視后 Ali李佳芯 13年入行蛻變圖輯|台灣去到南極!重溫《新假期》Model 年代靚相

李佳芯(Ali)剛剛在無綫萬千星輝頒獎典禮憑《BB來了》獲得最佳女主角(視后),想當年李佳芯(Ali)未做Cable主持前,已經是旅遊記者熱門選用的Model,多次成為《新假期》的封面女郎。李佳芯唔單止同我哋上山下海,最勁甚至去過南極𠻹呀!(計起來仲早過旅遊大師兄洪永城兩年呀!)即刻同大家回顧下TVB女神初育成之路!

text:孖田|photo:新傳媒資料室

最新視后李佳芯 《BB來了》演活港媽

Ali在《BB來了》不惜自毁形象(Ali自己都咁講㗎!),七情上面由「港女」演到「港媽」,道盡新手媽媽辛酸,難怪憑此劇奪得視后之位。雖然如此,早前更傳李佳芯決心成視后甘願延遲結婚生B,但又因傳推劇可能無緣攞視后,但最終無綫都給予Ali演技的認同。在頒獎禮上,李佳芯上台逐一多謝,她說︰「我要多謝一型允豬呀!我唔係贏在起跑線嘅人,我一直都好努力靠自己,做好眼前角色,我只係知一直都要做好。」

早前Ali的Instagram超過70萬追蹤者,為答謝一眾粉絲支持,Ali都好識做,大派福利。

入無綫6年星途佳

Ali 2012年離開有線加入無綫,初期多做綜藝節目主持,曾主持《學是學非》、《搵食飯團》等節目,加入無綫短短6年,李佳芯一直機會多多,很快就嶄露頭角成為上位花旦,形象亦正亦邪而且肯捱肯搏。14年於台慶劇《名門暗戰》中,飾演岳華情婦開始嶄露頭角。

自《名門暗戰》之後,李佳芯多咗好多拍劇機會,好似《倩女喜相逢》、《潮流教主》、《巨輪II》等。Ali喺《巨輪II》入面畀吳岱融大鬧「臭雞」(臭妓女)令唔少人都為Ali覺得唔抵,而呢一套劇更令Ali演藝路更上一層樓;至到16年《律政強人》,Ali第一次擔正電視劇女主角。

《踩過界》入面Ali飾演法官,不過夜晚就放低嚴肅身份,經常蒲夜店做豪放女。

李佳芯喺《BB來了》豁出去演「港媽」唐恬兒,七情上面演活由女強人因有意外有咗而表現出做準媽媽的不安心情,獲網友激讚!

重溫李佳芯 多次上《新假期》封面

Ali加入無綫之前,可能大家未必記得她曾經是Cable藝員,當年亦都在旅遊記者界頗出名,經常跟《新假期》出trip,出名肯捱肯搏好相與,同《新假期》上山下海的經歷,由台灣、日本,去到意大利、澳洲、斐濟,最勁仲去埋南極!以下的封面同內容,眼利網民又記唔記得先?

01|當Model第一次 走勻全台灣影婚照(2005年)

13年前的Ali剛投身Model界(當年𡃁模呢個term仲未出現!),還未做有線主持,第一次同《新假期》出Trip,人生第一次的婚紗相就要走勻全台灣影。當年的妝髮造型今日睇起上來當然娘味十足,不過當年唔興過分的Photoshop、唔興假眼睫毛和大眼仔,Ali 靚樣同今時今日差唔多,證明靚樣真材實料啦!

攀山涉水擺甫士

影過婚紗相的人就知,靚相一般在兩日內瘋狂影晒;Ali在拍攝期間要著住婚紗攀山涉水、公路狂奔:爬上台南的七股鹽山、在青青農場拍攝薰衣草和野花遍地的場景,在38度高溫及長期暴曬的折磨。

當年的記者憶述,拍攝當日台北天氣驟晴驟雨,拍攝團隊只好躲在車內,待雨停時Ali立刻跑出車影,影不到兩三張又下雨了,又要躲起來。如是者,跟天公玩足一整天躲貓貓。Ali都以專業態度面對,第一次出Trip,其實好難得!

翻閱2005年的陳年舊雜誌,當年記者好鍾意寫詩,而影相的攝影師亦好鍾意Model頭戴一大朵花(利申那位是台灣婚攝公司的攝影師)。

02|天寒地凍 沖繩追櫻(2007年1月)

為了向廣大的讀者報道日本的櫻花情報,本刊記者往往要帶同Model 提早出發。去完台南的1年半後,Ali跟《新假期》記者2007年1月出發到沖繩,在短短5日拍攝時間內要影櫻花、又要影海邊Resort。當年的記者指,那時候Ali已經是模特兒界的女神,但過程雖然辛苦捱凍,一樣好影無架子有交帶。

春寒扮初夏 背心短裙頂硬上

1月的沖繩還是冬天,只有10度的低溫,但為了畫面好看,拍攝時全程要穿上春裝,背心短裙,女神一樣拍心口頂硬上,抵讚!

白滑背脊第一露!

要知道旅遊記者去一個Trip唔只返一隻稿,當年1月已經要去影Resort,你估下呢間無人曬太陽嘅Resort,當時有幾咁凍?就係咁,Ali首次露出了白滑背脊畀《新假期》同廣大讀者。

Follow Ali to…

去到海邊resort,蔚藍海岸耍脾氣,時晴時雨,大風,陰陰涼,女神毫不扭擰,要著bikini落水永不say no。最正係去到海邊,攝影師為滿足親近女神慾望,情不自禁,影了一大堆拖住著得性感嘅Ali女神隻手踏浪呀,咦,拖手相,咪仲早過instagram手拖手遊世界的 #FollowMeTo 情侶Murad Osmann!

03|無P圖!早過男神勇闖南極(07年11-12月)

翻查資料,當時的Ali未做主持,但當時在model 界她都多見報,算搶手貨。原來女神仲早過洪永城兩年去南極拍攝(編按:洪永城在NowTV年代曾以幕後身份,與黃貫中前往南極拍攝《一個地球》),係咪威先!

辛苦捱到去極地

咪以為去極地就好爽皮,其實要坐足兩日半的飛機,由香港飛荷蘭落阿根廷,幾乎環遊全球,然後再捱30個鐘的船程⋯⋯聽到都想準備嘔吐袋。坐郵輪入南極,大浪到有如坐足兩日海盜船,而且南極天氣變幻莫測,能否如期登岸也需聽天由命。所以,女神每日就像飛虎隊般,隨時候命。

自備企鵝拍Selfie

去南極當然想睇企鵝,但為保護牠們,規矩講明必須跟企鵝保持最少五米距離,以免影響企鵝的生活。唔知係咪女神太靚(定手上的企鵝公仔?),對人類已沒有戒心的企鵝們也會自動走近,又或乖乖站在附近任影唔嬲。

陰公!出場少過企鵝

揭番當年本雜誌,今次南極之旅Ali出場位主要在封面,文中幾乎只有冰山大相同企鵝相,當同船嘅大陸客都有full page赤祼照一大張,Ali只獲得細碎行行企企食飯典床版面,好在呢輯相出土了,否則政府圖書館都睇唔番!

04|終極一脫 三點式玩斐濟(09年)

雖然Ali 沒有好似一般𡃁模出寫真集,平日出席大台活動都鮮有走性感路線,不過09年女神其實一向不介意健康性感,和《新假期》去斐濟時,就大晒Bikini +長腿。

又到揭雜誌時間,斐濟出名陽光海灘,配上Ali同樣燦爛的笑容,你估下呢張拋花球青春少艾相出咗幾大版?

05|跟水哥達人遊澳洲(09年7月)

2009年的Ali 已經成為有線主持,主持《體育王》,被網友追捧為「體育女王」,知名度已大大提升;《新假期》難得就到檔期邀請李佳芯去斐濟,同一個Trip順便Part埋飲食達人紀曉華Walter Kei,去埋澳洲塔斯曼尼亞歎世界食好西。

當時去採訪的旅遊記者回憶,話說採訪塔斯曼尼亞東岸蠔場時,位處南半球的塔斯曼尼亞正入冬,到訪之時白天只有8-10℃,天寒地凍,Ali 和紀曉華都要著上「賣漁勝」裝束落水。咁嘅情況下正常人都會嗌凍,但當時人氣已不俗的Ali 毫無嗌辛苦怕凍的,震住都快手開工。

06|意大利慢食、揸靚車之行(08年5月)

跟住《新假期》出Trip,真係為女神帶來好多難忘的時刻,好似08年的意大利都靈、五漁村之旅,女神就連續兩星期登上《新假期》封面。

今次意大利之旅,Ali跟著記者採訪拍攝Alfa Romeo的四天古董車托斯卡納豪華自駕遊,當年都索價2千歐羅!不過坐在經典的Alfa Romeo Spider 1600老爺車,駛過一片片鮮黃油菜花田,穿梭於一字排開的柏樹之間,享受頭髮被風吹起的感覺⋯⋯好屈機呀!

意大利的五漁村(Cinque Terre)近年成為亞洲人的熱門之選,女神當年去到,除了學習地中海人悠閒步伐,在漁村影靚相,仲有機會大嚼當地海鮮同松露。

最新吃喝玩樂資訊