新西蘭 160 米深谷盪韆鞦?! 嗌爆玻璃 3大設施玩命之旅
撰文：hoilee | 攝影及圖片來源：Wyman、相關機構
嗌爆玻璃榜首！ 160 米深谷盪韆鞦？
論 新西蘭 的玩命教主， 當然是笨豬跳始祖公司AJ Hackett，但記者略嫌笨豬跳的傳統失重體驗唔夠驚喜，而且高度只屈居全球第三，去澳門跳好過！千里迢迢嚟到梗係鬥最大，離地160米的峽谷韆鞦聽落就啱數，仲有得孖公仔齊齊跳，尖叫分貝雙倍上！從皇后鎮市區乘40分鐘車程，峽谷口屬閒「車」止步，穿過搖搖曳曳的吊橋赴「刑台」，腳步突然好沉重！步入跳台，被壯觀的深谷嚇到飆馬尿之際，工作人員已用安全帶繫實我下盤，準備上吊吧！望住身邊素未謀面嘅職員，即將成為我跳崖嘅生死之交，玩過不下廿次嘅佢，睇怕感受唔到我內心嘅忐忑。「你哋想倒數定我直接撳掣？」殊不知一答「Count-down 呀呀呀！！！（回音）」就筆直急墜深谷，又話有得揀嘅，你呃人！
所謂韆鞦係用安全帶如尿布般包住兩邊盤骨，將失重一刻的束縛感減到最低，進行兩次安全檢查後就準備就緒！
等待永遠都係最漫長嘅，懸吊在半空已經唔好受，仲要輪流向3部官方攝影機Say Cheese 留倩影，你畀我死吧啦……
稍為鬆懈就嚟料，跌墜一下嗌破喉嚨，就算係經驗老到的陪玩職員都要緊閉雙眼！
笨豬跳純屬自願，韆鞦卻是將處決大權交託畀工作人員，睇下旁觀的花生友幾招積！
高手過招！
普通跳崖已經滿足唔到一班地球人，嫌向前或背向Fing未夠過癮？雙人花式變化多到你估唔到！只要你敢試，工作人員無任歡迎！呢班死侍將「笑看人生」嘅態度發揮得淋漓盡致，好值得大家學習！
面容扭曲！ 25秒生死時速
知道要出鏡，出發前左諗右度，究竟應該用咩表情跌落去？賽後檢討，呢個考量絕對係多餘，面對時速120公里嘅極速空降，相當於驅車馳騁高速公路，甚至超越陸上最快、全速奔馳的獵豹，個腦一片空白嘅我只能夠「劏豬喊驚」！頭4秒的電光火石間Free Fall 70米，由於背向峽谷，毫無心理準備之下無端端雙腳朝天，腦充血呀！墜到最低點開始鐘擺向後，離心力些微緩和，直至盪到U 形的對面高位，釋懷到失控爆笑，緊張咗成朝終於鬆一口氣啦！
死後感言
玩完感覺重生，行步路都自覺身輕如燕！第一次上吊時驚到面無血色，突如其來的跌盪嚇得我縮埋一嚿，自拍失敗！克服恐懼體會到個快感有幾正，即刻唔介意跳多次，誓要影倒為止！
Nevis Swing Queenstown
地址： Station Building, Corner of Shotover and Camp Street, Queenstown （顯示地圖）
電話：+64-（0）800-286-4958
營業時間：星期一至日7:45am-8pm
價錢：（ 單價）雙人跳每人NZD175/HK$926 （留念相片及影片需另加NZD80/HK$423）
交通： 從皇后鎮乘40分鐘穿梭巴至峽谷跳台，每日運作時間為9:20am-2:40pm。
網上報名：www.bungy.co.nz（提前一日預約）
化身泰山 一嘯怒衝790米！
留守皇后鎮市區，走唔甩搭吊車上海拔790米的山頂飽覽市景， 至於回程， 我揀用自己方法飛落山！Zipline 愈嚟愈普及，源自加拿大的Ziptrek 加入行山元素， 刺激之餘更耗體力！最長的鋼索雖然留守起源地，但最斜的生態飛索就落在新西蘭Bob’s Peak！得天獨厚嘅打卡位莫過於我身後的Lake Wakatipu 湖景，不自控地360度旋轉包保無死角，腳揈揈凌空歎景確係爽！原本只需10分鐘的纜車路程，改為自行充當「人肉吊車」Z 形瀡落山腳，變相用咗3個鐘，實不相瞞，我呢隻「無腳雀仔」都飛到虛脫！
教練指倒掛竅門在於把重心坐低，雙腿登直提高，雙手則捉實吊索最低點，記者宣告挑戰失敗！
飛翔期間滑輪會不斷陀螺式旋轉，想停定一邊看風景都有難度，睇攝影師對腳就知轉得幾頭昏腦脹喇！
堅離地！3小時飛翔消耗戰
全長950米的路程分成6段，恐怖度由淺入深，速度感雖然不及Swing，但高度足以嚇到腳仔軟！仲要鼓起勇氣跳六次， 你都咪話唔攞命！高海拔的清新空氣，加上一次又一次心跳加速的飛身，子彈般穿插綠意盎然的樹叢，舉頭巨木參天，浩瀚絕景嘅張力將畏高心情抹得一乾二淨！最尾一段斜度達40°，據說是全球最斜的吊索紀錄，時速達70公里，難怪樹林傳出哀嚎慘叫！歷程3個鐘實在長到不可思議，但成功用「空中飛人」姿態征服790米峭峰，確係令人飄飄然嘅！
死後感言
雖然路程分為初級和進階版，前者玩少一個鐘相對輕鬆，但就錯過咗湖景位同滑得最快的一段，再揀我都會一氣呵成碌落山腳！來自荷蘭的教練Inge好鬼馬，隔個路段就教新招，如倒立、Trust Fall般向後瞓等，3小時全無悶場！
連教練同行13人，每段吊索都要等齊人先繼續，尾二站更需步行20分鐘，山路頗陡峭，完成後我成身散晒！
Ziptrek Ecotour
地址：45 Camp St, Queenstown（顯示地圖）
電話：+64-（0）3-441-2102
營業時間：星期一至日 8:30am-6pm
價錢：（ 4段路線）NZD85/HK$450、（6段路線）NZD135/HK$714
交通：乘Gondola吊車至山頂，步出商場後向左走100米。
網上報名：www.ziptrek.co.nz（提前一日預約）
海嘯級肉搏！ 稱霸全球倉鼠跑
平時睇倉鼠跑滾輪好可愛，但原來換轉人類設身處地係會崩潰㗎！源起自新西蘭嘅透明大彈波，前年網上瘋傳一條參加者集體狂奔被輾的短片，立即心郁想碌埋一份！目前紐國只有距奧克蘭3小時車程的羅托魯瓦有得玩，記者仲唔乘機拜會發明呢個變態Game 嘅創辦人真身，再即席試玩全球最長軌道，滑水暴走350米！臨場仰望草坡的龐大規模，直徑3.2米嘅巨波彈住落山，透出兩個左右搖晃的鬼影，不禁想縮沙走人……可惜我不入地獄誰入，工作人員爽手注水開閘，我就開始喺裡面飛彈，洶湧水花撲面，雙眼淹水完全擘唔開，顛簸的彎路跌碰足足3分鐘，想收買人命咩！
天旋地轉實錄
隨水脫球而出的動作搞笑，專用攝影師隨時Ready 捕捉出水芙蓉！
死後感言
之前喺墾丁試玩過綁手綑腳的草地飛球，波身無咁高，但玩法更慘無人道，連新西蘭始祖都已經因安全問題取消咗！剩低嘅兩直一曲軌道，直的坡度較斜，碌得快而平穩，彎路迂迴曲折，兩人互撞似打仗，由頭濕到落腳！
上年播出的《爸爸去哪兒2 》電影都有嚟取景，多多同爸爸王磊Battle 寄宿家庭，好歡樂！
一直一彎嘅Combo價好抵玩，每人只係NZD80/HK$423，碌落嚟勁刺激，落地見暈！（Emma)
我設計嘅透明飛球風靡全球，Ogo擴充新址後離市區只係5分鐘車程，面積更空曠，山頂更可遠眺Rotorua Lake 和 Mokoia Island！（Andrew Akers）
發明人
Ogo Rotorua
地址：525 Ngongotaha Rd,Fairy Springs, Rotorua （顯示地圖）
電話：+64-（0）7-343-7676
營業時間：星期一至日9am-5pm（夏令延長營業至6pm）
價錢：（ 直＋彎Combo）每人NZD80/HK$423、（相片及影片需另加NZD50/HK$265）
交通：從市中心乘10分鐘的士，經過Skyline Roturua纜車站後即達。
網上報名：www.ogo.co.nz（即日預約亦可，網訂可享95折）
實用資料
簽證： 持特區護照或BNO者免簽證停留3個月。
查詢： 新西蘭 駐香港總領事館 2525 5044
貨幣：1紐元（NZ$）約兌HK$5.29
時差：10月至3月較香港快5小時，4月至9月快4小時
電壓：240V，三腳或兩腳斜扁插頭
旅遊局網址：www.newzealand.com
租車查詢：Hertz（www.hertz.co.nz）
機票推介！
香港直航 新西蘭 達十小時機程，推介選乘新西蘭航空Air NewZealand，每日有一班航機從香港直飛奧克蘭，5月前訂購更享周年優惠，11月旺季來回票價連稅僅HK$6,642，經奧克蘭轉飛皇后鎮亦只是HK$8,642。
如撲到快閃優惠， 上回未連稅票價HK$5,050，睇齊11月開航的香港航空，但Skycouch座位坐得更舒適，長途機無咁辛苦！查詢：新西蘭航空 2862 8988
航班編號 航線 出發時間 抵達時間
NZ0080 香港→奧克蘭 19:10 10:00
NZ0087 奧克蘭→香港 23:55 07:30
多人合租$70 Pocket Wi-Fi！
安部數碼的海外4G Pocket WiFi租用服務，最多可分享予10部智能裝置共用，每日收費HK$70，累積計每日數據流量限於500MB內，可到觀塘自取或選擇快遞。
查詢：安部數碼 2342 4566/ 9618 0207
