黎明騷前傳滯銷現場至少7成滿 金句王寒冷警告下講來年願望

貴價$13,000門票銷情理想

黎明開騷前曾傳出滯銷的情況，騷前一日網上出現大量劈價至$500的門票出售，更有黃牛以「下次買飛有折」作招萊。不過在開騷前現場所見，全場位置約有7成滿，而最靠近台前、高達$13,000的車輛門票位置就幾近泊滿，當中有不少都是林寶堅尼、法拉利等名車。

是次個唱黎明與國際知名時裝設計師Vivienne Tam合作，二人早於1996年結緣，當時黎明到紐約為《情深說話未曾講》拍MV，在朋友介紹下欣賞Vivienne Tam在當地舉行的時裝設計表演而相識。

黎明化身「原振俠」

黎明在時裝騷後登場，於寒冷天氣警告生效下在海傍開騷，期間曾出現甩嘴情況。黎明唱出多首經典歌曲包括《願你今夜別離去》、《那有一天不想你》、《眼睛想旅行》等。

演唱會以時裝為題，黎明亦有特地介紹身上的皮褸，透露是1990年代拍攝《原振俠》時的戲服，更指外套的鈕扣已經變黑，需要用擦子膠擦白：「所以我相信fashion同歷史都有關係。估唔到件褸都頂得住啲風！」

金句王發功

身為金句王的黎明，在獻唱完多首作品後，走到延伸台，前方車輛門票的觀眾都跑落車圍到台前靠近黎明：「大家保重，大家身體健康，樣樣開心，事事順利。我諗倒數我哋唔會係埋一齊架喇，但我講定倒數後嘅新年願望，新嘅一年2023年，總之你哋心裡面諗一樣嘢，做到七成，好無呀，唔好十成十啦，無十全十美架嘛，做到一半以上已經好好架喇，繼續努力。」

黎明續謂：「新嘅一年俾少啲籍口自己，多啲去做自己可以能力勝任嘅工作，好嗎？好快到Christmas啦，Merry Christmas。就到農曆新年啦，我可能陪你唔到啦，但我係香港喎，恭喜發財啦，講晒架啦。好快到復活節啦，有復活蛋食，之後好快又到暑假，有機會去沙灘時聽下呢首歌啦，聽下歷史歌，《Sugar In The Marmalade》。」

欣宜、王丹妮做嘉賓 「星夢」拉大隊撐場

鄭欣宜昨晚才剛擔任完ERROR的嘉賓，今晚又為黎明踏台板。到場睇騷的嘉賓有林夏薇、林淑敏、麥秋成與湯怡夫婦、時裝界的譚燕玉，還有一眾《聲夢傳奇》的學員姚焯菲、詹天文、林智樂、潘靜文、文凱婷等。

演唱會前段是由Vivienne Tam主理的時裝騷，早前為黎明新歌《一生幸福》拍MV的王丹妮在時騷的尾段現身，唱出Lady Gaga的《Born This Way》和王菲的《螢火蟲》，但主要為了黎明而來的台下觀眾反應不大。