有機? 區區有伏中

健康

廣告

撐本地有機菜,都要識得揀,咪以為豎個牌寫「有機」就係正菜。香港有機資源中心的年度《濕街市商販有機蔬菜及水產銷售實況調查》的結果剛出爐,他們走訪87個濕街市共425個菜檔,發現北區、荃灣區、港島東區及南區都是疑售假有機菜的黑點,其中在北區3個濕街市的抽查中,聲稱賣有機菜的菜檔全部只口述或手寫「有機」二字,但無展示有效證明。正所謂口講無憑,你信就笨!

不過中心提醒,貼有證明都有機會中伏,就樂富街市同大埔墟街市為例,就發現過期的證書;在沙田街市則有菜檔混雜非認證有機菜一齊賣,但好難監管,皆因現時政府仲未對「有機標籤」立法。想買有機,記者都係覺得多啲去農墟或農場,認識多啲本地時令品種同有機種植最實際。

點揀有機菜?
1. 咪信手寫牌,要有效認證標籤或證書,並留意有效日期
2. 睇清楚證書上列明該有機農場出產的菜種
3. 有機同常規菜會分開擺,避免交叉污染
4. 水耕不等於有機
5. 問下檔主,能解釋何為有機、農場來源及時令菜種等最好。