被選中的寶貝藍孩@呢啲嘢啊

餐館地址鄰近銅鑼灣，座落商業大廈樓層，旺中帶靜。出梯進內，館內餘些少虛席，令人於鬧鬧悶市間能鬆弛，喘口氣；裝潢高雅，具特色設計風格，更有配合名字之二次創作尿尿小童（Manneken Pis）像。

寶貝藍孩，實名小男孩 “Baby Blue”，最出名藍貝（即藍青口），出街食同自己都係白酒煮，今次定要試試唔同食法！點了二人晚間套餐，已經非常夠食，很滿足。

鮮菌湯與沙律

不過不失，但質感有點不尋常的黏口，似是加了過多麵粉或生粉造成。菇味足，而且加了忌廉作點綴。

沙律細份，菜算鮮，有足夠芝士。但煙肉粒是買現成的，生菜還是不要切太細好些。

頭盤：蕃茄洋蔥煮藍貝

套餐內的藍青口（mussels）備有多種煮法供選擇，作為頭盤，我們選了香草蕃茄作醒胃，而且這間是意大利菜餐廳，蕃茄別具意大利風味。海鮮要鮮，才能煮出出色的菜饌。此店的藍貝真的非同凡響（雖然有臭掉了幾隻），用大鐵鍋，原汁原味；早兩秒還在爐上煮著，轉眼間就整盤端來上菜。蕃茄洋蔥出哂名配咩都好食，尤其最簡單的食材，例如：意大利粉。

「半透明嘅onion加上開胃嘅tomato sauce，配搭藍青口，又無蓋過佢本身獨特鮮味，帶出少少salty既咸香，非常好食，marvellous啊babe~~~」（為配合題目與餐廳名稱而作狀打出的花輪同學口吻）唯悔剛剛吃過的包沒留下作點汁用……

主菜：墨魚墨汁意大利飯

「好多網友recommend黑鼆鼆risotto，我就覺得呢道菜funny多過tasty，可以好似細個個陣扮有tooth decay咁囉。」—與食黑芝麻糊有異曲同工之妙。

味道略咸，墨魚被搶味。

主菜：香草焗羊架配薯菜

太好羊，但太焦，香草本身的味也被焦味蓋了。「Oh！No…我想要Break & Burn，唔係Baked & Burnt啊！」

甜品：心太軟與Tiramisu

心太軟不流心，Tiramisu太實。賣相尚可，香氣欠奉，味道一般。

餐茶：冷熱檸茶
普通，但值得一讚的是凍版檸檬是角切架在杯口，精美點而且不會篤完卡在底部，有好有唔好，還算細心加分位。

餐廳服務水準不錯，沒有與花輪同學管家不相上下之功力，但有萬分勤力與熱心，值得一提；令到「成件事」提升不少，氣氛適宜慶祝戀人日子之用。

「Baby Blue，專食藍貝嘅餐廳，啲mussels真係very nice，反而其他嘢食只係so so咋…只靠一樣食物未必留得住客人啊～Babe，希望下次嚟試埋個海鮮拼盤個時，唔會好disappointed啦！」

（花輪mode完結）

小男孩 Baby Blue Cafe & Bar

銅鑼灣駱克道382號莊士企業大廈3樓 2882 8770