平安夜限定│ 城巴88R 變開蓬巴士睇夜景│拍拖好去處

早前介紹過香港最浪漫的巴士路線─九巴53號線,情侶可以坐足兩個鐘睇靚景。最近記者發現到另一條聖誕節限定的巴士線 城巴88R ,將於明天23及24 日平安夜,變身開蓬巴士!巴士由沙田開至中環,沿途會經過大老山隧道及東隧,更會走上觀塘繞道及東區走廊,一 邊坐巴士一邊飽覽維港夜景,去到中環更可看到聖誕燈飾。今個聖誕限定兩日咋,快點帶女友去坐啦!
撰文:Keith │ 拍攝:Wyman

一年一次 聖誕3日限定

聖誕拍拖去街睇燈飾又迫又冇新意?不如去坐巴士!有位坐又有景睇,更自成一角浪漫一下。但現行的開蓬巴士路線只限於市區行走及為遊客而設的H1及H2;以及只限早上一班、來往柴灣站及小西灣的82M。只在市區行走可以感受到風景不多,不過明晚及平安夜,城巴將安排來往沙田開至中環的 城巴88R 變身開蓬巴士。但每晚只有2班,要坐真係要早點去排隊,因為座位相當有限,露天的只有44個。記者昨日(21號)率先試坐,當日已有大班巴士迷一早到場排隊,全車滿座,相信平安夜會更加爆滿。

吹吹風 看維港靚景 睇燈飾

城巴88R 於21、23及24號晚分別在沙田第一城及中環開出,價錢$19.5,當晚班次會經大老山隧道出觀塘繞道,再落東隧過海,再經東區走廊回灣仔及中環。88R站少,而且全程走天橋及隧道,高速行駛,坐在露天座上北風迎面而來,感受到極強速度感。最刺激是進入隧道一刻,風聲更強,加上跟隧道頂只有咫尺之間,好像一站起就會被撞到似的(當然是很安全的)。而最開心是在觀塘繞道及東區走廊上無阻隔看到維港夜景,去到中環更可睇到聖誕燈飾,相當應節浪漫。
巴士全程約50分鐘,但沿途靚景不斷,時間很快就過,是個不錯的體驗。

城巴88R聖誕限定開蓬版

日期:23、24/12

起點:沙田第一城(終點為中環碼頭);開車時間:10:20pm

起點:中環碼頭民光街(終點為沙田第一城);開車時間:11:00pm

詳情:www.nwstbus.com.hk/en/uploadedFiles/evs_notice/E201602646b03.pdf

最新吃喝玩樂資訊