魏浚笙
魏浚笙

ISWIM|Jeffrey魏浚笙甩褲游水「露鳥」搶鏡 Do姐揭肌男背後軟弱一面

影視娛樂

廣告

魏浚笙(Jeffrey)近日正在ViuTV新劇《ISWIM》中擔正做主角,日前他上商台節目《口水多過浪花》接受Do姐(鄭裕玲)訪問,大講拍《I SWIM》時的趣事,又講到他入行兩年以來的目標,竟然係想做到同阿正一樣咁放!

魏浚笙 Jeffrey在第二集孖煙囪上陣落場游水。
Jeffrey在第二集孖煙囪上陣落場游水。(圖片來源:《I SWIM》劇照)
魏浚笙 結果勁蝦碌。
結果勁蝦碌。(圖片來源:《I SWIM》劇照)
魏浚笙 仲水中「露鳥」博到盡!
仲水中「露鳥」博到盡!(圖片來源:《I SWIM》截圖)

即睇片重溫

魏浚笙Jeffrey 自覺諗嘢似小朋友

原本做開硬照Model的Jeffrey,自2020年參加ViuTV節目《調教你男友》後正式入行,他在訪問中直言入行兩年以來自覺好幸運,因為有好多機會去試不同的範疇,包括拍綜藝和拍劇,在《膠戰》仲有機會唱埋歌。至於係咪由細到大都有好多人讚他靚仔?Jeffrey就話:「街市嗰啲就有,我成日去街市買嘢,好多姨姨叔叔都話:『靚仔!要唔要?』其他人有冇咁講又唔係好覺。」

魏浚笙 Jeffrey笑言由細到大得街市啲叔叔姨姨會叫佢靚仔。
Jeffrey笑言由細到大得街市啲叔叔姨姨會叫佢靚仔。(圖片來源:FB@口水多過浪花)

唔想被人話「得個樣」

Jeffrey自言唔覺得自己靚仔,只係覺得自己幾Cute:「因為我諗嘢、做法都好偏小朋友,到依家都係,私底下我都係一個會𠱁媽咪、𠱁女朋友嘅人。」但他表示自己在入行後有成熟咗,對自己做嘅嘢係高要求咗,希望有時做得唔好,下次可以做得更好。Jeffrey又話自己從來都冇講過自己係一個靚仔:「其實人哋讚我靚仔係一定開心,但有一個位會去到我無論做咗任何努力,啲人都會覺得我『得個樣』,所以我會希望啲人可以睇我耐少少,或者睇得深入少少。」

23歲新晉鮮肉魏浚笙Jeffrey與Edan合作新劇《I SWIM》
Jeffrey指拍《調教你男友》時自己仲係一個讀緊書嘅素人,嗰時覺得有一個節目竟然可以同女朋友一齊上,咁就上囉。(圖片來源:IG@jeffreyngai)

想做到阿正咁放

Jeffrey又透露自己在拍《IT狗》前,就跟彭秀慧老師上了Acting Class,同Dixon是同學:「嗰時我有問彭秀慧老師,話我好想做到阿正嗰啲感覺,即係我有時好想好放咁去做嘢,想問點解我做唔到?」Do姐問他點解唔做一個內斂些的演員?Jeffrey答:「因為我成日覺得我一內斂,啲人就覺得我有偶像包袱,我就會覺得啲人未了解我!」

《膠戰》在呂爵安Edan、岑珈其、Jeffery魏浚笙)、Hilary劉沛蘅)、阿正黃正宜)合稱6膠,每集分組玩遊戲,輸了接受懲罰,看似無聊的遊戲,每集都令人棒腹大笑﹗成功在疫情下贏口碑,反映熱烈,第二輯《膠戰S2》 即將推出﹗幕後團隊親爆湊夠6膠的原因,揭鮮為人知內幕,大談《膠戰》在低成本高創作綜藝節目如何成功,全靠公司肯放手,不墨守成規﹗
《膠戰》Edan、岑珈其、Jeffrey、Hillary、阿正和肥腸合稱6膠,Edan笑言希望《膠戰》能成為長壽節目,長做長有,並指拍攝時當去玩!(圖片來源:ViuTV)

面對唔熟嘅人會好靜

Do姐話大家對Jeffrey的評語都係「佢好靜㗎喎!」Jeffrey就話有研究過自己:「我發現我同人唔熟嘅時候,同埋我驚嘅時候,我就會靜,因為我會唔知講咩,比較慢熱,但係我一熟咗就會唔同,好似我上Acting Class嗰時,一開始同啲同學、Dixon佢哋都唔熟,但到咗第五、六堂就會嚟料,開始好多嘢講、好多廢話!」

魏浚笙 男神Jeffery唔止受女觀眾及網民歡迎,女主持阿正都對他心心眼。
Jeffrey話自己諗嘢其實好負面:「不過因為我本身諗得差,出到嚟冇咁差,我已經覺得OK,所以我覺得我呢個心態係幾好!」(圖片來源:IG@jeffreyngai)

讚袁澧林係好對手

講到《I SWIM》播出後,有好多人讚Jeffrey做得好,Jeffrey笑言好開心可以受人肯定,也令他覺得Acting Class十分有用:「你話好實質學咗啲咩,我又好難講,因為我都仲係資歷尚淺,所以我做戲要好睇對手,如果對手好投入,咁我就會好投入。」講到令他有這個感覺的對手,他第一個就話係袁澧林(Angela),之後又補充說:「Edan都有,其實《I SWIM》我覺得成個團隊都有,因為我覺得大家都係好想去做到一件好青春嘅事,所以大家都係一個好投入角色嘅狀態去做,所以有時會自己即興加對白,令演出更加好笑!」他又指Edan、Stanley本身都唔係太鍾意游水,特別Edan連沖涼都要眯晒眼,但佢哋都好專業,接得都會盡力去做。

魏浚笙 I SWIM i.swim iswim 吳海昕 袁澧林扮學生妹獲網民大讚好青春。
Jeffrey大讚袁澧林係個好對手,令佢好易投入到角色。(圖片來源:《I SWIM》截圖)

導演叫佢憑感覺去做

Jeffrey指《I SWIM》是他第二個演出,第一個係《IT狗》,嚟緊仲有個《百萬同居計劃》,係同Anson Lo拍檔,講到每一個劇嘅角色性格都係唔同,比如第一個《IT狗》嘅角色,係比較認真上堂,好追求真理嘅角色,他說:「嗰時好開心聽到主要對手係珈其,事前都有驚,去問珈其應該點去做好啲?佢同導演就叫我唔好諗咁多,直做!憑感覺去做就得㗎啦,佢話新人最忌擔心得太多,好容易令到自己原本準備嘅嘢都冇晒,所以順住個勢去做就得。」

22歲的Jeffery BB魏浚笙擁有超高顏值,外表攞滿分。
Jeffrey話自己拍游水戲好有天份:「因為我係好勁,可以喺水入面擘大眼好耐,有啲人好怕水就做唔到,同埋我喺水入面係做到表情,所以一拍水底shot我就好開心!」(圖片來源:IG@jeffreyngai)

靠阿媽椰菜花飯keep fit

Jeffrey指10集《I SWIM》由8月中拍到12月頭,原本想10月中煞科,但因為個室內泳池只能夠夜晚拍,所以為咗等個靚泳池,游水戲都要11月先可以開拍。Jeffrey又話自己本身係肥仔,肚腩會打摺,胸同手臂比較易操,腹肌就要食得好清先操到,主要食雞胸肉,同埋阿媽整啲椰菜花扮飯,操咗差唔多半年至七個月先操到,拍完劇後原本完全冇諗住keep,但無奈地有幾個工作都係要騷肌,所以到依家都要一路keep住。

ISWIM 魏浚笙 Jeffrey早前勤力操肌拍劇缺游水健將。
Jeffrey話拍《I SWIM》要多謝導演:「因為呢個係以導演做原型嘅角色,所以我係好想做好佢,唔想導演睇到覺得唔係佢想要嘅嘢,而係想導演睇到會覺得返番去佢以前嘅時候。」(圖片來源:IG@jeffreyngai)

最想做一個打廿個嘅男主角

講到最想做的角色,Jeffrey就話係做一啲好有型嘅偶像男主角:「就係嗰啲女主角畀人綁架,佢就要好輕鬆咁一個打廿個,最尾入到去嗰間房就有個大佬Big Boss,好難揪嘅,要同佢揪揪揪好耐,我就嚟唔得嘅時候,一拳𢰸中咗!呢個係我嘅夢想嚟,但其他角色我都願意去試,因為我覺得每次同前輩或者同輩對戲,我都會有進步,可以學到佢哋做嘢嘅方法。」

魏浚笙 Jeffery的IG內有不少靚仔相,張張都電死人。
Jeffrey話成日覺得做戲係做戲,唔係做Jeffrey,所以戲入面唔需要靚仔,最好可以扮醜、扮流浪漢。(圖片來源:IG@jeffreyngai)

夢想開咖啡店

至於未來的計劃,Jeffrey就話想開一間咖啡店:「因為呢個係我嘅夢想,我好鍾意飲咖啡,因為飲咖啡可以去水腫,我好勁水腫,每朝都要花半個鐘去碌面,因為我有肥胖基因,呢個係天生嘅,遺傳自我阿婆,不過佢已經走咗,我媽咪都有遺傳到,但佢行山行得好勁,所以都keep到好fit,我就鍾意舉鐵。」最後他又預告《I SWIM》有機會開續集,但唔知會係電視劇定電影,他笑言大家都好想拍,不過最緊要係大家都有期。

魏浚笙 Jeffery唔止要女友Evelyn暫做經理人,仲成日孖住幫客戶做宣傳。
Jeffrey現時由女友Evelyn做經理人,仲成日孖住幫客戶做宣傳。(圖片來源:IG@jeffreyngai)

Jeffrey入行兩年以來的目標是什麼?

日前Jeffrey上商台節目《口水多過浪花》接受Do姐(鄭裕玲)訪問,又講到他入行兩年以來的目標,竟然係想做到同阿正一樣咁…詳情請看

Jeffrey以什麼節目入行?

原本做開硬照Model的Jeffrey,自2020年參加ViuTV節目…詳情請看

撰文:東方新地圖片來源:FB@口水多過浪花、IG@jeffreyngai、《I SWIM》截圖資料或影片來源:原文刊於東方新地