蔡思貝叮囑好友小心「媾女王」視帝 張曦雯當耳邊風姊妹終反目

原文刊於《東方新地》

蔡思貝叮囑好友避開「媾女王」

同是選美出身的張曦雯、蔡思貝，兩人出道不久已經成為閨蜜，經常孖公仔現身，好到會去好姊妹寓所留宿傾心事，不過，隨著兩人與王浩信合拍劇集《踩過界2 》，友情亦經不起考驗。有指曾與王浩信傳緋聞的蔡思貝，早於去年得知好姊妹會加入拍《踩過界2 》，更會與王浩信有感情線，當時已叮囑張曦雯與男方拍劇保持距離，免墮「媾女王」人夫陷阱，可惜近日她卻發現好姊妹對自己講一套做一套，姊妹情不再！

張曦雯當耳邊風私下傳短訊

17年拍《踩過界》被指撻著人夫王浩信的蔡思貝，人前人後同人夫黐到實，王浩信更被拍到駕車到蔡思貝位於北角的寓所樓下，兩人緋聞傳得熱烘烘，王浩信卻以只是咁啱到蔡思貝寓所大廈的停車場泊車來解畫，又不避嫌處處維護女方，做得太著跡令緋聞熱爆搞到兩人形象插水，事業告急被公司勒令斬纜保形象，二人才劃清界線！直至近期蔡思貝與胡鴻鈞打得火熱，再同王浩信合拍《踩過界2 》亦未有再過電。據知情者透露：「 Sisley（蔡思貝）出晒名係發電廠，佢身邊班兵一早就車輪轉，直至上年撻著胡鴻鈞，對方錫到佢燶，陪佢走過情緒低谷，仲將家姐架名車畀佢揸，佢先定咗落嚟，同王浩信嘅緋聞亦告一段落，知道姊妹 Kelly（張曦雯）會加入《踩過界2 》，已經叮囑好姊妹帶眼識人，唔好墮媾女王陷阱，最重要係Kelly前年同 Vincent（王浩信）拍完《解決師》，Kelly一直喺 Sisley面前話同 Vincent唔熟，大家私下冇聯絡，點知最近畀Sisley發現原來佢兩個私下經常傳短訊，關係好親密，Sisley嬲到同 Kelly炒大鑊，兩個心裡面已經有條刺，碰面都唔會打招呼，不和消息傳到幕後都知！」近日二人頻密為《踩過界2 》宣傳，同場便各據一方，完全零交流，每次上台影合照，二人中間總是隔開一個演員，返落台蔡思貝便火速黐實張振朗傾偈，避開與好姊妹有任何交集！再見不是朋友！