明洞酒店
明洞酒店

真係去邊都唔方便! 超中伏 住 明洞酒店 5大罪狀

旅遊

廣告

去首爾,揀酒店最緊要就腳,咁先可以日行夜行瘋狂掃貨!明洞區一直是不少人的心水選擇,因為係市中心,酒店多而且附近又有得行街。不過如果問問住過在 明洞酒店 的朋友仔,都會答你:「下不為例」,而網上的首爾Blogger及韓國專家,都好少會推薦大家住明洞,而我作為韓國線記者都絕對唔建議,因為住過一次就知中晒伏!今日同大家講真話,力數住明洞的5大罪狀,除非你好想去的景點就在明洞附近,如果唔係?揀其他區的酒店吧!

記者: A君的泡菜日誌

01| 難搭車!去邊都唔方便!

講真!好多人都以為明洞係市中心,所以去其他地方都好方便!完全錯誤!雖然首爾地鐵四通八達,但由明洞出發,去弘大、新村、梨大、安國、江南、狎鷗亭、光化門等熱門景點,全部都一定要轉車!要知道首爾搭地鐵轉車要出閘入閘好複雜,地鐵線路圖又密密麻麻,轉錯車出事率極高,所以第一次去首爾的朋友仔,住明洞真係不是一個好選擇!反而推介要住在地鐵2號線沿線,因為去弘大、梨大、新村、合井、東大門、往十里、江邊(漢江)、江南等,搭地鐵2號線就去去,超方便!

02| 嘈到爆!酒店真係勁多人!

試過旅行旺季去首爾朝7晚10做嘢,夜晚11點先拖住疲累的身軀返明洞酒店,一踏入酒店門口就知出事,因為真係好多人,全部強國大叔大媽係大堂鬼殺咁嘈,排隊(誤?)爭入𨋢上房,最終等咗成30分鐘……諗住返到房無事?錯!旁邊房大媽用丹田吹水吹足幾個足,上層大叔又不停叫囂,最後擾攘到3、4點先開始安靜,我表示超無奈!最慘係……大叔大媽兵團醒早6點又出發,超高聲浪勁過鬧鐘!所以去旅行想舒舒服服休息,旅行旺季時千祈咪揀明洞!

03| 絕對不是行街首選地點

揀得住明洞,好多人都係因為貪方便,諗住一落酒店就可以行街!但事實係……去過明洞就知絕對唔係行街的好地方!雖然妝物店林立,但款式唔特別,行街時又逼勁多人,最後行一陣已想放棄!女仔都仲可以去買妝物,男仔就真係只可行Aland、8 Seconds、ABC-MART等,選擇超級少,最後行1、2個鐘已經想轉去弘大、梨大等地方,已經肯定永不回頭!所以點解要為一個只會行一陣的地方,而住喺果度呢?

04| 最嬲!成日俾人當係強國子民!

哇!呢樣真係終極難頂!因為你在明洞任何舖頭,都一定會被當成強國人!雖然大家都明白店員講普通話係想方便溝通,但當你用唔鹹唔淡的普通話或英文回應時,佢地一察覺係係香港人,就一定會黑面+是但招呼+睇唔起你+覺得你阻住做生意,寧願去招呼會爆買的真。強國人,咁嘅服務態度實在令人嬲到爆!其實明洞多數係連鎖服飾或美妝店,其他地區都一定搵到,為何要留在明洞受氣?而酒店員工亦會當你是強國人招呼,眼藐藐令人難受!我發誓,從此不會住明洞!

05| 突然發現,好少便利店!

大家去明洞時,有無注意到一件事,就係明洞區好少便利店!平時一條街總有一兩間GS25、CU、7Eleven,在明洞竟然會神秘消失,行兩三條街都唔見有!可能因為被大財團收購成商場、服飾店及美妝店,便利店真係買少見少,當然唔係間間酒店都係咁,但便利店出現率絕對係偏低!所以住明洞夜晚想食雪條食宵夜,落到街要靠Google Map,行成幾分鐘先搵到便利店,實在唔多方便囉!