旅遊教室︰去日本，一落機就想去Shopping，件行李可以點? 日本 行李宅配 教學

#1. 宅急便，最快即日送到

「空手觀光服務」可以為遊客寄存行李或將 行李宅配 送到酒店及機場，212個服務點遍佈日本各主要機場、鐵路站、酒店及購物中心，部分可以提供即日送到服務。好似我這種貪心旅人，去完四國睇藝術祭，又想去秋田泡個雪見風呂，然後又落番東京爆買兩日，行程滿檔，行李爆榜，就要宅急便幫手先將滑雪褸送去秋田、爆買手信送去尾站東京，全程唔使拎住行李。會唔會好煩? 填張form畀百零蚊，準時到達，而行李若在運送過程中遺失或損毀都會作出賠償，安心曬啦!

無論你是用「Japan Hand Free Travel」又或我最常使用的宅急便ヤマト(黑貓)和佐川，方法都好好簡單。

點搵幫手?
機場 / 巴士站 / JR站 > 酒店︰
貼有「Japan Hand Free Travel」標誌的行李寄送服務店舖
酒店 > 酒店/滑雪場︰
櫃台職員會代為處理

有咩程序?
填好宅配單據，職員會量度行李體積及重量，告知送抵日期及寄送費用，付款，搞掂。

寄行李收幾錢？
行李會在指定時間運送至指定酒店。選擇運送的話，由東京至北海道收費大約‎ ¥‎2,268/HK$170、大阪至北海道唔使$200，唔貴呀!

需要通知收件的旅館嗎？
有禮貌的可以發個電郵通知，不過除非你有好大量的行李，否則其實不用特別通知。

行李有無限制?
行李體積要在160厘米以內、重量在30公斤以下、行李總額不超過‎ 30萬円。 高爾夫球袋、滑雪板、雪地滑板等，即使尺寸超過160厘米，但重量在25公斤以下的都可以寄送。

實用網址

JNTO　網址︰www.jnto.go.jp/hands-free-travel
佐川 網址︰www.sagawa-exp.co.jp/english/
ヤマト 網址︰www.kuronekoyamato.co.jp/en/

#2. 儲物櫃，梗有一個响左近

上次去大阪太早到機場連櫃枱都未開，把心一橫去附近outlet行街，行李就放在機場的手提行李寄放處，一日收費¥620/HK$46，與放在Coin Locker差不多。不過如果要在新宿車站放低件行李，想搵一個儲物櫃都難。建議大家可以用「coin locker search」這個網站，雖然只有日文，但睇漢字都估到意思，在網站內可以看到日本全國主要車站儲物櫃的地點、料金、地圖檢索、利用時間、支付方法等，非常方便。

網址︰http://coinlockersearch.com