Miss Hunny罕曬泳衣照竟被批「賣肉」 發長文霸氣反擊：貧窮係會限制想像

Miss Hunny罕曬泳衣照 竟被狠批：最後咪又係要靠賣肉

翻睇Miss Hunny社交網，發現她對上一次貼出泳衣照，已是在去年12月之時，今次相隔近8個月再派福利，竟引來網民留言直指她賣肉和整容：「對波個型咁怪既」、「變幻球都係魔術」、「個樣越嚟越似繪麗奈」、「唉終於！清高呢堅持呢」、「一早就應該賣啦，而家競爭對手咁多」、「挑～最後咪又係要靠賣肉呃like搵老細，波邊都露埋，好心急喎」等等。

逐一留言反駁網民：賣？你有俾錢咩？

Miss Hunny在其IG post中逐一留言駁斥網民：「咁你唔好J」、「着泳衣係cheap呀？我有話過堅持唔着泳衣咩？咁去游水着乜呀？」、「賣？你有俾錢咩？」、「唔係個個都好似你想像中咁窮，既然你覺得呢個世界咁多老細，點解你唔諗吓我阿爸都係老細呢？」等等，之後更在Facebook專程出post，以長文反駁自己無需賣肉：

我知道，
喺呢個版面上，
就算我變再多嘅魔術，
都總有一班人會繼續扮睇唔到，
繼續想像我係唔使做嘢、不學無術，
繼續誣蔑我賣肉同整容。

Miss Hunny：點解唔覺得我都係老闆？

Miss Hunny續指自己有正職、有祖蔭、有cash、冇負擔，足以「養兩隻小狼狗」，問大家「點解唔覺得我都係老闆？」

都2023年，
點解仲有人諗住女人一定要人埋單？
你冇上司係女人？
定係你阿媽嫁咗俾你阿爸之後，
從此飛上枝頭、大富大貴？
如果都唔係，
我就極度懷疑呢啲人係咪明末清初穿越過嚟…

呢個世界係講供求，
既然覺得呢個世界咁多老闆，
點解唔覺得我都係老闆？
我雖說不上家大業大，
但至少有正職、有祖蔭、有cash、冇負擔，
養兩隻小狼狗氹我開心絕對冇問題。

叫大家唔好再問「仲使唔使變魔術」

Miss Hunny又叫大家唔好以為她是因為貧窮才變魔術，因為變魔術是她畢生最大的娛樂，至於她現在正在忙甚麼，她搞笑回應：「唔通我識如來神掌又話過你知咩？」

貧窮係會限制想像，
不過都唔好幻想，
所有人同你一樣咁想靠人，
所有人同你一樣返份西工，
所有人同你一樣咁窮。

變魔術係我畢生最大嘅娛樂，
所以唔使問我「仲使唔使變魔術」之類嘅說話，
變魔術對我嚟講一啲都唔苦。

至於我而家忙乜…
你兩年後咪知囉，
唔通我識如來神掌又話過你知咩？

網民大讚霸氣：係貧窮令到佢哋想像

在Miss Hunny發出長文後，網民都紛紛大讚她好霸氣，並表示：「加油！唔好理會的hater，世界總有人喜歡你，有人不喜歡你！」、「酸民食咩都係酸㗎」、「咁都叫賣？而且人哋有正職」、「係貧窮令到佢哋想像，想到過曬龍」、「口賤當有趣嘅完美演繹」、「睇咗你咁多年，真係唔覺得有邊度整過」等等。

獲張遨揚邀拍戲 Miss Hunny：行得喇喎！

曾製作電影《一秒拳王》及ViuTV劇集 《和解在後》的監製張遨揚，亦在Miss Hunny的長文下留言力撐她：「其實我從來都係欣賞你啲魔術同片，早年有曾經諗過一部魔術題材嘅電影，本來想搵你傾傾。」Miss Hunny即回應：「喂！行得喇喎！」看來好快會有新片推出。

睇埋Miss Hunny同網民嘅對答：

去年底無懼寒冷天氣照著三點式

去年12月，Miss Hunny無懼天氣寒冷，與一眾KOL去了海洋錢園的水上樂園玩水，其中有微辣的霍哥、雞Wing、熊仔頭的Me姐等。其中焦點之一便放在Miss Hunny穿著的三點式泳裝上，她做出不同的姿勢擺出多個不同誘人的動作，相當吸睛，她寫道：「每一張美照背後都得來不易…我縮肚縮到就嚟斷氣」。

霍哥搞破壞

另外一個焦點便放在Miss Hunny相中背後的男人，近乎每一張照片中也有霍哥和雞Wing的醜態樣出現，令照片的唯美度下跌不少，Miss Hunny也忍不住寫道：「你哋可唔可以行快啲？」

Miss Hunny靠瑜伽修身 否認係女神「我連花瓶也當不上」

前幾年Miss Hunny出寫真，網民意見多多，近年她成功修身進化，於30歲前有感而發，發表「花瓶論」：

15年前：「我不要當花瓶😠」
8年前：「哈哈！我只是個花瓶🤗」
現在：「我連花瓶也當不上🤦🏻‍♀️」

Miss Hunny：做花瓶要「美麗又空心」

Miss Hunny派發靚相的同時，強調 「當花瓶可是有門檻的，首先『美麗與否』這條件已經極具爭議，更莫說『美麗又空心』」，又表花瓶有個「門檻」要夠安靜：「我想大概沒有人會期望，一個青花瓷器會播heavy metal吧！高高在上如阿拉丁裏的茉莉公主，從小接受皇家禮儀、教育，也未能做到「speechless」，更遑論我此等凡夫俗子。」講咗咁多，網民都係以「好索」回應，咁就不如睇返佢嘅靚相先：

Miss Hunny十年後終於找數？！

有網民就重提Miss Hunny十年前同司徒夾帶所拍的「啤牌超人」影片，笑指她「10年後終於找數！」只見片中司徒夾帶開到聲叫Miss Hunny「找數」話：「上次你話除件衫㗎嘛，你除咗條褲，啲人話你冇找數，話我走數呀！」更指網民因為她「走數」而罷睇他的Channel，但最終Miss Hunny也只是擰轉身，背對著鏡頭除Bra，之後更拉上外套拉鏈，當時她解釋因為有好多「道德L」指責她著得太暴露，所以她最終決定「一啲肉都唔畀你哋睇」！

其實睇到影片5:08，Miss Hunny都有出到條線畀大家睇！