大阪抵食放題Top 5|記者實測!最平$186 食勻刺身火鍋燒肉+松葉蟹無限任點

去日本旅行,最正就係可以每日不停喪食。但好多時逐樣叫,想食好少少每人都可能要近千,套餐又總會有一兩樣唔啱心水,咁就梗係要揀放題任食啦!編輯部嚴選大阪放題5大推介,好食之餘又抵食,唔使再一直睇價錢牌就住叫,點每樣嘢食物之前都要用匯率計返做港幣,睇睇夠唔夠抵!

Text: Cynthia|Photo: Fion、新傳媒資料庫

大阪放題01|90分鐘任食松葉蟹新鮮蟹腳啖啖肉
推介指數:★★★★☆

大阪最標誌性的食物非蟹莫屬,每次去心齋橋、道頓堀,都會被掛在店外的巨型蟹模型吸引,好想餐餐都勁𩟔蟹!遊客最愛的蟹道樂每次排隊都起碼要一小時以上,加上套餐的限制甚多份量甚少,往往食完摸吓個肚,依然唔滿足,其實大阪尚有很多當地人愛去的蟹店,唔使排又可以放縱勁食!

位於道頓堀的蟹源「かに源」提供松葉蟹食到飽套餐, 分別有4個餐供選擇,按照蟹的產地及大小劃分,兩款最平價的都係來自俄羅斯,蟹腳相對瘦削,較貴的日本蟹放題價是¥6,980,最貴的阿拉斯加蟹則要¥7,980。去到日本,自然要試試當地的松葉蟹!

落完Order之後,店員隨則會送上一大份松葉蟹,每一隻蟹腳的粗度都是手指的兩倍,拿上手就可以感受到它的份量!一剪開就會見到充滿光澤又飽滿的蟹肉,肉質非常鮮嫩且多汁,完全沒有冰鮮的味道,絕對不是香港自助餐的質素可以媲美!

除了直接拆開吃外,還可以請店員送來烤爐,烤到熱辣辣地食,一次過試兩種滋味!

怕單吃蟹很容易膩,任食小吃同樣選擇多,包括燒帶子、大蜆、多春魚等,另外還有刺身及天婦羅任點任食,甚至還有章魚小丸子、餃子及燒賣,不過想回本還是淺嚐小食,主攻松葉蟹較划算!

大阪かに源
地址:大阪市中央區心齋橋筋1丁目4番3号2-3F
收費:每人¥4,980-7,980/HK$343-550
時限:90分鐘
電話:+81-(0)6-6213-3339
營業時間:12-2pm、5pm-11pm
交通:地鐵御堂筋線難波站步行約5分鐘
網址:www.osaka-kanigen.net

大阪放題02|燒肉控天堂任點任食110樣
推介指數:★★★★☆

在大阪擁有5間分店的「焼肉力丸」絕不將貨就價,強調採用的是新鮮肉,而且全部人手切肉而非機械,更可以因應不同肉類的特質、紋理來處理,透過店內的半透明玻璃,就可以看到師傅每次都是收到order,才會開始切肉。

放題一共分為兩種套餐,¥2,980可以任食82款食物,¥3,480則有足足110款,多出來的都是更優質的肉類,包括上等牛舌、厚切牛肩肉,甚至是較少地方食到的和牛大腸、牛第三個胃等,選擇之多,可以完全滿足愛吃肉的人!

必點的「名物四種組合」有齊最優質的4款肉,骨間肉、厚切牛肩肉、厚切牛腹肉及厚切隔腹肉,油脂分佈恰到好處,吃起來肉味濃郁肉質柔軟,雖然沒有到入口即化,但愈咬肉香味愈突出愈香!

除了肉類還有多款熟食及小食,包括炸雞、冷面、沙律等,飯後甜品同樣不可以錯過,芒果聖代賣相超吸引,如果已經很飽了,記得只點一份跟朋友分享,千萬不要浪費食物!

焼肉力丸
地址:大阪市中央區心齋橋筋2-1-32 ISビル4F
收費:每人¥2,980-3,480/HK$205-340
時限:120分鐘
電話:+81-(0)6-6211-7719
營業時間:星期一至六 4pm-3am、星期日及公眾假期 4pm-12am
交通:地鐵御堂筋線難波站步行約3分鐘
網址:www.handafood.jp

大阪放題03|平食貴價燒海鮮鮑魚蟹膏暢快食
推介指數:★★★☆☆

香港近年掀起了磯燒風,去到大阪,自然就要試試用當地食材的正宗磯燒!位於道頓堀的「磯焼き 浜キチ」相當易找,店舖門口看起來很搶眼,120分鐘任食任飲的放題套餐只需¥3,980/HK$274,價錢吸引。

吃任食最在乎的就是能不能回本,它的貴價食材非常多,原隻活鮑魚、海螺、蟹膏、帶子、大魷魚等,另外還有厚切三文魚刺身、吞拿魚、鯛魚等,要回本絕對無難度!

其中以燒蟹膏最高質,蟹膏的味道超濃郁又完全不會腥,比近期韓國大熱的即食蟹膏更抵食!

吃太多海鮮想換個口味,首推用錫紙包著的燒露荀,店家加入了一小片牛油,吃起來帶有淡淡的牛油香氣及蔬菜的清香,十分解膩!

唯一扣分的地方,就是蝦腸沒有處理乾淨,無論是燒烤還是吃刺身,口感都欠佳,如果不是特別喜歡的蝦的話,就盡量不要點。

想吃放題套餐的話,注意店內規定要滿4個人才可以點,但就算單點也不會覺得心疼,因為全店的所有食物都是均一價¥300!如果你是小鳥胃又不想勉強自己吃太飽,單點的話相對會更划算。

 

磯焼き 浜キチ
地址:大阪市中央區難波1-8-20
收費:每人¥3,980/HK$274
時限:120分鐘
電話:+81-(0)6-6213-3611
營業時間:3pm-3am
交通:地鐵御堂筋線難波站步行2分鐘
網址:r.gnavi.co.jp/8d4m6g5f0000/

大阪放題04|超人氣排隊小店必試高質涮涮鍋
推介指數:★★★★★

日本的居酒屋是很多當地人聚會之選,「個室居酒屋 地酒×寿司 食べ放題専門店 うおかつ 天王寺店」是間一定要預約才可以吃到的小店,任食價錢以時間計,2小時¥2,700/HK$186,3小時則是¥3,300/HK$227,食物的種類極多,涮涮鍋當中以「三元豚鍋」最吸引,豬肉肉質非常彈牙不油膩,好吃到會忍不住一直涮!

其餘的溫泉蛋沙津、玉子燒、烤魚等都誠意十足,最令人驚喜的明太子居然是原條上,比坊間一小份的明太子就極貴相比,吃起來非常過癮,但份量太多吃一半就會覺得很鹹,如果可以配飯的話,單一條已經可以吃十碗飯了!

 

個室居酒屋 地酒×寿司 食べ放題専門店 うおかつ 天王寺店
地址:大阪市阿倍野區阿倍野筋1-2-17巴ビル3F
收費:每人¥2,700/HK$186(2小時)、¥3,300/HK$227(3小時)
時限:120/180分鐘
電話:+81-(0)6-6624-7772
營業時間:5pm-12mn
交通:地鐵御堂筋線天王寺步行3分鐘
網址:uokatsu-tennouji.owst.jp

大阪放題05|生蠔蟹腳無限食 一次豪歎兩個鍋
推介指數:★★★☆☆

去食放題最怕食物選擇不夠多,食一round就食厭要投降。位於道頓堀知床漁場一次有齊「蠔」及「蟹」兩款港人最愛食材,料理的方法多樣,唔怕你食太多,最怕你食不夠!

而與蟹相比,蠔的質素相對更好,重點戲蠔鍋裡的生蠔數量不少,雖然不算大隻,但非常飽滿蠔味濃,一咬就會爆蠔汁,令人驚喜!

生蠔是由料理師即場處理,保證新鮮,一吃進口就是濃濃的鮮味,好食到想直接叫一打!除此之外的燒蠔、酒蒸蠔、炸蠔、牛油烤蠔等通通在水準之上,平時鍾意食生蠔的話一定會大滿足!

 

而蟹腳相對比較瘦削,加上店裡是煮好再冰鮮雪藏,鮮味相對來說較弱,做成蟹鍋味道一般,反而燒蟹、蟹沙津等的味道反而不錯。

知床漁場
地址:大阪市中央區道頓堀2-4-7 プランドール道頓堀6F
收費:每人¥5,980/HK$412
時限:120分鐘
電話:+81-(0)6-6211-0566
營業時間:5pm-12am
交通:地鐵御堂筋線難波站步行約 2 分鐘
網址:r.gnavi.co.jp/fmhmaxrt0000/

延伸閱讀:平均每人$500/晚!香港人遊大阪必試和風溫泉酒店!

簽賬即享1蚊1里加抽獎送機票!全新DBS Black Card信用卡優惠即睇詳情!

成功申請DBS COMPASS VISA即送你ELLE Vortex 24吋鋁框行李箱,詳情按此!

延伸閱讀:東瀛遊殺入大阪開酒店|$950/晚起 免費宵夜放題+啤酒清酒任飲+Wi-Fi蛋

最新吃喝玩樂資訊