全球最大 Hello Kitty 樂園 首度插旗中國 【浙江】

Kitty姐一向動作多多，今次輪到中國獲寵幸興建 Hello Kitty 主題樂園。本以為又是山寨貨，但原來名正言順獲 Sanrio 授權，並於今月正式在浙江省安吉縣開幕。貫徹土豪式的花費，樂園以20億人民幣興建，佔地1.6平方公里，面積同香港迪士尼差不多，但已是全球最大的 Hello Kitty 樂園。6個主題園區，除 Kitty 外，仲有 Melody、Keroppi、XO、Monkichi 馬騮仔等朋友幫手「 把關 」，每區更有主題餐廳等大家食 Kitty 落肚。至於90% 國外進口的玩樂設施不外乎都係旋轉木馬、 BB 級過山車等，不過 Fans 入場旨在睇公仔影相，相信不會影響心情。離場前記得要掃貨，事關9間商店，有近二千幾件產品，其中70% 為園區限量版和進口貨，好難得！要提係香港出發要先飛到杭州，再轉3程巴士，路程相當轉折，除非係 Hardcore 粉絲，建議都係近近地去返日本算啦！