率先睇！白色 聖誕市集 ︳親手整小禮物+歎節慶美食
廣告
甫踏入11月，唔少商場都轉上聖誕裝，上星期連尖東的聖誕燈飾都已經亮燈，同朋友、情人歡度聖誕固然開心，不過諗起要挑選聖誕禮物就頭痕。想為最愛挑選一份特別的聖誕禮物，可於未來兩個星期，分別在灣仔星街及太古坊糖廠街舉行的白色 聖誕市集 慢慢揀！如果想有心思啲，更可以參加場內的工作坊，親手為家人、朋友同情人做份小禮物。市集內仲有多款美食，好似火雞腸熱狗等，開心為聖誕做足準備！
撰文：Jumbo │拍攝：Tony、相關機構
$100有找 即場教你整小禮物
這個白色 聖誕市集 已經是第4年舉行，今年以「Homemade Happiness」為主題，可以買聖誕裝飾等等外，最注目的是有超過5個workshop可以即場報名參加，$100都唔使就攞埋成品返屋企！當中包括手繪木製聖誕裝飾品、製作水晶球、炮製糖果雪人裝飾等，想參加就要留意工作坊時間表，去報名啦！
掃埋禮物加聖誕裝飾！
除了DIY班，懶人們都可以於市集即場買好物。這裡有來自北美的聖誕家品裝飾、英國製造的聖誕糖果得，亦有手作珠寶飾物及護膚用品等。除了可當作禮物，亦可買回家作裝飾，增添節日氣氛。
$40節慶美食晒冷！ 雪球大戰+Live music超好氣氛
市集另一賣點就係有得玩又有得食，場內超過10間美食攤位提供限定的節慶食品，如火雞腸熱狗、自家製曲奇餅及薑味意大利雪糕雞蛋仔等，全都是$40/份，需先買代購票，再換取食物。另外有歐洲傳統的聖誕熱飲-暖紅酒，凍凍地行市集，行完有聖誕節慶美食，正呀！
在紅酒中加入大量糖及玉桂、八角等香料，然後煲滾，凍凍地飲暖入心。
重火雞味，不過味道偏鹹，配酸酸甜的醬料食，配搭得易。
有薑味曲奇、糖霜餅及朱古力餅等5款。
即場組隊玩雪戰 扮出走過節
雖然香港無雪落，不過在糖廠街就設立全港首個戶外擲雪球場地，可以即場組隊玩雪戰。每人付款$30即可玩10分鐘，2人為一組。另有多個本地及外國團體現場作音樂表現，即場感受濃濃的節慶氣氛，真係好似去咗外地過聖誕！
太古坊糖廠街的市集的雪球場上玩雪戰，2人一組，同場兩隊比賽玩10分鐘。
