記者教路!搭 長途機 7件必備法寶

作為旅遊記者,每月最少都要飛一轉,平均每3個月就要搭 長途機 。不過,唔少行家聽到「 長途機 」三個字,往往期待又怕受傷害!係,可以逃離香港的確好正,但閒閒哋搭十幾個鐘飛機都咪話唔辛苦!如果出差前幾日唔夠瞓(其實每次都唔夠瞓)、抵抗力奇差之時,在滿佈細菌的機艙更加慘情!身經百戰的我,每次 搭長途機 都會準備7件法寶,有的更問過家庭醫生意見,希望大家都用得著呢!

text: [email protected]阿妹今晚去旅行

01 | 暖水壺

唔少空姐朋友都叮囑我盡量少飲機艙熱水,涷水如非樽裝水都可免則免,皆因機上食水缸細菌超標時有發生!搭長途機唔飲水,咪玩啦!空姐朋友教我自備暖水壺,於入閘後到飲水用區斟熱水,上機就唔怕冇水飲啦!

02 | 充氣頸枕

當我見過無數個缺德乘客將機上枕頭當地墊用(鞋都唔除),便深深明白自備枕頭的重要性。眾所周知,棉花頸枕最舒服,質地最似枕頭,只可惜每次出差行裝爆多,拖板、幾十個充電器已經令行李廂不勝負荷,為咗慳位,充氣頸枕才是我杯茶呢!

 

03 | 蒸氣眼罩

由於工作關係導致睡眠不足,每次上機唔夠15分鐘就會自動瞓著,可惜世事不如人意,曾試過被空服的Duty free出場亮燈照醒,自此我便明白眼罩的重要性,蒸氣香薰眼罩除可熱敷,亦會散發清香氣味,敷完個人都relax啲,熱敷後還可作普通眼罩用,實用到爆。

04 | 壓力襪

大部分長期站立或坐office的人士都會受靜脈曲張問題困擾,令小腿肌肉繃緊或腫脹,我明!我真係明!尤其 搭長途機 ,落機一刻真係坐不堪言,因此一對壓力襪必不可少!壓力襪有分襪褲及兩節式選擇,前者塑型更全面,後者易著易除兼冇咁焗腳,視乎閣下所需。

05 | 護膚品

機艙冷氣超級涷,環境乾旱令一眾擁有敏感肌膏的女生都相當頭痕,以我為例,塊面會經常起一撻撻紅腫粒粒;受濕疹影響的雙手喪甩皮;嘴唇爆擦唔在講!因此搭長途機,一定要帶最最最滋潤的護膚品!此外,我會帶定包防曬sample,皆因萬呎高空的紫外線極高,女士唔想出斑千祈唔好偷懶!

06 | 口罩及平安藥

天生鼻敏感的我,一搭飛機,鼻水多到嚇壞人。遇著抵抗力麻麻的話,全盛時期仲打過過百個乞嚏!後來問家庭醫生,他提議鼻敏感人士可帶備口罩,阻隔髒空氣之餘,更可令鼻前空氣暖和,呢招萬試萬靈!市面上亦有售賣保濕口罩,不過本人認為普通口罩都夠用!假若開始作病,頭痛藥及維他命C都要帶定傍身,最後我發現,每次就算自己唔需要,身邊都總有行家啱用,SOSAD!

07 | 帽及髮尾油

去得旅行都會想selfie呃like,奈何機艙的超強靜電令姐髮型盡毀!因此上機我會習慣帶頂冷帽,盡量令髮型唔好走樣!不過顧得個頭時,髮尾又會小飛飛,「撩」到塊面鬼咁痕,因此我個化妝袋總會帶定枝迷你版髮尾油呢!

 

最新吃喝玩樂資訊