派對必備,你用過未?2014 「六」大好用影相app

生活

廣告

無論係聖誕新年喜慶日子,定係出外旅遊,點少得影相留念呢個步驟?尤其是呢期開聖誕Party,無番一兩個有型又有趣嘅手機影相app,點樣識新朋友呢!由風景相到selfie,甚至去到拍片,其實都有唔同嘅app可以相對應。運用得宜,一個唔小心分分鐘拍出大師級作品!

以下就為大家介紹幾個分別屬於Android同IOS嘅好用影相app,希望大家去旅遊可以影到靚相!

Android:

Camera51

去旅行,有啲景象過咗就影唔返。但影極都好似唔多靚咁?除咗光暗對比等技術問題,有無諗過係構圖問題呢?
Camera51最特別嘅功能,就係會偵測畫面入邊嘅主體、背景等,之後軟件會分析,作出簡單嘅構圖,指示你應該喺邊個位影先靚。
從此,就唔怕同一個景同一部機都影得唔夠人靚囉!

 

Phonto

影完相後加Caption已經唔係新鮮事,想要玩味更重嘅更加可以喺張相上面加!
不過一般嘅執相app可以揀嘅字型實用太少,有時真係唔係幾啱用……
Phonto就係為咗解決呢個問題而生!內存多種字型及顏色可揀,選擇多,而且非常易用,啱哂怕麻煩嘅你!
不過就仲未支援中文字型。

 

Camera FV-5

作為一個用開無反或者單反嘅用家,有時無帶相機出街但又想影相,唯有用住手機先。
但係手機個相機好多嘢都無得set,搞到影唔出自己想要嘅效果。針對呢個問題,用Camera FV-5就可以順利解決。
Camera FV-5俾你自己調較快門、白平衡、曝光補償等等設定,令熟習手動設定嘅你就算用手機影相都可以得心應手!


延伸閱讀:港鐵堅尼地城站通車!搶先推介5大特色餐廳!
下頁續

IOS:

FFrame

相嘅嘢,有時唔係一張就夠嘅!好多時想表達故事式、比較式又或者漸進式嘅圖像時,就可能需要將幾張相合併為一張。
FFrame提供多款分割方式,鍾意點排都得!
更甚者,如果你同我一樣係懶人,最多一次過可以揀選25張相,交俾FFrame,佢就會自動幫你排到適合嘅框框啦!
合併完,仲可以加唔同effect、貼sticker落去,玩味甚重!

 

Slow Camera Shutter Plus

有無試過出外旅遊時,遇著要用慢快門嚟影先靚嘅嘢,例如流水、瀑布、車軌等等?
普通影相app到了呢個時候,只能愛莫能助,所以就有Slow Shutter app嘅出現了。
背負得Slow Shutter呢個名,最大特點當然就係可以調較快門速度,增加曝光時間,因而影低流水、車軌等有趣影象,增加旅途樂趣!

 

Replay – Video Editor for Instagram

有時出去旅遊,遇著啲好玩嘢,淨影相未必夠,拍埋片先可以完美記錄低當時情景!
但係手機原本嘅拍片功能並唔出眾,而且想後製加effect亦都麻煩。Instagram拍片失真度亦高,有時拍出嚟真係會睇唔清楚發生咩事。
呢個時候就可以用Replay,除咗可以直接用佢嚟拍片外,仲可以用嚟後製。
將你想edit嘅影片或者相加入去,選擇影片style同背景音樂,加埋字都得,咁就完成屬於你嘅影片啦!

Replay設有22種影片style(部份要額外收費),而且輸出影片可以揀正方形同傳統嘅16比9,實在簡單易用!
從此,手機拍片無難度!

最新吃喝玩樂資訊