長洲
長洲

入秋去Glamping!長洲住印第安營、圓拱屋睇星星│園內一日遊 玩樹頂走廊、飛索

生活

廣告

去 長洲 玩不再是輕鬆事,每逢周末總是擠滿人,小島也變旺角。想真正享受小島風情,惟有過一晚夜避開人潮。長洲過夜首選度假屋,可是近年租金暴升,周末至少要$700一晚,而環境較好的B&B,更是無$1,000也無法「落樓」,真心肉赤。不過七月開始 長洲 住宿有新選擇,既然秋風起,不如在新開的「西園」營地Glamping(豪華露營)。園內提供營地設施,更有歷奇活動如樹頂走廊及野外平衡車, 又可餵羊仔親親大自然。

撰文:Keith |拍攝:Scott、Keith

半世紀莊園翻新 變隱世歷奇營地

不說不知, 長洲有一個佔地40萬呎的新營地,內有大草地及樹林,位置卻十分隱世,不是 長洲 人也不知其存在。其實西園營地前身是由香港某船廠家族擁有,用作私人花園及度假的大型莊園,空置近三十年後,最近發展為歷奇及Glamping 營地。

記者在 長洲 土生土長,細細個都聽過下,但最近訪尋老街坊,才知道西園已有近六十年歷史。在 長洲 住了60多年的郭太表示:「西園以前係養豬種生果的農場,場主會請 長洲 人打理。」而西園更曾借出場地給 長洲 公立小學作秋季旅行,在長洲住了50年的陳生就入過去野餐:「帶點麵包、糖就跟學校入去,有個草地好大㗎。」

西園翻新後設營地住宿及玩樂設施, 兩手揈揈就可以去Glamping,亦有不少歷奇活動。夜晚可躺在草地看星空,日頭在園內玩樂,即使是長洲熟客,再入來玩都唔會悶。

一個票價多款活動任玩 西園全票每日限量20套

西園內每款活動都要逐一購票,如果樣樣都想玩,就可以考慮買全票(成人$780、小童$480),就可以不限次數任玩當天的活動,包括樹頂走廊、泡泡足球、沿繩垂降體驗、越野平衡車等等重點活動!不過全票不包括製作叫化雞,餵飼動物,擊鼓活動及巨人梯。由於每天只售20套,大家可透過熱線及電郵預訂,免得到現場才撲空。

主打活動樹頂走廊好好玩,估唔到 長洲 都可玩飛索。 $250/人(全程約20分鐘)

長洲 玩飛索 行迷你樹頂走廊

咁到底在西園內有咩好玩?樹頂走廊Canopy Walk 在香港不常見,皆因要有排列整齊、而且有一定樹齡的樹,夠大夠硬淨才可在樹冠層連上吊索、繩網等等。而西園就有多棵數十年大樹,大家可以體驗在樹間遊走的感覺。

樹頂走廊分六關,每關由繩網及吊木等連接,離地約5米,都幾考膽量,全程靠自己,教練不會傍實你行,只會在樹下指導。每踏一步都有種吊吊揈的離地感,很不踏實,但當由一棵樹去到另一棵時,那種成功感不言而喻。完成整個體驗約20分鐘,最後一關才是重頭戲,由8米高大樹飛索到60米外的「對岸」,速度比想像中快,但邊飛邊看著大草地,真心爽。

追加其他5種好玩活動

除了必玩的樹頂走廊,大家亦可試玩野外平衡車,可在林中上坡落斜。另外樹林攻防箭亦是必玩之作。除了刺激的玩意,小朋友亦可餵羊仔及玩遙控模型船,一家大細都滿足。

01 越野平衡車

02 泡泡足球

03 樹林攻防箭

04 非洲鼓及舞蹈表演

05 餵羊仔

兩手揈揈 去露營

又是土地問題,學游蕙禎話齋,香港人何止無地方扑嘢,就連入長洲度假也要捱貴租。記者住長洲廿年,見證由四五百一夜加到大節日近千元,而且一房難求。一家大細入到來,就不要跟年輕人爭房了,始終春宵一夜值「千蚊」。

既然已入秋,住方面不如試試在長洲Glamping,這種豪華版露營,除了衣物梳洗要自帶外,營具一概由場方提供,營都唔使你搭,但又可體驗露營樂趣,最適合同小朋友住,在戶外過一晚,公主王子病即時消失。西園共有五種營帳,暫時提供印第安營、 南非營及圓拱屋,即刻睇睇入面如何。

西園農莊
地點:長洲西灣 DD CC Lot 12, 西園農莊(題示地圖)
入場費:成人$160 、小童$88(每日限量特惠體驗門票$48,售完即止。)
查詢:2981 1010
Facebook:西園特色露營歷奇樂園

地膽帶你 食飽肚又高質早午晚餐

入得長洲掃街,預咗唔飽,不如跟我長洲地膽吃盡高質又飽的早午晚餐。西園現未提供餐飲服務,幸好附近也有不少好嘢食。如果深夜口痕,更可踩單車出碼頭吃車仔宵夜檔,開至凌晨兩點,但就比較遠,要注意。

早-行兩步吃 All Day Breakfast

兩位店主是島外人,月前在西灣一間民居地下開café,裝飾走簡約風。食物方面,可一試咖啡,由本地炒豆師烘焙,並有曲奇香的咖啡豆,很特別,亦有All day breakfast,適合在西園睡醒走下來,吃個清新早餐。

Heima Heima
地址:長洲贊端路25號A地下
電話:6078 3417
營業時間:星期二至三、五至日12:30pm-6pm 、星期四2-6pm(星期一休息)

午- 90後長洲仔 芒果煎糯米飯

青流由三個長洲仔專程到曼谷街頭學藝歸來開店。想吃甜可一試芒果煎糯米飯,想飽肚可試手撕海南雞飯。青流店面雖小,但設計玩味十足,枱凳是舊油桶改成,是島上少有的個性小店。

青流
地址:長洲金銀灣金豪閣10號地下
營業時間:12:30pm-7pm,逢星期三休息
查詢:5440 0449

晚- 看海聽浪吃 手製pizza

Peter 是一個住在長洲的外國人,在長洲開店賣手製pizza,即叫即整。店子位於天后廟海旁, 可以坐在露天位置,看海聽浪吃手製pizza。記者最喜歡吃Green Monster 薄餅,其自家製羅勒醬很清新。

彼得意大利薄餅
地址:長洲大興堤路19號地下
營業時間:星期二至五12nn-3pm、5pm-10pm;星期六日 12nn-10pm
查詢:9864 9197

延伸閱讀:180度維港海景!紅磡隱世萬呎公共空間! 民間組織力尋公共免費好去處