札幌機場封閉
札幌機場封閉

旅遊教室 : 大風雪 札幌機場封閉 ,唔想滯留東京大阪點算好?

日本

廣告

每年冬天,新千歲機場都會間中因為大風雪而要全面封閉,飛機唔能夠起飛又唔可以降落,搞到好多人滯留日本各大機場!香港人咁鍾意去北海道,如果不幸撞啱航班延遲或停飛可以點算呢?坐國泰、港航直飛札幌的話,就只可以揀「等」,但如果坐日航或全日空,先飛東京或大阪再轉機的話,可能有解決辦法!記者就試過因為大雪,東京的所有航班飛唔到去新千歲機場,結果用1分鐘時間用決定,轉飛旭川,最終唔使喺機場過夜,北海道的行程亦冇太大改動!

01 | 內陸機停飛,等唔等下一班機好?

如果你係坐廉航(如Peach/ Vanilla)的話,就冇得揀唔等!但坐日航或全日空的話,你不妨考慮轉飛北海道其他機場,因為北海道地方大,新千歲機場(札幌)可能因大雪而封閉,其他機場可能如常運作,與其留喺東京/ 大阪機場過夜,不如飛咗上北海道再作打算!咁當然要視乎情況而定,如果航空公司話只係延遲,就可以等下,但如果當日所有航班都取消,就最好揀唔等!

02 | 要唔要另外俾錢買機票?

因為呢個係特殊的情況,日航或全日空都會免費為乘客重新安排航班,唔會另收費,但當然要視乎該航班有冇吉位!

03 | 改飛邊個機場好?

首先,當然係睇下當日仲有冇機飛北海道其他機場,同埋仲有冇位啦!其次,就要睇下你的北海道行程。不過,如果你身處成田的話,就諗都唔使諗,因為無機飛其他機場!
我的建議係,如果你主要玩札幌的話,應該揀旭川機場,因為相對最近札幌;至於想去函館、二世古、登別的話,就應該揀函館空港。

04 |有咩要特別注意?

最緊要的,應該係機場前往市區的交通!抵達時間如果早的話,可能仲坐到巴士,但如果好夜先到,就要有心理準備坐的士!我上次係飛因為打算去美瑛富良野,就揀咗改飛旭川機場,即刻book咗美瑛車站旁的商務酒店,由機場坐的士都只係2千日圓左右!