【復活節齊撐！】九龍灣小朋友話事孩子市集 創意環保小遊戲+手作＠Miss Sunny

市集唔一定只係文青嘅主場，小朋友一樣可以話事！今個復活節(4月19日至22日)就有個充滿活力、創意嘅孩子市集喺九龍灣德福廣場進行。 最特別之處係，檔主們全部都係精力充沛又精靈嘅細路仔，到時有遊戲、有工作坊、亦有創意手作品買，賣嘅嘢一啲都唔小學雞！啱哂一班復活節無得出國旅行嘅家長帶埋屋企班細路去玩！就算無小朋友都可以去現場同班小檔主傾下計、支持佢哋～

由構思到製作完全由小朋友話事！

今次德福廣場同親子社企ohmykids舉辦嘅「孩子市集」﹐由策劃、流程、製作及一切即場難題都交由小朋友處理，家長都要企埋一邊！小朋友仲要以「升級再造」(Upcycling)為主題，動動腦筋如何把身邊「廢物」復活變成手作仔或小遊戲，真係少啲心機同創意都唔得！

創作力量同幻想會嚇你一跳！

市集每日會有10組小朋友開檔，攤位內容包羅萬有，當中會有小檔主會教你如何將舊T-shirt 變成購物袋；有攤檔賣以膠樽蓋升級而成嘅得意帽子髮夾；甚至有人會教你用廁紙筒製作一架「零排放」超級跑車，再同場battle，整完仲有得玩！個個都落足心思，大家絕對唔可以睇小細路仔嘅創意同執行能力！

5大精選攤檔

1. TigerLand

小檔主Tiger已經係第3次參加﹐由以前怕與陌生人說話，到宜家會主動去揾客人推銷自己嘅作品。今次佢就會為大家帶嚟「能量襟章」、「怪獸復活蛋」、「變變變小怪獸」同「能量瓶」，到底係咩嚟？Tiger話要賣吓關子先，叫大家到時嚟探佢！

2. 凌柔小手大作

呢兩個得意妹妹就親手創作出唔同嘅小飾品，今次就以『樹』、『葉葉』、『花』和『環保』為主題，仲特登收集咗大量膠樽蓋去整帽子髮夾，咁有心思，一定要去幫襯啦。

3. 狂野時速

小檔主會教你用廁紙筒創作一架零排放超級跑車，完成後仲可以喺佢自製嘅賽道比賽！家長們記得預留多啲時間喺呢度啦~

4. 童你玩

你無眼花！小檔主連彈珠機都DIY！玩嬴仲有獎品攞！

5. 一妍豬式會社

小朋友可以親手以絲印製作獨一無二環保袋！

同場加映：「熊仔慈善領養計劃」、「雞蛋燈工作坊」

市集內另設有2個檔攤「熊仔慈善領養計劃」及「雞蛋燈工作坊」，將以往商場佈置物資循環再用！現場會有義工教導小朋友清潔屋企嘅毛公仔，完成後仲可以HK$100-300「領養」一隻熊啤啤。而「雞蛋燈工作坊」則有手工藝導師教授小朋友發揮創意，以拼貼方式重新打造一盞專屬嘅雞蛋燈，仲會教你點樣「照雞蛋」。兩個活動嘅收益連埋各位小檔主嘅一半收入，都會全數撥捐予國際培幼會，有得玩又有得做善事，千祈唔好錯過啦~

德福廣場復活節「孩子市集」
日期：2019年4月19日至22日
時間：1pm-6pm
地點：德福廣場1期地下中央展場 (港鐵九龍灣站C出口)