【香港金像獎2019】四哥謝賢做人至理名言　人可風流不能下流

撰文：GW｜來源：新傳媒資料庫、TVB、東方新地

對感情態度瀟灑

四哥在數年前接受東方新地專欄【星惜天下】時講起不少自己做人哲理，其中一句最讓編輯深刻的就是「人可以風流，但不可以下流」。星惜天下欄目主持人鄭紹康（以下簡稱鄭）問四哥：以前你拍戲，會唔會有好多女明星主動追你？四哥答：唔通有好多靚菜，我要食晒佢咩？唔可能㗎嘛！人可以風流，唔可以下流。即係我同你拍拍吓拖，又出去搞搞震，咁對方會唔會鍾意你吖？唔會吖嘛！

四哥亦表示：其實我係一個好專一嘅人嚟，一個還一個，我唔係人哋謠傳嗰啲花花公子，係女人都啱。鄭：當年聽到你同拉姑離婚，好surprise、好shocking！四哥：有咩好surprise，離婚係好簡單嘅事之嘛，簽個紙咪離婚囉！其實唔離婚都得㗎，佢出去搵老公，我出去搵女朋友囉！

仲話：我心態好開通，我哋（指同拉姑）又唔係做錯事，全部係小毛病，合唔嚟，不如分開啦！我哋有一個仔一個女（霆鋒與婷婷），一條心希望培養佢哋大、等佢哋出身嘅時候，我哋先再嗌交，哈哈！

與兒女各自各精彩

鄭：霆鋒細個有冇咩調皮嘢？謝：我真係同佢唔係好熟，因為佢喺溫哥華學校係寄宿，禮拜六、日先返嚟，有時放假佢都同佢啲同學一齊玩，佢自細我就習慣佢有佢玩、我有我玩，如果有需要嘅時候大家傾。

鄭：從來冇打過霆鋒、婷婷？謝：冇，唔可以用打嚟教細路仔，如果你少少嘢都打佢，佢懷恨在心，第日打番你咪死，哈哈哈

鄭：近年同霆鋒溝通多咗，關係有冇再好咗？謝：都唔係，佢近來都係忙到我心都痛，佢時時朝早六點起身去北京，夜晚返嚟，第二朝又去第二度，所以佢返到嚟，我一定唔會騷擾佢，佢返到嚟，想休息就休息、想搵我食飯就食飯。

鏡頭前兒女私人問題點到即止

當時霆鋒王菲復合的事傳得鬧哄哄，鄭問：聽講霆鋒同王菲復合？謝：你點知係復合？可能朋友呢！佢嘅私人嘢我唔答！

鄭：你兩個孫呢個歲數最得意、好玩！謝：呢個時候最好玩，但依家咁嘅環境唔使問我啦，個個都喺報紙睇到啦！呢個天意，我哋接受嘅！

鄭：會唔會同仔女傾感情事？譬如霆鋒離婚或者婷婷拍拖，你有冇同佢哋傾吓？謝：我從來唔會擺老竇款，我做人做個榜樣，唔做錯事、唔做衰嘢、唔呃人，佢睇到㗎！

對自己有要求、勇於嘗試新事物

鄭：你身形keep得好好，係點keep㗎？謝：我係堅持人唔可以俾年齡限制，將自己keep好啲，自己都舒服嘛！成日恐懼老乜都唔做得？假嘅！我依家乜都做到，我嗰日同霆鋒去內蒙，我仲揸沙漠車，好過癮，依家我仲想跳Bungy Jump，如果我死喺嗰度，嘩，幾過癮呀！

鄭：相處得非常愉快？（指今次二人相隔29年一起去旅行）謝：依家仲唔愉快等幾時？就嚟嗰頭近啦！

實至名歸

在影藝圈縱橫67年終獲得電影終身成就獎，實至名歸。恭喜四哥獲獎之餘，其實四哥瀟灑的生活態度也值得學習，堅持自己的做人理念，風趣幽默也要謹記及時行樂。