金宵大廈2｜ 麥明詩建議聘演員「represent 返自己種族」 舊愛林作直線抽擊

TVB道歉：無意不尊重任何國籍

不過黃婉華日前就被法新社港台澳主管Jerome Taylor指責，塗啡皮膚涉及歧視，有在港的華裔菲律賓籍模特兒覺得，黃婉華對外傭極不尊重，行為非常惡劣（appalling）。TVB當晚回覆傳媒，稱讚黃婉華演技精湛，成功刻劃出角色，而「姐姐」單元旨在講述家庭傭工與僱主之間的情節：「本台強調絕無意在任何節目中表達不尊重或歧視任何國籍，並向任何可能受此事影響之人士表達歉意。」

麥明詩建議改埋劇本遷就演員

一向有「國際視野」的港姐麥明詩亦有一套睇法，她在IG說近年外國有好多製作都選擇「忠於角色」（true to character），用華人演員演出華人角色，令梁朝偉都有機會到荷里活發展：「香港如果能夠俾多啲機會少數族裔演出，represent（代表）返自己種族，而唔係由另一個種族去represent，唔係更好咩？」又指如果找不到講純正廣東話的菲律賓演員，可以將角色改做印傭，再去物色印尼演員。

林作：唔通林作就要搵林作扮咩。

麥明詩前男友林作就唱反調，認為TVB「完全不應該道歉，甚至應該理直氣壯地解釋。」林作以Netflix英倫古裝劇《柏捷頓家族：名門韻事》（Bridgerton）做例子：「睇唔落係因為我認為黑人冇可能喺當時出現並成為英國上流份子，因此我無法代入個戲嘅劇情。英文叫做not believable.」早前TVB劇集《愛‧回家之開心速遞》角色「佐治」，就明顯參考林作的招牌蓬鬆髮型及認叻個性，林作亦有借「佐治」做證說：「唔通林作就要搵林作扮咩。」

（圖片來源：IG@jolamchok）

網民返炒麥明詩演過視障人士

網民今次唔多支持麥明詩，有人直接指出她曾在劇集《殺手》中演過視障人士，反晌麥明詩：「唔係佢當年不如唔好演盲人，揾失明人士演一定好過佢呢？」，同類情況還有：「死屍就拖條屍出來嗎？」、「咁發哥演英雄本色係咪真係要打跛隻腳，華仔演盲探係咪真係要整盲雙眼？」、「所有警匪電影或電視劇，應該要搵真警察同埋真匪徒演出？」。網民又比較黃婉華與麥明詩的演技，「我菲傭姐姐都覺得佢演得好喎」、「麥明詩知唔知咩叫演戲？雞蛋裏挑骨頭。」

盤點7位演外傭出位藝人 有位男星同樣被投訴「種族歧視」

1/姜麗文扮外傭攞女飛躍！

女星個樣生得似外傭姐姐原來都係一種優勢，姜麗文憑在《愛·回家之開心速遞》中扮演菲律賓外傭Liza一角，以菲式廣東話演得入型入格，她指為演好角色，去搵真姐姐請教，更參加工人姐姐生日會去融入當中﹗憑角色攞到無綫「飛躍進步女藝員」獎時更特意多謝工人姐姐教路﹗

2/「東涌羅浩楷」利愛安 係姜麗文「同鄉」

被封為「東涌羅浩楷」的落選港姐利愛安（Kirsten），之前亦獲無綫安排加入處境劇《愛·回家之開心速遞》劇組，孖住姜麗文一齊扮演外傭姐姐，二人的「同鄉」組合令網友都大讚扮得勁神似！

3/江欣燕演Maria開啟扮嘢之門

講演外傭鼻江欣燕一定是鼻祖，她在《歡樂今宵》演的外傭Maria，戴上假曲髮，誇張化妝，以半鹹淡廣東話引人發笑，角色深入民心，從此成為大家的集體回憶，江欣燕更指從此開啟了她扮嘢之門。

4/《寶寶大過天》朱斐斐幾乎素顏

在《寶寶大過天》飾演岑麗香家中工人姐姐的Siti，一出場以半鹹淡廣東話，被大讚演得好似真外傭，飾演Siti的朱斐斐為角色犧牲大：「除了粉底、唇膏好似乜都冇化，真係素顏朝天，勇氣可嘉﹗」朱斐斐是2012年參加藝訓班，入行近十年發展不順利，在《寶寶大過天》演外傭才為人認識﹗

5/鄧紫棋體驗做印尼姐姐

2012年GEM鄧紫棋為其YouTube頻道拍攝一系列「秘撈Tour」其中一集體驗做印傭，打扮成印尼姐姐，在家做家務好辛勤，又跟真姐姐周日去跟同鄉聚會，一起坐地開餐同跳舞，不過交流期間就被真姐姐指鄧紫棋點扮都唔似印尼姐姐﹗

6/王浩信反串被投訴涉種族歧視

2014年王浩信為保險公司拍攝電視廣告，一人分飾幾角，其中推介外傭綜合保險時，他一人分飾男主人及女外傭，當扮演外傭時叫Maria，戴上厚曲假髮，塗黑塊臉，不停做錯事被男主人責備﹗廣告出街，有外傭組織批評王浩信反串演外傭涉種族歧視，及作出投訴，要求公開道歉，最後該廣告在公司網頁上落架﹗

7/劉青雲做賓佬得啖笑

劉青雲在《絕世好賓》中由離職警探做卧底扮賓佬，受聘梁詠琪父親，化身梁詠琪的菲籍保鏢及司機協助，過程笑話連場﹗