「 過大海 」食餐飽@Dining娜
有friend喺外地返香港要諗帶佢去食乜，平時同朋友gathering又要諗去邊度食，搞到有時大腦、胃口一齊hang機，唔知食乜好。所以呢，啱啱個weekend就同幾個朋友「 過大海 搵食」，relax下度下假，順便搵下澳門有乜嘢好食。無論去邊度旅行，都係搵食大過天，平貴唔緊要，最緊要好食。而澳門可愛之處，就係無論食定住，都有大把選擇。今次我哋就選擇住皇都酒店，見佢位置幾好，近大三巴，離碼頭亦唔遠，夠晒方便。
咁啱呢排銀聯卡做緊promo，好多間澳門食肆都有簽賬優惠，當然要精選其中幾間試下。所以，澳門有乜景點啊、買咩手信啊，離不開官也街、英記餅家，唔多講啦，講番我強項，食！呢個2日1夜小旅行，主要想試比較正宗嘅葡國菜，由本島食到去氹仔，食咗唔少好嘢，連皇都酒店嘅餐廳都試埋，仲幾有驚喜添！等我一邊回味，一邊介紹番啦。
佛笑樓3
齋睇個名，唔知佢同「佛跳牆」有無關係，但幾肯定至少有3間舖啩？出發前，我就用銀聯高端卡嘅全球訂座熱線book咗氹仔呢間試下。睇佢嘅介紹，原來個brand有百幾年歷史，仲要主打葡國菜，真係估你唔到。最正係個非洲雞同咖喱炒蟹，雞應該係烤過，食得出外脆內嫩，個醬又惹味，一流。後者亦係正斗，咖喱夠濃、蟹夠鮮甜，食上癮啊。
澳門氹仔地堡街181-185號地下（顯示地圖）
電話：（853）2882 5257
澳門氹仔林記燒烤
唔好俾佢個名fake起，因為佢雖然叫「氹仔林記」，但其實唔喺氹仔，而喺黑沙環新街近勞動節大馬路嘅地舖。你會奇怪食燒烤嘢有幾特別？一來澳門少呢類BBQ餐廳，二來佢除咗火候十足、粗豪香口嘅烤豬牛羊，居然仲有精巧嘅小菜，呢樣係相當驚喜。
黑沙環新街298號海濱花園第八座C舖（顯示地圖）
電話：（853）2845 3615
皇都酒店
花道葡萄牙餐廳
既然住得皇都酒店，當然順便試埋佢自家嘅餐廳。呢間花道餐廳裝修好前衛清新，菜式反而係幾正宗嘅傳統葡菜，咁嘅matching十分有趣。最正係餐廳會因應唔同料理，為客人推薦相應嘅餐酒，美酒配佳餚，真正係食到最好。
