上樓級
上樓級

上山容易 | 婆仔 上樓級 大法@Fitz.hk

生活

廣告

理論上,行山需要嘅體力要求較低,一般人其實可以藉住行山得到運動嘅樂趣。不過,麻煩在香港嘅山徑梯級特多,唔少朋友行完一次山大嗌腳痛,之後就拒絕行山。見到呢啲情況,我山雞真係覺得好可惜。事關香港24個郊野公園佔香港面積4成,你唔去行山,就真係玩少好多地方。

文章:GoTrip /Fitz.hk

【溫馨提示】行山要量力而為,郊遊時要尊重自然環境,不要留下垃圾及喧嘩,做好本分,一同享受這城市的美好風景。謹記出發前要先查看天氣報告網站,看看是否適合進行行山活動。

上山容易 | 婆仔 上樓級 大法

所以話,鍾意行山可以令你睇到香港嘅另一面。而學識點行樓級,又係走入郊野嘅一大途徑。

要上樓級唔腳痛,其中一個方法當然鍛練好肌肉,而最重要嘅,就係學識上樓級嘅技巧。

我山雞都試過犯錯,而一般人上樓級會出現呢啲問題:

一、只係前半掌踏上樓級,腳踭懸空,用腳尖發力。
二、本住「長苦不如短痛」嘅宗旨,兩級一步,一氣口衝上山。

結果就係唔單只腳痛,仲氣來氣喘,體力大為消耗,上半座山已經係咁,單係一段麥徑有幾座山,咁點行落去呢?

到有一年,受高人指點,學識一招叫「婆仔行山」,唔係同你鬥快,而係保證唔會腳痛唔會扯氣。

  1. 腳掌一定要成隻踏上梯級,盡量唔好腳尖用力將身體向上推(腳尖用力會運用小腿肌肉,會好攰)
  2. 越細步越著數:腳尖盡量貼向上一級下方(我就會將鞋頭踢住上一級嘅下方),目的係唔好要隻腳抬得太高,並要以大腿用力
  3. 上半身維持挺直
  4. 遇到樓級太闊,可半級而上,雙腳放在同一級,再繼續上多級
  5. 腳步唔需要太快,要有節奏,一步一步行就得。記住欲速則不達
  6. 呼吸:切勿太急太用力,可採取4步呼吸法,即1吸2忍3忍4呼,將吸入氧氣停在體內多一點時間
  7. 上到山頂,記得鬆下腳,向側邊踢幾踢,或做下拉筋

我第一次跟呢位高手學呢招,佢陪我由北潭坳麥徑三段起點,一口氣未停過行上牛耳石山。上到山頂,我驚嘆一句:「吓!咁就行完?點解唔覺辛苦嘅?」而呢一招,對我嚟講真係一生受用。

呀,唔記得講,呢位高手叫陳國強,人哋叫佢毅行先生,我哋叫佢 KK。

同場加映:樓梯操練方法影片

https://www.youtube.com/watch?v=YXyeM7n_Dr4