老爺車 @ 梁栢堅

呢個法國牌子喺香港唔算好Hit，但估唔到原來六十年代已經香港紥根，更估唔到，佢係針對女性市場，你睇下近廿年，邊有車係咁Sell? – 梁栢堅

佢個賣點都幾神奇，話架車用油少， 年中慳埋， 可以夠買皮草同遊埠，六十年代香港，有幾多女人可以負擔得起? 有嘅，當年啲貪污華探長、大毒梟啲女人囉，大家對六十年代嘅認識，大概係咁。

睇返以前啲廣告，其中一樣我最鍾意就係字體，當年未有電腦，個「看」字係要徒手勾出嚟，少少粗糙但又好有味道。

今時今日，你要喺市區影到架低飛嘅飛機已經成為絕響（咁你要P圖我都吹你唔脹），小朋友可能唔
知，當年搭飛機返香港，識坐一定坐窗口位，你係可以望到入九龍城街坊屋企，隨時仲要沖緊涼都唔出奇。

上網搵返架車RENAULT 10嘅片同相，原來真身幾靚仔，錶板內籠都幾骨子，外國仲有人放緊。

– 梁栢堅