港男驚爆飛越颱風「楊柳」！直擊穿越異度空間恐怖畫面｜網民揭真相：根本唔係閃電？

港男Threads直擊飛越颱風「影片10秒鐘感覺飛咗500年」

該名港男於8月14日在社交平台Threads上載影片，並心有餘悸地發文：「噚晚坐飛機經過颱風『楊柳』上空，感覺好似去咗穿越二（異）度空間咁，飛機好拋，出面好閃，感恩平安到埗。」他更在標籤中補充「#影片10秒鐘」、「#我感覺已經飛咗500年」，可見當時情況何其驚險。從影片中可見，機艙外漆黑一片，但不時閃現白色與橙紅色的強光，畫面亦隨機身不斷搖晃。事主慶幸自己當時乘搭的是波音777大型客機，直言：「好難想像我坐緊A320/737，飛過依個強對流區」，暗示若乘坐小型飛機，後果可能不堪設想。

網民嚇到腳軟「真心會好驚」！過來人分享恐怖失重經歷

影片曝光後隨即震撼全網，不少網民直呼恐怖，紛紛留言表示：「這外面景象也太可怕」、「媽呀！腳都軟埋」、「當下真的會緊張」。有過來人更分享自己更恐怖的經歷，引起極大共鳴：「已經唔算好拋，有時會恐怖到成架飛機失重，垂直降落幾十層樓咁多！」、「我試過打8號Singapore照飛返香港，臨尾1小時，一直保持向下衝，引擎同個風鬥力咁，我就踩住凳腳捉住兩邊，嗰種離心力永世難忘」、「我好耐以前又係打風！感覺架飛機有一下向下跌，有2-3秒啲啲離心力！全機人都冇出聲！個個驚到唔敢出聲！係好恐怖！」。

冷靜網民秒速踢爆「根本唔係閃電」！揭詭異閃光真相

正當討論區一片恐慌之際，亦有大批冷靜的網民留言分析，試圖還原真相，指出大家可能過份憂慮。有網民直接踢爆：「閃電唔係咁，咪玩啦！點會有橙紅色，飛（機）燈光都分唔開」、「大家唔使太驚，閃嘅光大部分係飛機燈，好明顯見到有規律咁閃」。亦有熟悉飛航的網民補充，航空公司一般會繞路避開颱風核心，並非直接穿越，而且飛機在高空巡航時相對安全：「其實飛咗上去就一啲都唔危險，最危險係起飛同降落嘅時刻」、「其實就冇咩問題嘅，飛得就係安全，只係過程冇咁舒服」，呼籲大家毋須過份驚慌。