大阪隱密壽喜燒~激抵$70蠔鍋!【大阪】

去大阪旅行,最重要當然係周圍搵好野食,但識搵一定係去幫襯地道小店。すき焼・鍋物 なべや,係一間「一人一鍋」壽喜燒店,環境裝潢雖然地道,但食物質素同價錢係非常吸引!主打抵食夾大件,受到日本人熱捧,平時座無虛席,本地人仲多過遊客,咁受日本人歡迎證明確實好味。包你下次去大阪,一定會安排呢間小店落行程。

唔好講咁多,先睇下呢個每枱都點嘅蠔鍋~

一望落去個味噌蠔鍋,鋪滿哂大大隻蠔,數數下起碼有10隻以上,而價錢係 ¥1,100 ,大概係約$70港元,真係非常非常抵食呀!除咗店家採用來自三重縣志摩市嘅蠔,鍋入面仲有豆腐、娃娃菜、洋蔥等配料,而湯底係用小店特調味噌醬汁,一邊滾下滾下,湯底精華都充滿蠔嘅鮮甜味,娃娃菜同豆腐都入哂味,小店嘅味道真係喺第二度食唔到呀~~~如果唔太喜歡蠔嘅,都可以點牛肉湯鍋試下。

仲有另一個招牌鍋~牛肉鐵鍋(¥830,約$53港元)。牛肉鐵鍋連同一隻生雞蛋,同一碗熱騰騰嘅特調壽喜燒醬汁一齊送上。同樣地,鐵鍋面都係鋪滿和牛里肌肉片,食法係先將熱騰騰嘅醬汁淋落鍋入面,再撈下所有材料,將牛肉片、洋蔥、豆芽等等配料都沾上醬汁,撈撈下見到牛肉熟咗,就可以任由自己喜歡,蘸生蛋汁食啦~

加上,推介¥500(約$32港元)嘅香煎和牛,而且兩款鍋都好大份,如果仲覺得未夠滿足,就可以配個白飯或者烏冬,味道十分之夾~大家仲要留意番,每位客人都需要點飲品,茶、汽水、燒酒、啤酒,任君選擇,一口熱騰騰鍋物,一口凍冰冰飲品,真係爽!而且小店服務一流,老闆娘不時招呼客人,幫大家翻一翻火鍋,所以唔需要擔心見到咁大個鍋如何入手。

最後,有唔少人都話因為小店入面唔夠通風,所以食完都會有一陣火鍋味係身,建議大家夜晚先去食,食完就番酒店沖涼休息。如果唔係,成日去玩都會嗅到身上有陣火鍋味~!雖然位置唔係旅遊熱點入面,但跟住地圖導航都好容易搵得到~而且去旅行果陣搵路覓食,果餐飯更加好味、更有意義!

すき焼・鍋物 なべや
地址:大阪府大阪市西成區天下茶屋北 2-6-5(顯示地圖
營業時間:14:00 - 21:00 (Last Order:20:30;逢星期三休息)
電話:06-6632-5716(可訂位)
前往方法:
1. 今池駅是最近的地鐵站,可從今池駅步行3分鐘。
2. 安排下午行程前往天王寺動物園及通天閣等附近景點,遊覽完畢再由動物園前駅步行大約12分鐘。
延伸閱讀:
狐猴埋身同你玩!大阪新場 Expocity 2大必遊點(上集) 【大阪】
【 大阪旅遊 】6間不能錯過的甜品店

最新吃喝玩樂資訊