瑞士露營
瑞士露營

願意同你露營度蜜月的女人,一定娶得過!

旅遊

廣告

旅行度蜜月,一世人一次喎,老婆實係話要求豪一次去歐洲、馬代住靚酒店,再唔係,退而求其次最起碼都近近哋去日本溫泉或者蘇梅resort做皇帝皇后啦。不過最近聽到我的攝影師朋友Francis So話,剛剛帶咗老婆去瑞士 露營 度蜜月……

撰文:港女講旅行|攝影:Francis So

結婚同行山一樣,都係呃呃氹氹、互相遷就。

聽到老友帶老婆去 瑞士露營 度蜜月,我當堂嚇一跳,然後得啖笑。我都係行多兩步就會攰嘅一名港女,深明女人出門有幾咁多嘢要準備,出街熱啲要用芭蕉扇,入冷氣房見凍又要披肩,老友你居然夠膽死叫老婆Angel同你揹住十幾公斤的背嚢行山露營,仲要畀晒啲位你擺攝影器材?!
雖然瑞士絕景好靚好靚,但行足咁多日,拎住行李上山落山,咩仙景都睇厭啦,唔怕行行下鬧大交咩?點知平日Cool 爆的老友突然露出搏打的甜笑,「可以遇到個一齊癲的女人,願意一齊分擔旅途上的重量,一定要好好珍惜。佢一定娶得過!」

887-tfranso-2
Francis So 以星空及日出縮時拍攝短片成名,曾推出攝影集《我所看見的美麗香港》。
887-tfranso-1
被靚爆星空包圍入睡,老婆大人應該收貨。

去過一次瑞士是會上癮的,成日心思思想再出發。

我老友Francis亦不例外,同老婆傾蜜月行程的時候,膽粗粗提出:「不如去瑞士啦,上次我影唔到金三角,好失望,蜜月野營影日出……得唔得啊?」原本以為要花好多口水,點知老婆二話不說就答應。
雖則口爽爽,但是考慮到在接近3千米山上野營溫差大,一到夜晚又大風又乾燥;對港女來講,沖涼又是另一個大問題;最惡頂的是每人揹住十幾公斤上山,拖喼拖死,孭背囊孭死,女友脾氣差少少都隨時觸及臨界點,小則黑面大則鬧交,最驚爆句:「最多咪離婚!」

887-tfranso-5
朝早起身營外看見雪山,攰少少都抵啦!
887-tfranso-7
揹住成身裝備,仲唔介意等埋老公捕一張靚相,阿嫂真係好唔話得。

打牌行山見真章。

為咗令老婆留下浪漫回憶,同時兼滿足自己拍攝私心,死佬Francis 怯住咁準備今次另類蜜月旅行,揀最簡單又睇到最靚風景的行山路徑同野營地點,最後決定在五湖健行徑、巴哈阿爾普湖(Bachalpsee)落腳,每日步行不超過個半鐘,沿途可以睇住靚爆雪山同湖景。不過女人仔拎住咁重裝備,又點會無怨言?
阿嫂Angel 不時忍唔住問:「到未啊?」、「仲有幾耐呀?」呢個時候,做老公就要醒目,絕對唔可以太誠實:「見到啦,嗰度就係!」、「好快到!」(其實仲有好遠)。去個旅行,全程要睇實老婆大人面色做人, 老友話其實苦中有甜。佢自己咪一樣有灰鳩的時候,Angel 反而調轉頭鼓勵返老公:「唔緊要啦,唔係好辛苦啫!」常言道:「打牌行山見真章。」最攰的時候最難掩真性情、壞脾氣,搵到個咁體貼嘅老婆,老友你真係幾生修到啦!

887-tfranso-4
體力關係行山行程每日不超過3小時,行下影下相好快過。
887-tfranso-6
最愛在湖畔野營,以湖心做構圖影相靚好多。

每個攝影師背後,都有個耐性十足的女人。

或者你會話,見到以上的靚景,用肉眼睇都已經好明信片一樣靚,極愛打卡的港女實興奮到暈,再辛苦都唔緊要啦。少年你太年輕了,遇著攝影發燒友如Francis,見到靚景必定大師上身,影極都唔滿意試完又試,仲要影time lapse 實有排影,兼夾阿嫂Angel 係激罕有、唔太鍾意影相嘅港女,可以點做?
Francis 又借啲意盛讚老婆係個超有耐性嘅賢妻,當佢一路行下影下又拍下time lapse,阿嫂從無埋怨,安坐一邊做望夫石,有時反而仲幫個衰公影勁chok 嘅行山相;Francis 都識做,等老婆瞓咗先慢慢影星軌、日出,行山行到每日瞓得唔夠6個鐘,佢都自覺瘋狂,但阿嫂更加唔話得囉!

睇返Francis 呢輯蜜月旅行相,我發覺佢兩個嘅合照無乜幾多張,反而明信片一樣嘅靚相就大把,畀外家知道咁樣虐待剛嫁出去嘅女唔怕咩?跟團或者住resort 歎下咪仲舒服?Francis 忽然情聖上身拋低一句:「可以同老婆一齊在絕景下留倩影,老咗一定唔會後悔。」計我話:

有個能互相支持、互相遷就跟你行山野營嘅老婆,老友,你執到啦!

887-tfranso-5
逼完老婆做模特兒,仲要佢兼做埋攝影師,set好腳架、相機,老婆就負責按快門,幫自己影返張到此一遊相。
887-tfranso-8
有個攝影狂熱的老公,背後又怎可以沒有一個耐性爆棚的老婆呢!

男士們,學嘢啦!

話說回頭,Angel 同Francis 嘅Honeymoon 又點只野營嘅3日,佢哋花咗20日遊覽維也納同瑞士,在瑞士分別Zermatt 和Grindelwald 共野營了3天,行程唔太chur,中間仲有住靚酒店同玩阿爾卑斯山滑梯等等遊客嘢,氹下老婆無得投訴啦!

瑞士露營蜜月路線
DAY1 由小鎮Zermatt乘火車至Rotenboden,再行20分鐘至Riffelsee湖野營
DAY2 健行1.5小時至Riffelberg乘火車站回Zermatt補給,再坐纜車上Blauherd步行25分鐘至Stellisee湖野營

DAY3 (相隔4日)由小鎮Grindelwald乘登山纜車至First,沿Eiger Ultra Trail健行約1個半小時至Bachalpsee湖野營

留意:
瑞士7至9月的天氣最適合野營; 瑞士並無法例禁止野營,不過部分地方如國家公園、野生動物保護區、森林、河谷等除外,所以出發前記住check清楚。

franso-24
連續野營咗兩晚,特登入住4千蚊一晚的山 頂靚酒店3100 Kulmhotel甜蜜一下。
887-tfranso-9
在皮拉圖斯兩人也有一試世界最長的阿爾卑斯滑梯,仲要二人同瀡勁癡纏。
32
Riffelsee湖野營最大目的當然看馬特洪峰的日出,一圓Francis影金三角嘅心願。