機舖
機舖

將要成為回憶的 機舖 @ 藍橘子

生活

廣告

回想起16 歲生日當日,我同一班朋友踏入旺角1間大型 機舖 (現時百老滙位置),威風凜凜咁俾張身分證守門口個阿姐睇,佢同我講咗句「生日快樂」。

「機舖」對於我嚟講,係個成長嘅證明。當中亦曾經有過唔少珍貴回憶,仲記得第1次怕怕醜醜擺低1蚊「跟機」,仲有「讓round」呢類機舖獨有嘅文化。

但而家香港仲有冇人會去機舖呢?
定係落機舖已經變成1種老餅先會去嘅地方?

大家對於 機舖 嘅回憶係點?

我印象中機舖最繁盛嘅時期,係因為有唔同類型嘅音樂games,由最初捽碟機開始,慢慢發展到有結他、打鼓、彈琴……

佢最吸引嘅地方,係可以唔同樂器連線玩同一首歌。就算唔識玩音樂,只要夠眼明手快,有打拍子嘅技巧(發現有人天生冇拍子,演唱會拍手打拍子永遠拍錯),就可以同班朋友夾band。

再加上,好多歌都真係好好聽,有時經過機舖,聽到播緊自己鍾意嘅歌,又會手痕想玩番鋪。

 

機舖適合任何類型嘅人去消遣,呢邊頭文字D、灣岸、高達、拳皇……都係男子漢嘅戰場。
另一邊,拍拍機、篤篤機、孖寶賽車啱晒同女仔玩。每個1蚊銀,都俾到你唔同嘅娛樂同享受。

1個集多種娛樂於一身,消費又唔高嘅地方,點解會喺香港沒落?
我從來唔覺得機舖係被手機遊戲取代,因為機舖嘅現場氣氛係手機無法取代。加上日本其實機舖仲非常流行,所以亦唔關潮流事。

 

而所有問題,都係土地問題……
幾蚊雞1鋪機,閒閒哋玩幾分鐘,每日要幾多錢先夠交租?
於是乎,機舖由乜遊戲都有,變到得番高達格鬥賽馬機,直到而家,機舖只係得番一堆玩捕魚達人嘅師奶阿叔。

大家千祈唔好睇小呢隻遊戲,好多師奶仲勤力過返工,每朝早機舖未開門就喺外面排定隊。捕魚達人真係咁好玩?其實遊戲只係射個網出去捉魚,條魚游得唔快,個網仲非常大。

而佢令師奶們着迷嘅係,佢可以靠捕魚嚟賺錢。如果你捕到1條珍貴嘅魚就會出一堆金幣俾你,而呢堆金幣係可以換真錢。曾經聽過1個師奶,捕魚捕到爭人幾十萬(現金)。

 

點解可以玩得咁誇張?因為每發射1下,唔係1蚊咁簡單。
如果你要用高級魚網高機率捉到魚,每撳1下就要100蚊。

你幻想下,如果你玩拍拍機,每撳1下要俾1舊水,幾十萬其實唔需要10分鐘。

想當年阿媽成日話落機舖會學壞,原來連幾十歲嘅師奶,一樣都會壞。

 

喺一班00後嘅年輕人眼中,機舖只係過時、老餅先會去嘅地方。
你講「擺低1蚊跟機」,佢哋可能已經唔知你講乜。
香港地少人多,乜都要縮水,乜都講求高回報,時租漫畫店、網吧、機舖……香港迫到連娛樂嘅地方都慢慢絕跡。
相信再過多10年,機舖呢樣嘢,只會喺去旅行時,先有機會見得到。