一秒飛東南亞！Coco Fish青衣＋東涌新店登場！坐復古油桶枱歎泰式火山骨、Coco Fish 招牌船麵＋魔鬼糯米飯！

一踏入餐廳，第一時間就會被佢哋嘅裝修吸引！Coco Fish將復古東南亞街頭風格同現代工業風融合得恰到好處，最吸睛嘅必定係特色油桶枱櫈，配埋周圍充滿活力嘅綠色植物，交織出極之輕鬆自在嘅用餐氛圍。坐喺油桶枱前食嘢，感覺好似一秒飛咗去泰國夜市一樣，南洋度假感滿滿，打卡影相一流！

極巨級泰式酸辣火山骨拯救全家食慾

踏入9月天氣仲係又熱又焗，搞到成日冇乜胃口？呢個時候最啱食酸酸辣辣嘅泰國菜醒吓胃！Coco Fish準備咗多款人氣菜式，由火山骨、船麵到打拋豬肉飯都有，啱晒鍾意濃味嘅朋友。

一上枱已經相當有氣勢嘅泰式火山骨！豬骨充分吸收醬汁嘅酸香同微辣滋味，再灑上大量蔥花同芫荽提鮮解膩，未食已經聞到陣陣檸檬同香茅嘅酸香。豬骨煮得軟腍入味，加上份量十足，無論肉食控定係大班朋友一齊食都非常適合。

鍾意惹味小食嘅話，就可以試埋酥炸迷你河蝦。餐廳選用細隻河蝦連殼炸香，外層食落卜卜脆，再配埋炸香嘅九層塔葉同紅辣椒圈，微辣之中帶住草本香氣，愈食愈開胃，做餐前小食就啱晒。

麵食方面就有Coco Fish招牌船麵，以自家熬製嘅濃郁湯底做主角，配料亦相當豐富，有生牛肉片同脆炸豬皮。炸豬皮吸盡濃湯精華，一啖麵一啖湯夠晒惹味，鍾意泰式濃味嘅朋友記得要試。

想食飯嘅話，泰式打拋豬肉爆邊蛋飯就更加邪惡！打拋豬肉碎充滿辣椒同魚露香氣，食落香辣惹味，再配埋煎到邊位金黃香脆嘅爆邊蛋。香辣肉碎、蛋香同白飯撈埋一齊食，啖啖惹味，絕對係白飯殺手！

鹹魚牛油封門牛柳夠破格！仲有12小時濃湯豬骨飯暖胃

除咗大家熟悉嘅越泰滋味，Coco Fish亦加入唔少新鮮配搭，將南洋風味同西餐元素放埋一齊，食落更有驚喜。

當中最特別一定要數封門牛柳配鹹魚牛油及香脆薯條。封門牛柳煎至外焦內嫩，再配上鹹魚牛油，鹹魚嘅鹹香加上牛油香氣，令牛柳食落更加惹味，旁邊仲有金黃香脆薯條，南洋風味撞上西式配搭，個組合夠晒新鮮。

如果想食得暖胃治癒，就可以試12小時熬製濃湯豬骨飯。豬骨足足熬製12小時，令湯頭呈乳白色，飲落濃厚又有肉香。豬骨亦煮到軟腍易離骨，再配埋白蘿蔔、洋蔥同蔥花，一啖熱湯落肚，即刻暖晒個胃。

鍾意越南風味嘅朋友，河內雞肉法包都唔可以錯過。香脆法包夾住雞肉、蘿蔔絲同芫荽，食落清爽唔膩，蘿蔔嘅酸甜味配上煎香雞肉，味道互相襯托，啖啖都有越南法包嘅滋味。

想食得輕盈啲，就可以揀泰式豬頸肉沙律。香烤豬頸肉焦香十足，帶少許油脂之餘亦有咬口，再配新鮮沙律菜同酸爽開胃醬汁，肉香配上清新蔬菜，食落醒胃又冇咁滯。

打卡新熱點！呃Like必備越式溶岩咖啡配魔鬼糯米飯作結

食完一輪主菜，當然要留肚試埋甜品同特飲。Coco Fish連飯後環節都有唔少打卡位，尤其魔鬼糯米飯同越式溶岩咖啡，賣相已經夠晒吸睛。

甜品首推邪惡感十足嘅魔鬼糯米飯！軟熟糯米飯上鋪住新鮮芒果同醇厚奶蓋，再灑上一層可可粉。清甜芒果撞上綿密奶蓋，再加埋可可粉嘅苦甜香氣，層次豐富，甜品控記得要預留個胃。

特飲方面，Coco Fish亦準備咗三款南洋風特飲，凡嗌套餐只需加$14即可加配，用嚟配搭一餐濃味越泰菜就最啱。

當中最吸睛一定係越式溶岩咖啡。飲品以濃縮咖啡做底，再將咖啡打成綿密濃厚嘅咖啡泡泡，覆蓋喺香甜幼滑嘅咖啡牛奶上，層次分明之餘賣相亦好有特色，味道甜而不膩，咖啡控可以一試。

想飲得清爽啲，就有鮮薄荷青檸特飲，以新鮮薄荷葉同青檸汁做主打，薄荷嘅清涼香氣配上青檸天然酸味，飲落酸爽醒神。另一款香茅菠蘿特飲就將菠蘿果香同香茅獨有嘅草本香氣放埋一齊，酸甜清香，尤其適合配搭濃味菜式，食完飲返啖夠晒解膩。

由復古油桶枱、南洋風裝修，到泰式火山骨、封門牛柳配鹹魚牛油同一系列甜品特飲，Coco Fish由環境到菜式都有唔少打卡位。今個周末想搵個新地方食越泰菜，不妨約埋家人朋友入青衣試吓啦！

餐廳資料

Coco Fish青衣店
地址：青衣青富苑青富商場地下G01號舖
營業時間：星期一至五 11:30至21:30；星期六日及公眾假期 11:00至21:30
電話：28917800

Coco Fish東涌店
地址：東涌翔東邨翔東潮薈9號舖
營業時間：07:00至21:30
電話：37493351

IG page: https://www.instagram.com/cocofish_hongkong/

（資料由客戶提供）