黃心穎新劇扮女僕又做PTGF 倉底遺作《堅離地愛堅離地》出土

原文刊於《東方新地》

黃心穎新劇扮女僕又做PTGF

個個都話香港觀眾有樣好，夠善忘，19年尾無綫將《牛下女高音》、丫鬟大聯盟》逐套解封試水溫，夾好時間，黃心穎都同期喊住回港，兼夾領養唐狗博洗底，一年過去，黃心穎去到邊仍然是吸嬲嬲磁石，最近亦頻頻傳將於短期內與無綫正式解約，而其最後作品《堅離地愛堅離地》安排於周一（12月28日）重見天日，timing夾得啱啱好！在劇中，黃心穎孖裕美等扮女僕，唔知觀眾buy唔buy！

龔嘉欣、張振朗首擔男女主角之作

其實又唔使下下將焦點放喺安心女主角身上嘅，17年拍攝嘅時裝愛情科幻喜劇《堅離地愛堅離地》實情張振朗、陳智燊、龔嘉欣同劉佩玥至係男女主角，龔嘉欣同張振朗更加係第一次擔正女一男一。劇中靚仔慣嘅張振朗當年瞓晒身做晒功課都係為咗演好IT毒男丁信希一角，邊拍邊話對呢套劇期望好高，本來安排好19年4月播出……你懂的，結果去年尾變咗炮灰海外首播囉，等足一年，終於可以喺翡翠台播出。