澳洲打工假期
澳洲打工假期

澳洲打工假期 硬食15%稅 背包客:每年要畀多成萬蚊!

旅遊

廣告

門檻低、無名額限制,澳洲一向是打工假期的首選地點。不過去年傳出澳洲政府擬狠收「背包客稅」32.5%後,即刻令一眾年輕人打退堂鼓,當地農業和旅遊界亦大力反對。經過一年討論,當局依然硬推通過議案,由下年1月1日起,改徵稅15%!

失免稅額!一年畀多成萬蚊!

新稅實施之後,單看數字徵稅15%比現有稅率19%為低,但實際暗藏魔鬼細節,所有背包客將一律被列為「非居民身份」,無端端喪失免稅額(AUD18,200),離國時無得申請退稅!

有數得計,以一般背包客平均一年收入AUD35,000為例,辛勞一年即要交多近萬二蚊港元!身在澳洲打工作期的港人都叫晒救命,大嗱嗱蝕成萬元,莫講話掘金返港,連儲錢去玩都難,擔心做完一年得個桔。

在地背包客:硬食繼續留低!

雖然筍工不再,但記者越洋訪問現正在 澳洲打工假期 已1年多做的Tungyee:「我依家月入AUD4,400,新政實施之後,全年要交多8千港幣,勁肉赤!雖然要畀多好多稅金,但呢度嘅生活模式和生活都比香港好太多,畀多少少錢都想留耐啲!」再者所有簽證、住宿都已經落實,Tungyee亦無意改到其他國家繼續工作假期,會繼續在澳洲做滿2年。

計劃2簽港人:考慮改去新西蘭!

至於另一位受訪者Lui原本打算2簽,則決定轉軚,改道鄰近的新西蘭:「我上次離開澳洲仲有得申請退稅,有得玩之餘,仲叫賺到少少錢返香港。不過見到新稅制同搶錢無分別,加上澳紙又跌,我寧願去新西蘭,只收10.5%稅,少成截!」

最新吃喝玩樂資訊