旅行青蛙
旅行青蛙

衰仔去咗邊?「旅行青蛙」大熱 講中浪子旅人心聲!

旅遊

廣告

一段時間無勁手機Game推出,點知《旅かえる》旅行青蛙竟然成功彈出,令港中台的人都瘋狂沉迷,日日夜夜等隻衰仔返屋企!作為一位旅人,呢隻無「無腳」嘅青蛙粒聲唔出就走咗去旅行,其實都幾窩中經常在旅途上嘅人嘅心聲!

text:孖田|photo:《旅かえる》遊戲截圖

旅行青蛙:唔刺激又無互動 Click中旅人心理

老老豆豆,遊戲本身無甚麼勝負之分,青蛙仲好Cool咁,粒聲唔出在家看書寫文甚至遠走高飛,忽然返咗嚟又會乖乖帶明信片同手信回家,其實無乜點同主人互動,但就憑可愛畫風同明信片變化多吸引人,台灣代表有五月天阿信、S.H.E. Selina等都有玩,香港代表就有903 DJ麻利,佢仲响電台節目教Do 姐玩旅行青蛙!遊戲玩法就唔再多講,不過中台兩岸的心理師都勁分析遊戲嘅好玩之處。唔講唔覺,用下心理分析就會發現,我哋都幾似青蛙仔㗎!

01|體驗父母心:衰仔去咗邊?

網友稱呢款遊戲做佛系養蛙,因為養青蛙就好似提早做父母咁:阿蛙仔日日喺屋企咩,你又覺得佢Hea,擔心佢掛住睇書、寫明信片搞咁耐,唔食麵包,一搞就幾個鐘;到你離開遊戲再入去,先發現佢唔聲唔聲出咗門,又唔講低幾時返,搞到人心掛掛,成日入去遊戲Check 住。心諗:衰仔都講聲喺邊,send 兩張相嚟睇吓肥咗定瘦咗吖!

嗚嗚,阿媽,我知你平時係咩心情喇!玩還玩,去關心吓父母先啦喂!

02|無腳的浪遊人心態

無錯,呢隻蛙仔根本就係無腳嘅雀仔。平時喺屋企宅蛙一名,又唔同玩家互動,走咗去旅行又唔出聲,去邊去幾耐又唔知,只係收到佢明信片,有蝴碟、老鼠仔、蟹仔做朋友咁。係咪好似嗰個裸職去南美做backpacker 、去澳洲working holiday、去法國學整餅嘅friend 子,久唔久又post 吓同新朋友仔的相呢?每個朋友圈中總有個咁嘅人,唔少浪遊人都覺得旅蛙有自己的影子呀!

03|擊中孤獨的心靈

「男孩像你也像我百萬個不止 大路名字但奇特因子」,有心理學家甚至認為,呢隻青蛙根本就係涵蓋所有城市人的心理。如果話大家養青蛙,不如話係照鏡!青蛙仔似個需要被照顧的小朋友,人人自稱青蛙係自己個囝囡,但其實就係填補情感空窗的缺口。

有指呢隻遊戲喺日本最受20-30代女性歡迎;我們都寂寞,反正養電子蛙,成本低,課金買三葉草都好平,有話題性又唔駛Check 住晒,夠方便忙碌嘅都市人。咪睇少寂寞嘅威力,英國政府早前就設立咗「孤獨大臣」嘅職位,幫助人抒解心靈空虛。我哋日忙夜忙,每日迫車返工、每晚默默返歸,長期做低頭族,又何嘗有同人交流?但望吓隻青蛙仔,又瀟瀟灑灑咁去左旅行,影咁多靚相,無負擔話走就走,想點就點,唔係你同我嘅夢想咩?

一隻青蛙仔都夠膽去浪遊,反而我哋就驚呢驚路,諗落都幾可悲,不如鼓起勇氣起行啦喂!

04|打和!人人都係贏家

同一般遊戲唔同,旅遊青蛙無輸贏之分,雖然可以課金,但有耐性一樣可收集免費三葉草,暫時亦都未有所謂嘅大結局。喺遊戲入面,沒有打大佬的目標,也沒有概定「成功、勝負」的準則。有心理分析就指,大家唔需要為成功感而執著,所謂的「牽絆感」都可以得到滿足同幸福感。呢種慢慢得返嚟嘅情感,無得同人比較,係咪更窩心先!

中國網絡傳聞青蛙出門幾日唔返,之後就見到被怪獸食咗,甚至收到俾車壓扁成蛙乾的照片;又有傳遊戲開發商指不想做個玩唔完的遊戲,意味青蛙有結局。後來都被證實係流料,好在啫,蛙蛙要出入平安呀!

05|永遠都估你唔到

旅蛙嘅另一個樂趣,在於永遠估唔到自己隻愛蛙會寄咩明信片返嚟,有無識到新朋友(老鼠、蟹、蝴碟等)。買不同食物、道具、護身符,再加埋抽獎嘅禮物,都會出現唔同嘅明信片,組合多到買六合彩咁。就算係買一樣嘅道具,你同Friend子隻蛙蛙都可能寄唔同明信片俾你。好似我哋人人都去日本,但人人都會有唔到嘅歷程同體驗,簡直係人生縮影呀,係咪好有哲理呢!

除左之前提到嘅日本景點外,蛙蛙仲會同Friend子去不知名嘅地方。例如俾蝴蝶「的」住飛、去老鼠屋企探鼠家族、同雀仔傾計等等。有咩秘景,就要睇玩家點組合道具了!一個無得控制、無概定方式嘅遊戲,就係咁捉晒大家心理大爆紅!

延伸閱讀:屯門→挪威|80後港女踏竹單車出走 踩足2萬公里浪遊世界