街坊廚神重出江湖
街坊廚神重出江湖

【街坊廚神重出江湖】6~10集日本美食攻略(附地址、交通詳情)|小儀難忘鳥取飛魚、日本第一和牛燒肉

日本

廣告

【街坊廚神重出江湖】由小儀同金剛主持嘅《街坊廚神》系列又返嚟啦,新一輯名為《街坊廚神 重出江湖》,除咗香港本土,仲遠赴上海、日本覓食!上兩輯就去過東京啦,今次嘅日本篇就去咗鳥取同姬路兩個遠啲嘅地方。一齊睇睇小儀有咩推介啦!

撰文:Chi|圖片來源:網絡、劉芷希 Kimmy Low@Facebook、Kitty Yuen Siu Yee 阮小儀@Facebook

街坊廚神重出江湖 發掘日本美食

新一輯《街坊廚神》遠赴日本鳥取、姬路食好嘢!小儀最難忘兩地嘅邊啲美食呢?

第6集:姬路

01|天麩羅.鴨鍋屋

令小儀非常難忘嘅鴨鍋店就係佢啦!小儀回味無窮咁話:「鴨鍋係以Shabu-Shabu形式咁食,每片鴨肉都切到好薄!而且店內會有張卡紙教你點食,肉就涮不過10秒、蔥都係3秒左右就可以食。再沾少少醬汁,就已經好好味!保存咗鴨肉嘅鮮味!」用嚟蘸點嘅調味料非常簡樸,令小儀都忍唔住感歎日本人竟然可以用咁簡單嘅方法,就做出一份如此美味嘅料理。

天麩羅.鴨鍋屋鴨助姬路店
地址:姬路市魚町100 柳川ビル1F
電話:050-5289-2055/079-283-5055
營業時間:6pm-2am(年中無休)
交通:各地鐵線姬路站往北徒步8分鐘。

02|骨付鳥本舗 鶏一

骨付鳥意即「帶骨嘅雞髀肉」,係日本嘅知名美食。對我哋嚟講,聽落同普通一隻雞髀冇咩分別,但其實喺日本,係甚少見到帶骨嘅肉類出售。聽聞骨付鳥非常juicy,係日本平民B級美食!去旅行萬勿錯過呀!

骨付鳥本舗 鶏一姫路總本店
地址:姫路市駅前町306
電話:079-225-7875
營業時間:11:30am-3pm;5pm-11pm(年中無休)
交通:各地鐵線姬路站往北みゆき通り(Miyuki Dori)徒步3分鐘。
網址:toriichihimeji.owst.jp/

03|姬路 穴子料理 一張羅

穴子亦即星鰻,而呢間居酒屋式餐廳就係專售各種穴子料理,當中仲包括新鮮刺身!有網友話上菜時,甚至會見到刺身喺碟上輕微抽動!新鮮度爆登!餐廳位於姬路城同姬路站之間,最大嘅商店街御幸通嘅地下室,搵路時要仔細啲睇啦。

一張羅
地址:姬路市驛前町345みき正ビルB1F
電話:079-288-7714
營業時間:11:30am-2pm;5:30pm-10pm(逢星期一休息)
交通:由姬路站0番出口走到みゆき通り(Miyuki Dori),往北直行,走過2本筋就到。
網址:himeji-anago-iccyoura.com/

第7集:鳥取

01|賀露港鮮魚市場

鳥取係沿海城市,盛產海鮮,唔止夠哂新鮮,而且仲有非常少見嘅飛魚買!呢個鮮魚市場同大家熟悉嘅築地市場類同,都係可以喺市場內品嚐到新鮮魚料理!即買即煮!

賀露港鮮魚市場
地址:鳥取市賀露町西3丁目27-1
電話:0857-38-8866
營業時間:8am-5pm(年中無休)
交通:從鳥取站乘的士(約6.2km)或從鳥取站巴士總站乘日之丸巴士賀露線,並於「かにっこ館前」(徒步1分鐘),或「賀露海岸」(徒歩5分鐘)下車。(車程約35分鐘)
網址:karoichi.jp/

02|Abui蒲鉾(あぶい蒲鉾)

Abui蒲鉾係由明治23年(1890年)創立嘅老店,最出名嘅係魚糕同飛魚扒漢堡。魚糕由製作至販售都一手包辦,保證用日本魚新鮮製造。飛魚扒漢堡亦曾於2015年鳥取漢堡節中獲得第8位佳績!

あぶい蒲鉾
地址:東伯郡琴浦町八橋363-2
電話:0120-1089-52
營業時間:9am-6:30pm(逢星期三休息)
交通:到八橋站下車徒步。
網址:abuikamaboko.com/shop/

03|Grain(グレイン)

雖然呢間西餐廳主打東伯和牛,但另一樣出名嘅美食,就係飛魚扒咖喱飯!除咗和牛同飛魚扒,亦都可以品嚐到生海膽意粉同蟹肉忌廉餅!可以試到唔少鳥取海產。

グレイン
地址:鳥取県東伯郡琴浦町八橋392-2
電話:0858-52-1211
營業時間:11am-3:30pm;5:30pm-9:30pm(逢星期三休息)
交通:到JR八橋站下車徒步約10分鐘,或從八橋巴士站徒步約3~5分鐘。
網址:kotoura-kankou.com/grain/

04|あじろや(Aziroya)

試完幾種唔同嘅飛魚料理,係時候試下其他海鮮啦!呢間位於觀光遊覽船碼頭食堂內嘅Aziroya,就有視覺效果頗為衝擊嘅「墨汁料理」!黑漆漆嘅咖喱飯同湯烏冬,其實係當地嘅B級美食!據說呢股墨汁香會令人上癮,大家有緣就去挑戰一下啦!

浦富海岸島めぐり遊覧船のりば食堂 お食事處 あじろや
地址:岩美郡岩美町大谷2182
電話:0857-73-1212
營業時間:11am-2pm(全年無休)
交通:由JR岩美站乘前往鳥取站的巴士約15分鐘,在島めぐり遊覧船のりば前站下車。
網址:yourun1000.com/pages/ajiroya

05|大榎庵(oneokian)

傳說中嘅「粉紅宴」!呢間咖喱店嘅噱頭係「粉紅色」,由咖喱汁開始,到豉油、wasabi通通都係粉紅色!店內裝修復古,集西洋式同和式風格於一身,甚具特色。如想品嚐粉紅咖喱嘅話,記得留意呢款咖喱只會於Lunch時段(下午3點前)提供㗎咋!

佢哋一行人都好困惑,心諗呢碟「粉紅咖喱」莫非係用士多啤梨嚟整嘅?原來,粉紅色咖喱汁係由紅菜頭整成嘅。即使係用另一種材料製成,但其實都有好好保持到食品嘅味道,咖喱有咖喱味、豉油都係平時嘅豉油味,小儀話個「粉紅咖喱」仲辣辣地!

除咗個食物set係全粉紅色,店主仲請咗個漫畫家,嚟幫舖頭度身訂造咗個故事!店內仲可以借宮廷衫嚟著,大玩cosplay!

大榎庵
地址:鳥取市大榎町3-3
電話:0857-30-4891
營業時間:11am-9pm(全年無休)
交通:從鳥取縣廳徒步約2分鐘。
網址:allure-ba.com/oenoki/

第8集:姬路

01|大亀山

由退役相撲手主理嘅相撲力士料理。講得係相撲料理,又點可唔唔提「相撲火鍋」!份量大到一般人嘅話可能要4~5個人先食得哂!唔使擔心,怕食唔哂嘅話其實可以叫一般大小嚟食,咁就唔使怕浪費之餘,可以一嚐相撲手嘅美食啦!

力士料理 大亀山
地址:姫路市三左衛門堀西の町141
電話:050-5280-2523/079-285-1143
營業時間:5pm-11pm(逢星期一休息)
交通:從JR姬路站中央口往南方向徒步約10分鐘。

02|タコピア(TAKOPIA)

明石燒係類似於關西地區甚具代表性嘅小食,章魚小丸子。兩者分別在於,明石燒喺原料中加入咗更多雞蛋,口感比章魚小丸子更綿密。而且明石燒係會淋上湯汁,而非醬料。當地人之間會稱明石燒為「雞蛋燒」。

タコピア
地址:姫路市駅前町363番1
電話:079-221-3657
營業時間:9am-5pm(全年無休)
交通:從姬路站徒步約1分鐘。
網址:himeji-festa.com/shop/takopia

03|夢や 大眾居酒屋

日本常見嘅居酒屋,有五花八門嘅佐酒小菜,例如關東煮、煙肉露筍等。而且店家對日本酒非常講究,有日本清酒、燒酒等等選擇。旅行玩到夜一夜、玩到攰,不妨到居酒屋小酌一杯!但千萬謹記日本飲酒嘅合法年齡係20歲!未成年就唔好以身試法啦!

夢や 大眾居酒屋
地址:姫路市駅前町301
電話:050-5570-2608
營業時間:10am-10pm(全年無休)
交通:從JR山陽本線姬路站中央改札向北走徒步約3分鐘。

04|好古園 茶室 双樹庵

茶室雙樹庵設計以江戶時代嘅武家屋敷茶室為藍圖,而且每間茶室都設計成面向姬路城天守閣!想感受一下日本傳統庭園風貌,細細品嚐抹茶同和菓子嘅話,呢度係一個絕好嘅環境!

好古園 茶室 双樹庵
地址:姬路市本町68
電話:079-289-4121
營業時間:10am-4pm(21/12~5/1休息)
交通:從JR姬路站北口乘神姬巴士,到「姬路城大手門前」下車,徒步約5分鐘。
網址:himeji-machishin.jp/ryokka/kokoen/index.php

05|杵屋

杵屋最出名嘅美食就係名為「書写千年杉」嘅年輪蛋糕。年輪蛋糕最重要就係麵糊嘅質感,而杵屋嘅蛋糕麵糊每日都會有「專任」職人細心烤焗,因此有著漂潤又鬆軟嘅口感,適度嘅份量感會令你食到停唔到口!

杵屋
地址:姫路市二階町95
電話:079-285-3509(本店)/079-267-2333(預約體驗教室)
營業時間:8am-7pm(1/1-2/1休息)/體驗教室(1pm/3pm)(約40分鐘)
交通:各線姬路站徒步約7分鐘。
網址:kineya.net/

第9集:鳥取

01|泊漁港

嚟到沿海嘅鳥取,又點可以唔出海呢!喺為數唔多嘅漁港中,泊漁港有著最優勝嘅地理環境!既可以品嚐到即捕即烤嚟食嘅新鮮海鮮,亦可以同超nice嘅漁師太太傾下計!

湯梨浜町 泊漁港
地址:東伯郡湯梨浜町泊
電話:0858-35-4052(可向觀光協會查詢)
營業時間:11:30am-1pm(僅限4月~11月中旬)(其他時間需再議)
交通:乘JR到倉吉站下車,再轉乘的士,車程約10分鐘。
網址:yurihama-kankou.jp/

02|昭和民宿 龍神莊

龍神莊係一間真係營運緊嘅民宿,唔少客房都係望海㗎!點解連民宿都關事?其實係因為呢間民宿嘅老闆係非常鍾意煮嘢食同好好客!唔止歡迎預約大大小小嘅聚會,仲會有便當出售。而最令人回味無窮嘅,就係汁煮鯛魚同勁新鮮嘅刺身!

昭和民宿 龍神莊
地址:岩美郡岩美町大羽尾274-1
電話:0857-72-0286/090-5672-9345
營業時間:全年無休,電話查詢服務:10am-6pm
交通:從鳥取站乘上山陰本線【濱坂行】電車,於【東濱站】下車,再徒步25分鐘。
※已預約嘅客人可享有送迎至JR東濱站服務。
網址:ryujinsou.com/index.html

第10集:鳥取

01|大江ノ郷自然牧場

牧場最出名嘅係名為「天美卵」嘅雞蛋,因為雞隻都係放養、飼料講究,所以「天美卵」嘅營養值非常高!而且每日出貨嘅雞蛋都係同一朝早採集返嚟嘅,鮮度滿分!用「天美卵」整嘅料理就自然份外美味啦!

大江ノ郷自然牧場
地址:鳥取県八頭町橋本877
電話:0120-505-606
營業時間:10am-6pm(全年無休)
交通:從鳥取站乘JR因美線(大原或智頭方向),到郡家站下車,再轉乘「さんさんバス」(大江倉庫行)巴士,到「大江ノ郷自然牧場」下車。
網址:oenosato.com/index.html

02|炭蔵

日本之行又點少得燒肉呢!喺第11回全國和牛能力共進會,鳥取和牛獲得咗全國第一!炭蔵仲以一個低價就能食到和牛稀少部位!厚切和牛都只係980円(約$70)!

炭火焼肉 炭蔵
地址:鳥取市古海618-1
電話:0857-30-7029
營業時間:11:30am-2pm;5pm-12am(全年無休)
交通:從鳥取站駕車約3分鐘。
網址:yakiniku-sumikura.com/about

03|海陽亭

除咗精緻嘅料理,店家對於用餐環境都非常講究,極力營造日式Resort感嘅空間,令客人可以喺一個舒適嘅空間品嚐鮮甜味美嘅海鮮料理。必試松葉蟹、鯖魚刺身、陶板燒生蠔!

除咗飛魚,小儀仲食咗蠔!攝製隊一行人去食新鮮蠔,分有大、中、細3個size大小畀佢哋揀。結果發現,原來最大嘅未必係最好食!反而中size就最滋味。

 

いけす料理 海陽亭
地址:鳥取市賀露町西3丁目27-1
電話:0857-31-4649
營業時間:11am-2pm;5pm-9pm(全年無休)
交通:從鳥取大學前站徒步約10分鐘。
網址:ginrin-grp.com/ginrin/index.html

04|炭火焼ジュジュアン

呢間燒肉店標榜「地產地消」,意即「本地生產,本地消耗」,既可品嚐到由鳥取本土海港魚穫即烤嘅新鮮魚,更可食到鳥取和牛嘅高品質肉,仲有一早採摘而來嘅蔬菜同有機米。

炭火焼ジュジュアン
地址:鳥取市末広温泉町751
電話:0857-21-1919
營業時間:5pm-12am(不定休)
交通:從鳥取站徒步約5分鐘。
網址:sumibi-jujuan.info/#top

番外篇

不得不提嘅仲有鳥取名物,蕎頭。小儀就話平時自己喺香港,其實唔食蕎頭,但鳥取嘅蒿頭食到完全停唔到!有別於一般用糖醋醃製嘅做法,鳥取蕎頭會用上紫蘇、梨等等一同醃製,好味到忍唔住買咗一大堆返香港做手信!