自由定價 睇戲 新概念@JETSO文

睇戲 嚟講,口味、感受各人不同,你俾$100覺得抵,隔籬嗰位可能覺得唔啱睇!JETSO文最近去咗荔枝角D2 Place,就發現佢哋嘅放映活動「唞啖戲」認真搞事,套戲值得俾幾錢?完場先找數,仲可以自由定價,你話俾幾多就幾多,成件事好似抵玩好多噃!而家幾乎逢星期三晚都有場,由偏鋒電影到經典戲碼都有,部分仲設電影分享會,係咪好吸引先?等我JETSO文再詳細同大家分享下啦!

「唞啖戲」係乜嚟?

放工後,係人都想唞啖氣,所以「唞啖戲」自今年3月開始,特別聯同一向支持本土創意文化嘅D2 Place,於商場2期舉辦電影欣賞會,專門播放一些獨特、優質,甚至戲院冇上過嘅電影(例如由《鬼怪》大叔孔劉及全度妍主演嘅《雪國戀人》、《何者 – 我們都想成為誰?》小說原作者朝井遼另一得奬小說改編嘅《聽說桐島要退社》),或者在戲院上映時很受歡迎的小品類(例如《100 Yen的愛》、《攣情告急》),仲有經典好戲(例如Richard Linklater經典「愛情3部曲」嘅第3部《情約半生》(Before Midnight) 及日本殿堂級情色電影《失樂園》等等,一齊推廣非主流電影文化!

星級電影分享會

每月嘅電影主題都唔同,入場觀眾可以為電影自由定價,完場後隨心俾出你認為值得嘅票價以示支持!佢哋仲有不定期嘅分享會或crossover活動,之前就邀請過香港電影金像獎得主、《狂舞派》監製陳心遙、影評人何故等做分享會嘉賓,仲有試過舉辦韓文教室及拳擊示範,亦邀請過「真。日本人」- 在港日本藝人Soko和泉素行嚟分享「真。日本事」,反應都非常熱烈。嚟緊仲會舉辦導演精選作品展,真係聽到都覺得豐富呀 !

五月天 以愛之名「唞啖戲」

正所謂要愛便愛,不論咩形式嘅關係,愛情要嚟嘅時候,真係擋都擋唔住!5月份,「唞啖戲」以「On s’aime 不一樣的愛」之名, 為大家帶嚟4套愛情主題電影,當中有異性戀、同性戀、雙性戀、母子戀、不倫戀,甚至人同喪屍之戀都有,總之大愛無限界,愛情至上咁話!完場後仲有相關電影分享會,甚至會同speed dating公司crossover搞活動,詳細節目表睇下面。

「唞啖戲」節目預告

話說活動可以網上或者即場登記入場嘅,不過係先到先得、滿額即止,所以JETSO文就同大家列晒嚟緊5、6月有咩好戲上,等大家早啲登記預位,舒舒服服放工去「唞啖戲」!

日期 電影/主題 同場加映
主題:「不一樣的愛」
10/5 《偷戀隔籬媽》 與作家兼廣告人黃獎先生進行映後對談
17/5 《來自墳墓的妳》 與speed dating Fever公司crossover舉辦活動
主題:「電影製作的背後*」
31/5 《情約半生》 劇情短片《墨綠嫣紅》 @7:00pm
7/6 《黎巴嫰》 劇情短片《青州山上》 @7:00pm
14/6 《進擊的巫女》 紀錄片《冬日陽光》 @7:00pm 、劇情短片《驚濤淘湧》 @7:15pm

*為配合「電影製作的背後」嘅主題,本月更會展出《音樂人生》導演、香港電影金像獎得主張經緯嘅短篇作品精選。

最近「唞啖戲」已經開始籌備下一輪的片目,觀眾除咗可以自己話事俾幾多錢,仲可以自己話事 票選睇邊套戲添!記得密切留意「唞啖戲」facebook專頁。

「唞啖戲」活動詳情:

日期:即日起至8月底(逢星期三)

時間:7:45pm

地點:The Labs, D2 Place 2期 (2/F)

交通:港鐵荔枝角站D2出口

票價:自由定價

參加辦法:網上 / 即場登記 (先到先得,額滿即止)

facebook:唞啖戲D2 Place

網址:www.d2place.com/movie

最新吃喝玩樂資訊