愛妻號陸永日日報告？ 《嘩鬼上學去之 農夫 篇》花絮獨家爆料

採訪：Alex @ A君的泡菜日誌

01| 陸永愛妻號 每日準時越洋報告

陸永結婚五周年再向太太求婚，震驚香港七百萬人，仲令佢成為「愛妻號」！去到英國，係咪一樣咁絕種好男人？監製就力證佢係「超級愛妻號」，每逢停機準備Set Up或搭車時，陸永都一定越洋報告同哄哄家中千金，仲要唔係簡單報平安，而係耐心將所有行蹤逐一報告，誇張到監製都忍唔住話：「你老婆未睇都已經知道晒所有節目內容喎！」「愛妻號」果然名不虛傳！

本身陸永堅持唔會畀愛女去外國讀書，但嘩鬼旅程完結，佢反而有全新感受：「其實香港同英國教育制度真係各有各好，不過喺外國讀書會有好多不同的經驗，就例如香港小朋友可能呢一世人都唔會爬過樹，但外國老師反而叫小朋友盡量去試，滿足好奇心，我覺得呢個教育方法真係好好！」

02| 英鎊跌都無去Shopping？因為要陪DoDo姐！

拍攝《嘩鬼上學去》正值7月頭英國宣布脫歐，英鎊插水式下滑，咁好機會佢哋有冇去掃貨呢？監製就話拍攝行程超趕，Free Time只得最尾半日，不過DoDo姐現身，兩位瞬間變跟班，當然去陪娘娘去Harrods啦，之後情況同《跟住Do姐去Shopping》一樣，農夫當然係有得睇無得買！Do姐事後叫佢哋去機場Duty-free睇，點知原來陸永想買啲品牌喺機場係無專櫃的，所以……最後係咩都買唔到！Sosad！

03| 農夫係即場爆肚？定係事前諗Gag？

節目咁好笑，監製就話其實70％係Roll機前已經傾好，所以拍攝場景其實有Set up，不過佢自己就覺得另外30％即場爆肚其實更好笑，就如試校服時，佢哋無預計嬸嬸會突然叫佢哋自我介紹，好彩C君陸永轉數快，即刻答到Andy Lau同Jackie Chan，場面好好笑！監製最多謝佢咃係有時度咗橋但唔好笑，佢哋即場爆肚都救得返，實在好厲害！

04| 惡搞老師 真發嬲！

不少網民都話第一集，農夫惡搞老師實在無大無細！唔知老師有無嬲？其實9成老師、舍監和同學仔都好鍾意佢哋，不過上堂時，拉丁文老師同美術老師對於佢哋惡搞都畀唔到反應，而且真係有啲嬲，好彩佢哋兩個識做，即刻哄返老師，而且發揮搞笑功力，場面先唔怕太尷尬！其餘時期農夫同朋友仔都相處融洽，臨走時同學仔都好唔捨得！