仙氣！昂坪 棧道 賞蝶打龍 輕鬆遊|周末遊懶人包

撰文：[email protected]廿四孝暖男 | 攝影：Chi

第一站 ！「穿窿」纜車睇靚景

同女朋友行山首要輕鬆，所以記緊要由昂坪起步調轉行，先搭纜車上山，省點腳骨力，又唔使熱到囡囡成身汗，仲可以睇到機場同東涌靚景！

搭纜車上山途中，可以睇到棧道在你腳下，到時只要跟著纜車方向就不會迷路。

到時記得揀「穿窿」水晶纜車呀，搭纜車咁「離地」女朋友驚驚仲唔自動攬實你咩！

第二站！ 昂坪「你叫我玉蝴蝶」

一踏出纜車，平日充滿佛氣的昂坪市集變得仙氣處處，原來昂坪有近過百種蝴蝶，而其中「昂坪三寶」草黃弄蝶、鈎型黃斑弄蝶及東亞矍眼蝶更係非常罕有，所以昂坪市集放置了不少蝴蝶影相位等大家打龍親親蝴蝶。

但始終佢識飛你唔識飛，有時真的一蝶難求，所以蝴蝶專家特意在昂坪設計了一條蝴蝶徑，等你可以輕易「野生捕獲」到蝴蝶。

三寶之一的東亞矍眼蝶，佢係非常罕見的眼蝶。後翅有三個眼斑，到底佢係三眼仔定二朗神？

第三站！山中棧道 影 仙氣女神

山中棧道原是纜車的緊急拯救通道，但亦開放作行山徑。由於該帶山多斜度高，故以木棧道形式連接山中。行山連拍攝約三小時。途中有多個影相位，文青、仙氣、女神風格都可拍到。其中必影是一條接近垂直的V形木樓梯，走時一步一驚心，影相效果一絕。另外亦會經過纜車塔，記者跟乘客揮手，更偷聽到他們對話，真正零距離接觸。走至後段可看到開揚機場靚景，睇飛機睇到唔想走。最後下山後可去看看候王廟及炮台等古蹟，完成一日的輕鬆小行程。

棧道其中一段可清楚看到機場，真係睇飛機睇到唔捨得走，亦可遠望屯門市區。

棧道大部分都有樹木遮掩，整體不太曬。學Model坐在木道旁，襯上樹景，即刻山系仙氣上身。

接近垂直的V形樓梯是棧道必影。咪睇Model企定定好輕鬆，其實重心高如記者般的米八高登仔更難行。

文青女神又點少得在塔底影上去的幾何抽象圖。