陳嘉倩晒「𠝹波安全帶」吸睛 微辣霍哥留言：我幫你整返好條安全帶先

文：東方新地 ｜圖：陳嘉倩IG、「微辣」霍哥IG、新傳媒圖庫

「𠝹波安全帶」騷quali

宅男女神陳嘉倩近年成功由無綫新聞小花轉型做KOL，不時喺IG放相放片冧粉絲。日前陳嘉倩喺IG上載同教車師傅嘅合照，留言：「收工未呀？兜埋你丫」。相中陳嘉倩下身著咗條短裙仔，上身配上跌膊衫大騷香肩，十分誘人，但網友嘅焦點落晒去佢條安全帶度，事關陳嘉倩配帶嘅「𠝹波安全帶」，成功將佢姣好身材表露無遺，不過可能安全帶太緊搞到個Bra出現「走位」情況，就連「微辣」霍哥都好有心速速提醒：「我幫你整返好條安全帶先。」之後陳嘉倩亦好識做，大讚霍哥做「細心霍」回禮。至於網友們喺佢IG都紛紛留言：「我要做條安全帶」、「好正，引死人咩」、「我第一次想做教車師傳」、「又要J」等等，陳嘉倩封得做宅男女神果然名不虛傳！

陳嘉倩黑面擺款恰新人

有報道指嘉倩BB日前拍攝新廣告，被自稱是死忠粉絲的工作人員爆料，指對現實中的女神大失所望，被她的港女舉動嚇親，更力數嘉倩BB黑面、蝦新人、阻路、臨場拒拍同趕收工5宗罪！爆料指陳嘉倩與新人黃以諾早前合作拍廣告，因黃以諾頻頻NG，等埋位的嘉倩BB即翹埋雙手，黑口黑面狂啤對方，表現極不耐煩！又指陳嘉倩補妝期間旁若無人，全程站在行人通道正中間，阻礙其餘兩位演員綵排。到正式埋位，陳嘉倩更當着男工作人員雙手扯Bra，與原本的女神形象有很大分別。

陳嘉倩臨場拒拍趕收工

爆料人稱陳嘉倩為保女神形象，臨場拒拍一場關於受鼻鼾困擾的戲份，令工作人員大失預算，要重新編排故事及剪輯修改，更要即場修改劇本，搞到拍攝進度有所推遲，但嘉倩BB一於愛理不理，指定要準時收工，令廣告拍到甩皮甩骨，勞煩工作人員開OT補鑊。事後嘉倩BB接受訪問表示，拍攝當日大家合作好愉快，至於被數5宗罪只會一笑置之。