【將軍澳】室內籃球X美式塗鴉@PARENT婷

Text: PARENT婷 photo: Janelle

自從奧運開幕之後，呀仔嘅新偶像就變咗係美國隊前鋒－杜蘭特，成日嘈住要學到好似佢打籃球咁勁。咁啱去開將軍澳廣場食嘢，見到一大個室內街頭籃球場，呀仔直頭眼都凸埋，睇埋台灣籃團MBA花式籃球同施寶盛嘅花式足球表演之後，佢直頭係欲罷不能！

原來嗰到搞緊「街籃當入樽 Basketball Festival」成個暑假都有好多嘢玩，難得呀仔鍾意我又唔使再諗去邊，梗係即刻舉手讚好啦！一齊睇睇有咩玩啦喂！

• 希望種子籃球訓練日

「轉身就射個3分波…」你估真係轉身就射咁簡單咩，其實籃球是要學的！前港籃成員梁國成就親身教打籃球，從來都坐唔定嘅呀B同其他「隊友」一齊邊學邊玩，仲識到幾個朋友仔添！

• 花式入樽隊表演

雖然話波係圓嘅，但要入樽其實都幾難，花式入樽就更加難上加難。跳彈床再入樽你又見過未呢？講到咁精彩我同呀b都mark定8月21號下午3點schedule去睇啦！

• 美國街頭風塗鴉創作日

其實呀B欣賞個室內街籃場其中之一嘅原因就係個塗鴉夠型，塗鴉達人Pantone C會喺8月14號下午3點即場表演，仲會教參加者創作第一件嘅塗鴉作品，正！

後記：

唔知幾時開始，香港嘅爸爸媽媽成日都俾人話係怪獸家長。其實有邊個做父母嘅，唔想自己仔女好先得㗎~就算冇得贏喺起跑線，至少都唔好輸得咁肉酸嘛~

其實又唔使一定死讀書先係好事，有時係要適當咁激發下小朋友嘅潛能至係皇道，今個暑假仲匿埋喺屋企溫書？快啲嚟將軍澳廣場一齊玩啦！

將軍澳廣場

地址：將軍澳唐德街1號（顯示地址）
電話：2207 4001
Facebook : www.facebook.com/TKOPlazaMall
Instagram : instagram.com/tkoplaza