粉嶺 壁畫村 ！彩虹桌與花兒路 |周末遊懶人包|
撰文：Terry | 攝影：Terry、新假期攝影組
粉嶺壁畫村 ！彩虹桌與花兒路
位於新界東北，粉嶺坪輋村，為對抗新界東北發展，兩年前找來世界各地的義工來創作，壁畫主要在村內其中一氣步道，google map上已有清晰標記可找，一路上有小徑已充滿卡通、花兒和其他色彩班爛的小塗鴉，沿小路行5分鐘左右，到達最大型的壁畫區，義工將其中一家的外牆和中庭的桌子地下，以四季做主題而成的整個壁畫作品，有鮮花、太陽，亦有落葉和星空，建議大家在幾何圖形的彩虹桌上拍照，正好可盡得全景，好靚呀！
乘52k小巴在村口九記士多落車，往前行便見到面前的小鳥大塗鴉。
再行前不久左邊便見到導賞中心的標記和畫作，再落前行一分鐘便到壁畫村入口。
坪輋原來也有龍貓巴士站！
還有Minion的呀Bob和「膠登」。
除了壁畫，東北的本地農業、東北的大自然氣息，本身已是個好風光。
粉嶺坪輋壁畫村（顯示地圖）
交通：粉嶺港鐵站C出口轉乘52K小巴
影完相，再醫五臟廟，後入粉嶺聯和墟掃食，這邊餐廳有種特性，就是開門開得早，閂門亦閂得早，很多連晚市都唔做，不過勝在價錢夠平，大大份，未食先興奮！
茶記發現 I ❤U蛋包飯+蛋包一丁
這間茶記，九成九跟一般茶記無異，但在蛋包X方面，卻玩花臣。像這款蛋包飯，四四方方似西多，最爆是上面仲用茄汁寫住I❤❤U，如此造型，真係未食先飽。除了包飯，阿廚仲想到，蛋，其實可以包丁喎！蛋內的出前一丁，加了少少芝士、粟米和蟹柳撈，面頭還有比翼雙飛造型的炸蝦，味道都唔錯。想食就早啲啦，人家6點就收舖嫁！
蛋內包著甜豉油炒過的飯，加上吞拿魚碎、菠蘿和少量芝士，食落唔會淡茂茂，食晒成個絕對無問題~
蛋皮包著出前一丁，好有創意！入面的芝士撈丁有紫菜、粟米和蟹柳，外加兩件日式炸蝦，非常豐富，蘸茄汁及沙律醬來吃，樣雖然頹，但其實幾好味～！
庭軒一敘
地址:粉嶺聯和墟和豐街52號合豐樓地下(顯示地圖)
電話:2669 8757
營業時間:6:30am-6pm
乜都炸！通心粉壽司都油炸
聯和墟開至凌晨的外賣小食店，自創多款炸物，壽司炸、通心粉炸，芝士乜乜乜都拎去炸。雖則好邪惡，但真係停唔到口！唔怪得咁多人排隊買！
雲津美食
地址:粉嶺聯和墟和隆街34號地舖(顯示地圖)
電話:6295 1195
營業時間:3pm-2am
鮮榨泰國椰汁 任加寒天爆珠QQ條
椰汁外賣小店，以肉厚味濃的泰國椰子即叫即榨，只落少少糖，由於沒加罐頭椰漿，質地較稀，但味道天然，很有椰香！最特別是好似台茶咁可加寒天水晶、爆爆珠、椰果、蘆薈、QQ條等。
鮮榨椰汁(凍)連兩款配料 $19 椰汁味道香濃，可自由配搭多款台式配料，寒天水晶和芒果椰果，星星造型好得意！老闆加上椰絲，飲落更添口感。
椰汁(熱)連兩款配料$21 熱飲要等耐啲，因要把椰子汁打至起泡，甜度適中，配上黑糖味QQ條及胚芽，非常爽口。
