韓服
韓服

冒死求證5大測試!千祈唔好帶女朋友去首爾著 韓服 ?

旅遊

廣告

網絡潮文叫大家千祈唔好帶女朋友去日本著和服,其實去首爾著 韓服 亦一樣!事關除咗會被私有化做奴隸攝影師用盡每一分鐘狂影,為咗件傳說中粉紅色款更要捱更抵夜去排隊,情況仲慘過留喺香港OT,實在講出一眾男士心聲,難怪贏盡掌聲!本著「我不入地獄,誰入地獄呢」的心態,我決定親自出馬,帶住由靚女Model Yoshi扮演公主病女友(那有女……)上路,仲唔喺去景福宮齋影咁簡單,而係做晒港女去首爾如買妝物、行弘大、街邊怒食等必做潮事,究竟會唔會頂唔順黑面走人?其實蝦碌場面超多好好笑,即刻睇睇啦!

Text: A君的泡菜日誌 | Photo: Woody

女朋友, 首爾, 韓服, 弘大, one day hanbok

01 |粉紅色韓服?真係可遇不可求!

既然要挑戰,當然要玩到最盡!為咗著到港女最愛的粉紅色款,全世界早15分鐘到達 韓服 店,點知竟然開咗門,舖內仲要勁多人,人潮誇張過名牌店1折開倉!唯有快手衝入去搵搵粉紅色款,可惜已經全部租出,任務失敗!Yoshi當然即刻扁咀,好彩仲見到件粉藍色款,唯有頂住先。舖入邊只有3個更衣室,唔想等只好就地換衫,不過挷腰帶,紥胸口蝴蝶結等都非常考功夫,好彩店員肯幫幫忙!幾經辛苦終於著好 韓服 ,原來仲要面對另一個挑戰-Set頭,Yoshi自己整咗15分鐘依然披頭散髮,店員手勢亦麻麻地,膽粗粗問在場韓妹可否幫個忙,竟然一口應承,仲5分鐘搞掂,而且髮型Set得又靚又傳統,簡直喺救星!由揀衫到俾錢走人,竟然已經用咗2個鐘!講真……我開始累鳥……

女朋友, 首爾, 韓服, 弘大, one day hanbok
哇……10點開門已經勁多人,啲靚款已經被人拎晒啦!
女朋友, 首爾, 韓服, 弘大, one day hanbok
韓服有傳統的打結手法,唔識就記得搵職員幫手,千祈咪亂整個蝴蝶結呀!
女朋友, 首爾, 韓服, 弘大, one day hanbok
整頭髮絕對最麻煩,就連職員都搞唔掂,好彩夠膽叫在場韓妹幫幫手,想靚就唔好怕羞啦!
女朋友, 首爾, 韓服, 弘大, one day hanbok
又有一個男朋友中伏鳥……仲要情侶裝,祝你好運!
女朋友, 首爾, 韓服, 弘大, one day hanbok
哈哈哈哈哈哈哈!傳說中的粉紅色韓服喺屬於我的!(設計對白)

02 |搭地鐵無問題!騎呢Pose挑逗呀叔!

問過朋友仔,好多人著 韓服 都會以的士代步,難得Yoshi想體驗當地文化搭地鐵,我當然奉陪到底!以為會有好多人投以奇怪目光,點知完全無人理!其實韓國人非常習慣旅客著 韓服 周圍去,所以唔好再驚尷尬,剩係去景福宮、北村等景點,著住去弘大行街都唔怕!等車時,Yoshi本住一生人一次的機會,大膽嘗試以騎呢Pose挑逗呀叔,可惜呀叔見怪不怪,毫無反應,勁好笑!不過著住 韓服 周圍走真係唔多方便,除咗焗到成身汗,行路時要拎起裙尾,挷鞋帶要伸高隻腳,非常麻煩,Yoshi都話:「一次就夠」!

女朋友, 首爾, 韓服, 弘大, one day hanbok
以為搭地鐵會好尷尬俾人望?錯!就算擺騎呢Post都完全無人理!
女朋友, 首爾, 韓服, 弘大, one day hanbok
著韓服都記得要排隊呀!
女朋友, 首爾, 韓服, 弘大, one day hanbok
為了唔好整污糟條裙,一邊行要一邊拎起裙尾,仲要勁曬,港女都頂唔順!
女朋友, 首爾, 韓服, 弘大, one day hanbok
韓服裙擺超級長,貪靚Yoshi想影相時睇落高啲竟然挑戰高踭鞋,點知挷鞋帶要伸高隻腳,好辛苦!

03 |烈日當空個妝溶啦……入化妝店補補妝!

行左1個鐘,Yoshi突然叫停,唔通我終於可以甩難?錯!原來佢只係想補補妝後繼續影……為咗唔好辛苦公主大人,我提議去化妝品店試妝仲方便!行多兩步真係有間舖,當然入去試試成唔成功啦。入到去,韓仔化妝師立即上前招呼,睇完妝物後多口問佢著 韓服 行化妝品店喺咪好怪?韓仔話原來好普遍,仲即刻幫Yoshi化個新妝,話粉橙色胭脂同唇膏先襯粉藍色 韓服 ,事後更要求自拍合照,咁好服務,Yoshi當然失控狂買,原來哄女仔都可以好簡單……

女朋友, 首爾, 韓服, 弘大, one day hanbok
著韓服都改變唔到港女本色,一見到化妝品就失控了!不過都係,無人覺得古怪!
女朋友, 首爾, 韓服, 弘大, one day hanbok
叫韓仔化妝師幫手補妝完全無難度,仲教路粉橙唇膏先襯韓服!
女朋友, 首爾, 韓服, 弘大, one day hanbok
事後仲要合照,作為男朋友(假扮但好入戲)的我真係睇到眼冤!

04 |好肚餓!街邊粗魯食魚串!

行多陣,Yoshi又出招,話好肚餓喎……當然要滿足公主大人的要求,不過臨近食飯時間好多人,唯有食住街邊小食頂頂肚先!去到檔口,全部人立即彈開,連老闆到出嚟問問我地係咪要食,原來佢話好少人會著住 韓服 企街邊食嘢,因為怕整污糟件衫要賠錢!不過Yoshi有理無理食咗先講,仲要勁粗魯,難為我要隨時準備紙巾阻擋滴下的醬汁,場面好驚險!最後老闆又要合照,證明著韓服企街邊食嘢,實在太騎呢!

女朋友, 首爾, 韓服, 弘大, one day hanbok
肚餓就完全唔會理人目光,粗魯狂食,你睇……旁邊韓仔韓妹即刻行開呀!
女朋友, 首爾, 韓服, 弘大, one day hanbok
盡情狂食,難為我要隨時準備紙巾!
女朋友, 首爾, 韓服, 弘大, one day hanbok
老闆事後狂問我地做咩要著韓服企街邊,不能曝露身份的我唯有答:「佢真係好肚餓……」

05 | 自拍影相是常識!Oppa~可以跟我合照嗎?

既然Yoshi咁鍾意影相,我決定打大佬,帶佢去弘大影!吓?咁簡單?錯!喺去弘大捉Oppa齊齊影!去到其實有啲怯,因為韓國仔仔牛高馬大,如果佢出拳,我唯有毫不反抗以肉體照單全收……幸好Yoshi美色搭救,Oppa回頭率高企,上前話想合照更0.1秒應承,就連正經軍人Oppa都唔放過,非常誇張!影完相問兩句,佢地都話好少見女仔會著住 韓服 行弘大,不過佢地都覺得女仔著 韓服 時特別吸引,難怪合照無難度啦!企得越耐,情況開始失控,竟然有Oppa上前抄牌,可見Yoshi魅力驚人,所以奉獻各位男朋友,唔想Honey被韓仔評頭品足,就真係「千祈唔好帶女朋友去首爾著韓服」啦!

女朋友, 首爾, 韓服, 弘大, one day hanbok
Yoshi:「估唔到好容易同韓仔Oppa合照!」
女朋友, 首爾, 韓服, 弘大, one day hanbok
大隻KyungMuk :「好少女仔會著韓服行弘大,所以覺得好特別,路過見到一定會望望!」
女朋友, 首爾, 韓服, 弘大, one day hanbok
軍人SungYu :「萬歲!韓服係韓國男人心目中能夠突顯女人溫柔的感覺。」
女朋友, 首爾, 韓服, 弘大, one day hanbok
型男DongChan : 「好多朋友仔著韓服都會去三清洞、北村等傳統地方,喺弘大街頭先到真係好特別!」
女朋友, 首爾, 韓服, 弘大, one day hanbok
鬆弛熊都主動話要合照!

記者點評 |咪再去老套景點

「其實同女朋友去首爾著韓服就真係預咗辛苦,不過與其去傳統景點齋影,寧願直接著去行街,測試證明無人會笑你,所以唔洗怕尷尬!一次過KO著韓服+Shopping兩大行程,之後咪可以叫女朋友陪你行波鞋舖囉!」

 

One Day Hanbok

地址:서울특별시 중구 퇴계로 213 일흥빌딩 3층 303호 (首爾市中區退溪路213 3樓303室)

電話:+82-(0)70-4202-4310

營業時間:10am-8pm

收費:₩13,000 / HK$90(4小時)、₩26,000 / HK$180(24小時)

網址:www.onedayhanbok.com

交通:乘地鐵 3號線忠武路站8號出口步行約5分鐘