LEGO Store攻略|水行貨比拼+必換限定品|

Aug 23 2016

旺角的 LEGO Store上星期（18/8）開幕首日已經排晒大隊，大批 LEGO 粉為三大鎮店之寶，VW甲蟲車、波子GT3及大笨鐘而來，搶手程度瘋狂，勁到甲蟲車已斷貨！不過放心，店方表示甲蟲車即將返貨。產品如此搶手，唔想等行貨的，當然還有買水貨呢個選擇，記者已親身幫大家去 LEGO 水貨聖地油麻地現時點格價，發現某些水貨仲平過行貨！不過咁，於專門店買LEGO又可以換購限定產品喎，即刻睇攻略啦！

採訪：Keith 拍攝：Wing、網上圖片

三大新品水行火拼

LEGO迷以往要追最快新品多數要食炒價，專門店勝在款齊價穩，同佢差一個地鐵站的油麻地現時點則「你有你賣行貨，我有我客路」，價格無畀專門店嚇跌太多，即刻睇睇兩地分別。

1.斷貨VW甲蟲車

超級搶手，行貨$999，LEGO店暫時無貨，店方話會補貨但時間未知；而現時點水貨則仍充足，售$950-$1,020，記者當日就見有人抱住成盒走超滿足。

2.波子911 GT3

波子911 GT3未開售前大家已經引頸以待，LEGO專門店為香港首次發貨的行貨店，所以引來唔少粉絲同炒家追捧，但由於身價唔平，官方價為$3,299，所以仍然貨源充足，而現時點星期日（21/8）的水貨價則介乎$3,200-3,380，所以大家不妨行多兩步去格下水貨鋪。

3.大笨鐘

倫敦地標大笨鐘塔仍然有貨，行貨價$2,399，而現時點則售$2,250-$2,480。

9月新品準備掃貨！

而未來最令LEGO迷期待的必定是迪士尼城堡及Series 16 minifigures系列，兩者均會於9月全球同步發售，迪士尼城堡售價將於這星期內公佈，網上有傳售價為 $349 美金，折合約港幣$2,700，而minifigures以往水貨售約$27-$32/隻。應該又有不少粉絲要捱炒價或排餐死了，不過咁，早買早享受嘛！