦!」

•作者:飛SUN
•出版社:SIGN HK
•簡介:唔做會計師轉做空少,以畫筆紀錄飛人生活

邊個偷晒啲廁板紙?

「前排飛上海北京,出餐前廁所經常出現人龍,塞到成條巷都係人,我望真啲,見到導遊在廁所前指揮團友:『來來來!每人拿一張!吃飯衛生一點!』到出餐時我晃然大悟,成團客心口都圍住塊紙,原來係廁板紙!同胞們真係好鬼得意!」

•作者:傭仔
•出版社:點子出版
•簡介:抵死插畫道盡航空職場上溫馨、搞笑二三事

九霄甩牙驚動爆破組

「有次飛杜拜,有位乘客發生蝦碌事,驚動全機服務員。話說他在廁所咳咳下,誤吐出假牙跌咗落馬桶。為執返棚牙,客人嘗試帶手套打撈,空姐幫手亦徒勞無功。最後要封鎖洗手間,著陸後搵工程人員『爆破』,花了半個鐘拆開馬桶,先拎返棚牙。」

•作者:國泰員工合著
•出版社:天地圖書
•簡介: 國泰官方出版的空服員、地勤文章合輯,中英對照,力sell溫情

商務艙丟空都唔會亂益人

「關於upgrade,我想講公司有晒規矩,丟空無人坐都唔會亂益人!想免費upgrade只有一個可能,就係經濟艙overbook,會優先up貴賓會員,或者衣著企理嘅乘客。我最多試過一班機up 40個客,好睇運氣,拜託唔好再問:『今日飛機滿唔滿?』」

•作者:地勤仔
•出版社:經濟日報出版社
•簡介:90後地勤仔血淚史,奇怪麻煩客一籮籮

 

延伸閱讀:

小丸子、阿愁文具超吸引!!! 2016書展 必睇8大文具精品