【銅鑼灣】親民缸瓦佬 鬧市上位

開業十多年的缸瓦佬，以親民價位陶瓷餐具立足，向來以短期租約形式於舖租較平的地段出沒，足跡遍布旺角、灣仔、九龍城、荃灣等地，近月竟然成功打入銅鑼灣旺區！上下兩層合共二千呎的地舖，是歷來最大的一間，散貨場的格局在名店之中零舍突出，幾蚊起的價錢，令人行過都要停一停睇一睇。新店貨品種類最齊全，除熱賣的甜品餐具、日式碗碟，新貨還有歐陸風茶具、景德鎮出品的骨瓷杯、花瓶擺設等，老闆更講明唔會坐地起價，租約期暫時到7月底，想知其他散貨地點就要留意facebook！