毛孩突然唔show你？隨時係健康警號！7大寵物反常行為中一樣都要小心！

Jun 17 2026

「返到屋企，平時衝過嚟搖尾嘅囝囝囡囡，今日竟然匿埋？」真係時候關心下呢位屋企人！香港人將寵物當做屋企人已經係大趨勢，隨住大家觀念改變，愈嚟愈多港人選擇唔生小朋友改養毛孩，寵物一早就由以前看門口嘅動物，晉升為家庭核心成員。

香港貓狗數量突破40萬

根據《行政長官2025年施政報告》統計，香港人飼養嘅貓狗數量已經突破40萬隻！據業內統計，本地寵物產業規模更衝破100億元，每隻寵物平均每月消費超過$2,000。當主人們都將毛孩當正屋企人咁寵愛，日常起居同飲食都追求最好，咁主子嘅健康同安全保障，自然亦係大家最應該關心嘅大事。

熟習寵物7大反常行為確保萬無一失

想將主子嘅健康照顧得妥貼，平時一定要摸熟佢哋嘅脾性。當察覺毛孩反應唔似平時，或者出現反常行為，千祈唔好以為主子只係扭計發脾氣。佢哋唔識得用言語表達痛苦，所以當身體唔舒服嗰陣，往往會透過日常行為轉變嚟向你發出求救訊號。以下7大寵物反常行為，如果發現愛寵中咗其中一樣，各位家長一定要提高警覺，有需要就盡快求醫！

1.食慾下降出現挑食：平時最鍾意嘅零食突然唔食，可能代表口腔發炎、牙痛或者腸胃唔舒服。

2. 吠叫次數變得頻繁：吠叫或者哀鳴聲比平時多，其實係佢哋表達緊身體痛楚、焦慮或者身體唔適服嘅直接方式

3. 異常安靜或自己匿埋：平時好黐人但突然變得冷淡，仲自己匿喺梳化底或者角落，呢個唔係佢唔show你，而係代表緊佢哋正處於虛弱或者痛苦之中

4. 眼神空洞及呆滯：如果發現主子雙眼無神呆滯，甚至對你嘅呼喚無反應，可能係精神狀態欠佳或者神經系統出現問題。

5. 過度舔身體同咬物品：不停狂舔手腳可能係皮膚敏感，亦有機會係壓力大或者關節痛嘅表現。

6.四處亂屙尿同大便：以往好守規矩但突然隨地大小便？呢個可能係尿道炎、膀胱結石，或者係年老退化嘅特徵，千祈唔好一味淨係鬧。

7. 步速變慢兼走姿異常：起身嗰陣好吃力、拐下拐下咁行，或者步伐明顯變慢，好大機會係關節炎或者肌肉拉傷。