「日牛」8折火鍋優惠+放題延長至120分鐘!

踏入一月,天氣急轉下降,下星期仲趺穿九度,呢個時侯只係想:打・邊・爐!約埋成班朋友圍住個爐「恰吓恰吓」,咁至係「冬天的浪漫」!講吓講吓,記者就忍唔住即刻做吓Research 睇吓book邊間好。成班朋友打邊爐又要好食、又要抵食仲要又要夠食,搞手們,你懂的。而滿足以上種種願望,火鍋放題店確係不二之選。而記者就發現日牛涮涮鍋(日牛)近期推出嘅限時優惠幾吸引,大家除咗預約訂座除咗有全單8折優惠之外,仲可以加鐘,由原本嘅個半鐘加碼到兩個鐘,同班朋友又可以吹多陣水啦!不過,大家留意返只有銅鑼灣同新蒲崗Mikiki分店先有,限時去到2月29號。另外,亦只有銅鑼灣分店有延長放題優惠,大家記住咪去錯分店拎優惠呀!

講完優惠,就睇吓餐牌有咩食先!

 

晚餐時段:

晚餐時段肉類級別較多,有共四個級別,由澳洲穀飼牛到黑毛和牛均可選擇。

以最平嘅「日牛」套餐計算,每位成人原價連加一($148+10%服務費)就盛惠$162.8,八折後連加一就即$130.2,性價比高。

午餐時段:

午市可選擇單碟套餐+自助區放題或者全放題套餐,對於食肉獸嚟講,緊係全放題套餐抵啲啦!而午市餐套餐亦只有一個級別嘅肉類可供選擇。

以「日牛」套餐計算,每位成人原價連加一($98+10%服務費)就盛惠$107.8,八折後連加一即$86.4,同樣價錢比晚餐平咗40蚊有多,喺銅鑼灣區或新蒲崗區返工嘅朋友仔,可以考慮吓放飯時間去挑戰喎!

自助區放題

除咗牛肉、豬肉任叫之外,「日牛」亦推供咗唔同嘅蔬菜做配料,亦有少量麵食同米飯供選擇,唔駛怕大食嘅朋友仔唔夠飽。

而「日牛」最近仲推出咗兩款「期間限定 北海道祭」新湯底,連以上餐牌都未有㗎!

粟米清湯底

粟米湯做湯底確係新配搭,呢個湯應該好快就要「加湯」,極愛栗米嘅記者應該會不自覺地一路打邊爐一路飲個湯底……

辛味豬骨湯底

辣味豬湯非新鮮事,不過佢本身得一個辣味湯底嚟計,新增嘅呢個豬骨湯底就畀愛辣嘅朋友仔多個選擇。

優惠歸優惠,好食最緊要!記者即刻巡查Instgram,睇吓唔同網民對「日牛」嘅食評。

食物質素不俗但種類少

以唔同分店唔同網店都對「日牛」嘅火鍋同食物質素偏向正面,但就覺得配料種類少咗啲同埋排隊時間略長。所以,記者建議大家預約訂座,咁就可以避免walk-in等位有排等啦!

午市放題最抵食

以最平嘅「日牛」套餐嚟計,午市平咗一截,唔少網民都覺得抵食。

網民推「日牛」乳酪為必食之物

唔少網友都激讚「日牛」嘅任食乳酪,更有網友話「識食日牛一定係食乳酪」,可見深受網民歡迎!由於「日牛」提供配料畀食客隨意配搭嘅關係,唔少網民就發揮佢哋嘅創意,整得有咁靚得咁靚,唔講以為喺出面嘅Froyo (Frozen Yogurt)專門店賣。

日牛涮涮鍋專門店(限定優惠分店)

銅鑼灣店
地址: 銅鑼灣霎東街33號3樓A舖 (銅鑼灣Holiday Inn Express 3樓)(顯示地圖
電話:3586 1964
營業時間:星期一至四,12:00 pm-11:00pm;星期五至日,11:30 am-11:00pm

新蒲崗店

地址: 新蒲崗Mikiki 111舖 (顯示地圖
電話:3579 4770
營業時間:星期一至四,12:00 pm-11:00pm;星期五至日,11:30 am-11:00pm

延伸閱讀:

限定一星期!吉野家2小時火鍋任食任飲 |西環食乜好|

【自助餐放蛇起底組】任食2.5小時 $138火鍋+ 蒸汽火鍋 放題

最新吃喝玩樂資訊