抽卡啦!!壽司郎聯乘排球少年!! 角色打卡位/同日向一齊食壽司!
廣告
最近成個Threads都比壽司郎同排球少年洗版，排球少年嘅Fans係咪好期待呢！終於比大家等到啦～排球少年嚟到香港壽司郎！今日係聯乘活動嘅第一日，就等記者帶大家去睇下啦！
一入門口就見到有角色立牌打卡位等緊你，隔離等候入座嘅區域都有一列角色陪你等位～堅有suprise！嘩！第一日就已經有好多人排隊喇～行入鋪頭，成間鋪頭都係排球少年嘅蹤影，Fans一定開心到爆～
吧枱有卡通款角色，超kawaii～每個卡位都有自己嘅角色，要睇下有冇咁好彩坐到大家鍾意嘅角色啦！今日記者有得同日向一齊食壽司～大家最關注嘅一定係聯乘商品，今次推出咗鮮蝦牛油果海苔包，會送角色插牌。士多啤梨雲石白朱古力慕絲蛋糕就會送鑰匙扣～一套有成16款！
重頭戲係搖搖脆薯條，配埋蒜香忌廉味搖搖粉，食落有啲honey butter嘅感覺～重點係有得抽卡！！！有限定透卡同雙面收藏卡～透卡今日就已經有，雙面卡就5月12日開始供應～大家ready瘋狂食薯條抽卡未！（細細聲同你講，透卡係香港特別款，想要就快！
另外仲有香港限定周邊，有襟章、散紙包、運動毛巾、斜孭袋等等。記者私心覺得散紙包好特別好靚，仲好實用啊，Fans必收！依家參加打卡錦標賽仲有機會獲得排球少年限定壽司碟～大家快啲去壽司郎搵排球少年啦！
壽司郎 x《排球少年!!》主題店 @sushiro.hk
日期：2025年4月28日至5月31日
地址：九龍尖沙咀加連威老道2-6號愛賓商業大廈地下G2, G3 & 103號舖、銅鑼灣駱克道463-483號銅鑼灣廣場2期3樓3A號舖、新界荃灣蕙荃路22-66綠楊坊2樓S20-23號舖
在 Instagram 查看這則貼文新假期 Weekend Weekly（@weekendweekly）分享的貼文
圖片來源：新假期編輯部資料或影片來源：「新假期官方IG」
