【快樂減肥】日本米芝蓮大廚星級減肥食譜|青瓜、蕎麥籽、洋葱食住瘦

日本

廣告

【 FlyJapan 】已經立咗夏啦!即係夏天正式蒞臨啦!相同唔少女士都開始咗減肥行動,務求以最佳狀態著泳衣去同陽光玩遊戲啦!講到減肥…通常都只有痛苦嘅印象,又要做運動出一身汗,又好多嘢都唔敢食,好難維持想減肥嘅心。今次日本節目《得する人、損する人》就請咗3位米芝蓮星級大廚,教你透過3種食物輕鬆減肥!既唔使做運動,亦唔使節食,仲可以繼續食油膩嘢!

撰文:Carmen|圖片:《得する人、損する人》電視節目截圖

01|青瓜

由米芝蓮2星級總廚野崎洋光師傅親自實踐過,總廚因經常要幫手試味,又因為店務繁忙,食飯時間好短,所以每次食飯都一口氣咁倒落肚。情況就有如要湊小朋友嘅家長,要清晒小朋友食剩嘅飯餸一樣,好多時候都默默食多咗好多嘢。野崎師傅就透過餐前一條青瓜,成功由70kg減到57kg!足足輕咗11kg!

青瓜所含的瘦身成份

據專門家解釋,青瓜含有非常豐富嘅磷脂,而磷脂係減肥產品中不可缺少嘅最強瘦身成份,而磷脂有2種對減肥有顯著效果嘅成份:

效果1:提高新陳代謝(燃燒脂肪嘅能力)。

效果2:將食物中嘅脂肪進行分解、排出。

雖然亦有其他蔬菜都係含有磷脂嘅,但專門家指青瓜嘅磷脂含有量最多,分解脂肪嘅能力最強。

只需要每餐正餐前食一條青瓜,之後正餐無論食咩都完全OK!覺得只啃青瓜好悶嘅,仲可以蘸醬汁嚟食,咩醬都冇問題!

但同時要注意2個重點:

重點1:唔好煮,要生食!

因為磷脂一旦經過加熱,會減弱減肥效果。

重點2:每一啖都嘴嚼20次或以上!

充分嘴嚼食用可更有效率地吸收磷脂。

之但係…餐餐咁食法,好難唔悶架喎!為咗令大家可以繼續食落去,野崎師傅仲製作咗2款食譜添呀!

青瓜味噌漬

以平常嘅做法,整漬物至少都要半日,而野崎師傅嘅食譜只需4小時就可以完成!而且做法十分簡單!

做法:將100g味噌+30g原味乳酪混合,然後放入用鹽洗刷過嘅青瓜,用密實袋裝好後,放入雪櫃浸漬4小時就完成啦!

師傅話因為味噌同乳酪一樣都係發酵食品,所以整漬物時可以有效減短所需時間。

乳酪味噌湯

整完頭先個漬物,青瓜就食完啦,咁啲乳酪味噌要點處理?師傅就話可以直接拎去煲味噌湯!有別於一般日本味噌湯咁要整埋個高湯,師傅表示所有食材都會成為高湯嘅一部分,飲落味道同一般味噌湯無異。

雞肉綠醋青瓜蓉

做法:首先將一條青瓜磨成蓉,磨蓉可以令酵素容易活動,而磨蓉後隔出嚟嘅青瓜汁,千祈唔好倒咗去!可以加適量蜂蜜當密瓜汁咁飲!

然後將青瓜蓉放到雞肉上,而因為雞胸肉喺精力嘅來源,同青瓜配合仲有更好嘅效果!雞肉含有嘅精氨酸同樣有燃燒脂肪嘅效果。其他同樣有效果嘅食物仲有:豆腐、金槍魚、味噌。放上青瓜蓉之後澆上柚子醋同麻油就完成!

藝人親身驗證3星期減肥結果:

女藝人福田明日香試行3星期之後,體重由原本嘅43.2kg,減到40.7kg,腰圍由74cm減至64.5cm,足足幼咗9.5cm!

02|蕎麥籽(そばの実)

另一位米芝蓮星級大廚,橋本幹造師傅表示餐前食一匙蕎麥籽,就可以喺唔做運動、唔限制飲食嘅情況下輕鬆減去8kg!

蕎麥籽所含的瘦身成份

蕎麥籽含有一種稱為阻抗蛋白質(Resistant Protein)嘅蛋白質,能夠抑制脂肪嘅吸收。一般而言,脂肪會被膽汁酸分解吸收,而阻抗蛋白質就有妨礙膽汁酸行動嘅作用,阻止脂肪吸收及有效排出體外。唔止減肥,蕎麥籽仲有預防高血壓嘅效果。蕎麥籽含有蘆丁同膽鹼成份,膽鹼更有預防脂肪肝等效果。

處理方法:

1)浸水1小時

2)用小火~中火煮15分鐘

3)沖水洗走表面黏滑就完成!

浸水還原後可放雪櫃保存3日,記得唔好一次整得太多量呀!

都係嗰句,即使只係餐前食一匙,食多咗都會悶架嘛!又係時候睇下大廚會點烹調啦!

山藥泥蕎麥籽

做法:喺500cc清水中,加入100cc料理酒&100cc淡口豉油,然後倒入鰹魚碎,開火煮至微滾,約60~80℃就可以隔渣。喺3湯匙份量蕎麥籽上放一層山藥泥(約半條日本長芋),最後倒入高湯就大功告成啦!

日本長芋嘅效果:

1)長芋含有豐富鉀成份,可以排出身體內多餘嘅鹽份,有助去水腫。

2)含有同食物纖維相似嘅成份,可有助改善便秘問題。

藝人親身驗證3星期減肥結果:

由2位體重加埋超過200kg嘅搞笑藝人Donguri Powers嘅Minako同Aiko進行試驗,Minako由105.6kg減至98.8kg,Aiko則由106.2kg減至99.7kg!腰圍分別減咗9cm同7cm!實在太勵志啦!

03|洋葱乳酪

節目以前曾經介紹過嘅超人氣食法,對通便非常有成效!但網絡上好多聲音表示對味道厭倦,所以今次就由星級大廚稍加調整,製作食唔厭嘅dressing風乳酪。

洋葱乳酪製法:洋葱1個+無糖原味乳酪200g+鹽 1/2茶匙

1)將洋葱切至薄片,靜置約30分鐘。

2)將200g無糖原味乳酪同1/2茶匙鹽加到洋葱片中。

3)充分混合後就完成!

可直接食用,亦可放雪櫃一晚後再食,洋葱會變軟且更易入口。整完1次後2~3日內要食完,每日大概食50g。

大廚調整後新製法:洋葱乳酪200g+淡口豉油2湯匙+檸檬汁1湯匙+白芝麻2湯匙,將所有材料混合好就完成!

洋葱乳酪所含的瘦身成份

乳酪含有嘅乳酸菌能活性化腸內細菌,腸內細菌會吃掉洋葱所釋放嘅菊糖,從而產生短鎖脂肪酸,呢種就係現時魔法般嘅最新減肥物質「瘦酸」。

短鎖脂肪酸嘅效果:

1)活性化腸臟活動

2)提高新陳代謝

3)抑制脂肪吸收

4)抑制食欲

甜品版洋葱乳酪:洋葱乳酪50g+蜂蜜 適量+檸檬汁 少許,攪拌混合後放到多士上,可製成法式多士風甜品!

藝人親身驗證3星期減肥結果:

女藝人井上咲樂進行3星期減肥試驗後,體重由46.6kg減至41.1kg,腰圍由74cm減至62.5cm!足足輕咗5.5kg!腰仲瘦咗11.5cm!

最新吃喝玩樂資訊