唯一戶外 Crazy Cart 賽車場! 直落元朗掃$30↓美食|周末遊懶人包|

忙碌完一星期,是時候計劃周末去邊玩!今次記者Katie帶大家去元朗玩美國人氣飄移車 Crazy Cart!雖然佢車仔細細,不過配合埋15,000呎,仲要全港唯一戶外玩Crazy Cart嘅賽車場,踩行油門衝出去,超爽的!做完車神,再同大家直落元朗掃食4間新開食店,當中,有食新奇M&M’s雞蛋仔,仲有人氣炸髀店登陸元朗。事不宜遲,即刻帶大家頭搖又尾擺,元朗飄移之旅!

行程:Crazy Cart賽車-元朗掃街:雪糕雞蛋仔/人氣炸雞髀/M&M’s雞蛋仔/$28糧尾便當

第一站:15,000呎!全港唯一戶外 Crazy Cart 賽車場!

關於美國人氣Crazy Cart,香港早有場地可以玩到。不過,今次可以在一個有成四個籃球場咁大嘅戶外賽車場玩Crazy Cart,踩油門的力度都可以大啲放啲,Crazy Cart 最快時速可以去到27公里,而且賽道有十多個彎位,用來飄移超爽的!如果想再加速,於賽道彎位,拉起飄移桿,後輪可以做到360度自由轉動,非常有速度感!

試玩報告:

速度感:★★★★★

Crazy Cart速度感真的好足夠,輕輕踏上油門都已經開得好快。而今次喺我第二次玩,比上次較為懂得控制車速。於直路踩大力啲向前衝,超爽的!

操作簡易程度:★★★☆☆

整體來說都容易控制,因為在沒有剎車制的情況下,你只會有腳踏和軚盤可以控制部車移動。如果對自己有要求,想揸快啲,就要練多幾次。

飄移簡易程度:★★☆☆☆

初學者的我來說,飄移有難度。在彎位都有嘗試過拉起飄移桿,不過就好容易變360度自轉,有點難做到飄移。參考現場比較熟練的師傅,如果想做到飄移,可以在入彎前,先微微將軚盤扭向你要轉的方向,然後拉起飄移桿,再將軚盤向相反方向扭,就比較易做到飄移效果。

抵玩度:★★★

$70/10分鐘,其實玩一個圈大約一至兩分鐘,當你衝了大概3個圈,都已經開始攰,所以玩10分鐘我認為都好夠。以$70這價錢都好合理,你返大陸玩高卡車都差不多呢啲價錢。而且可以一次最多可以十個人落場,成班朋友一齊玩,都玩得幾開心。

Mr. Car 車先生 Crazy Cart 收費詳情:
星期一至五:$70/10mins;$180/30mins
星期六、日及公眾假期:$80/10mins;$200/30mins
包場:
星期一至五:1pm-6pm:$2,200/1 hour;6pm-10pm:$2,400/1 hour
星期六、日及公眾假期:暫時不提供包場服務
詳情留意官方網站

Mr. Car 車先生
地址:元朗十八鄉路馬田村旁邊(翹翠峰對面)(顯示地圖
電話:6702 6821

第二站:冰火二重!雪糕 x 鬆軟雞蛋仔

到元朗覓食,可以先上網,看看元朗谷友們有無好推介。最近見谷友們都有介紹這間新開的雪糕雞蛋仔小店。店名與店主的外號一樣,叫做舅父哥,感覺好親切。店內雞蛋仔都由舅父哥自家製作,蛋漿用上十多隻雞蛋,再加奶製作,蛋味香濃之餘,弄出來的雞蛋仔質地相對地軟身,會較為像蛋糕。夏天想吃點消暑小食,可以加埋雪糕,一口雪糕再加一口雞蛋仔,絕對是街頭上必吃小食!

1. 雪糕雞蛋仔

雞蛋仔口味有原味和朱古力味,全由舅父哥自家製作,蛋味香濃,質地相對地軟身。雪糕口味有9款,朱古力、曲奇、士多啤梨、芒果、豆腐、番石榴、綠茶、3.6牛奶和榴槤。

2. 媽媽愛心中式糖水

另一款舅父哥非常推介的,是舅父哥媽媽親手煲的中式糖水。暫時店內有3款口味,陳皮蓮子紅豆沙、雞蛋白果薏米腐竹糖水和陳皮海帶綠豆沙。

舅父哥
地址:元朗鳳攸東街9號好順意大廈15號舖(顯示地圖
營業時間:星期一至日:7am-10:30pm(試業期)
電話:5545 6445

第三站:人氣炸髀店登陸!超酥脆生炸雞髀

大埔太和橋邊寂寂無名的宵夜小店,後來憑著一隻生炸雞髀賣到街知巷聞。今個月於元朗開分店,同樣最受歡迎的都是炸髀。雞髀以吉列炸法製成,粉漿夠薄,雞皮炸得非常酥脆,咬下有沙沙聲的脆口感覺,而且雞肉嫩滑Juicy,配埋自家製辣粉更美味!

三多炸肶
地址:元朗又新街40-48號榮豐大廈地下E號舖(顯示地圖
營業時間:星期一至四:3pm-1am;星期五:3pm-2am;星期六、日和公眾假期:2pm-2am(新開張期)

第四站:新奇Mix & Match!M&M’s芝士雞蛋仔

坊間雞蛋仔口味都大同小異,原味、朱古力、抹茶等都已經試過了。而這間位於又新街的雞蛋仔店,實行大玩雞蛋仔Mix and Match,單是雞蛋仔餡料都已經有9款可由食客們自由選兩款做配搭,亦有4款雞蛋仔口味選擇,讓大眾製作出獨特口味雞蛋仔。

餡料口味包括朱古力(+$3)、芝士(+$5)、紅豆蓉(+$5)、栗子(+$5)、M&M’s(+$5)、OREO(+$3)、蜂蜜(+$3)、黑芝麻(+$3)和紫薯(+$3)。而雞蛋仔本身有原味($18)、朱古力($20)、咖啡($20)和綠茶味($20)。

1.M&M’s芝士雞蛋仔

雞蛋仔餡料並非一次過將兩種食材混合再放上雞蛋模,而是將其分開兩邊製作,所以是不會出現又鹹又甜的情況。見到谷友們比較有趣的配搭是M&M’s朱古力豆配芝士,朱古力豆的脆口感,令原本軟綿綿的雞蛋仔有點口感上的層次。而芝士味有微微鹹香,不過主要都是吃芝士帶點煙韌的口感。

2. 綠茶蜂蜜OREO雞蛋仔

蜂蜜配綠茶這組合最正路,其實想配紅豆蓉,不過在剛開業期未推出,所以想食紅豆蓉的朋友要留意住他們的最新動向。綠茶配OREO,帶點甘香的綠茶配上微甜而脆口的朱古力碎,都幾好味。

森 Sumore
地址:元朗又新街38號恆富大廈地下11c號舖顯示地圖
營業時間:星期一至日:1pm-9:30pm
電話:5502 0802

第五站:糧尾恩物!全店便當一律$28

普通茶餐廳吃個碟頭飯都要三十蚊或以上,不過在元朗區想食平啲啲好容易,事關這裡好多小店都是做街坊生意,價錢親民。這間新開不到一個月的外賣便當店,全店飯盒一律$28,非常適合學生,或者長期糧尾的朋友幫襯。

食28
地址:元朗福康街10號A舖地下(顯示地圖
營業時間:星期一至日:11am-9pm
電話:2748 6881

想知更多吃喝玩樂資訊,快啲Like Katietong Facebook啦!


最新吃喝玩樂資訊