膠戰S4｜Jeffrey被Edan驚爆連續兩日着同款粉紅底褲 阿正質疑：有冇洗

Jeffrey被爆連續2日着同款粉紅底褲

《膠戰S4》六位主持「6膠」日前齊集銅鑼灣出席記者會，雖然活動因颱風延遲，但無阻粉絲熱情，迫爆商場。會上眾人互爆秘密，Edan率先發功，指Jeffrey為求好運，竟連續兩日穿同一款式的粉紅長褲，他憶述：「我問佢係咪同一條，佢話買咗兩條！後來發現佢因為風水，所以著粉紅色。」阿正隨即加碼爆料，懷疑Jeffrey連底褲都是同款粉紅色，更抵死追問：「有一期我懷疑佢冇洗。」令Jeffrey尷尬到滿臉通紅，連忙否認。Edan見狀即食住上，順勢為Jeffrey改花名「大9紅」，引爆全場笑彈。

Jeffrey親解粉紅底褲疑雲：「純粹睇心情」

對於被隊友連環狙擊，Jeffrey在活動後急忙解畫。他先解釋粉紅色長褲純粹是「Fashion」，並非同一條。至於粉紅底褲疑雲，他則大力搖頭否認，笑稱：「純粹係睇心情買底褲，例如新年買紅色，（珈其：咁啱買多咗喎）買七條囉！」他又親自解釋自創的遊戲名「大九紅」由來，指是集合最旺元素，充滿「中二病」氣息。此外，Jeffrey在活動上被發現不時噴口腔清新噴霧，他大方承認是個人習慣，更解釋：「因為睇牙醫話，當你做足口腔護理，對方就會好受啲。」獨特想法再次令「5膠」笑到彎腰。

馬來西亞拍攝Jeffrey罕有大解放

今季《膠戰S4》衝出香港到馬來西亞拍攝，讓觀眾見到6膠更真實一面。阿正就大爆Jeffrey在當地罕有地「大解放」，一改平日為求上鏡好看而節食的習慣。她驚訝表示：「第一次見佢食咁多嘢，平時佢唔肯食，話個鼻會大。今次俾嘢食吸引咗，第一次見佢幾碟嘢咁食，好驚訝！」Edan則分享到訪榴槤園的驚險經歷，指園主不會主動摘果，而是等榴槤自然掉落，但現場卻沒有頭盔等安全措施。本身極度討厭榴槤的劉沛蘅（Hillary）更為節目犧牲，硬着頭皮品嚐，但事後坦言：「為咗膠戰我都會食！」不過依然無法愛上榴槤的味道。

膠戰4｜「6膠」騎呢喼套現身機場

早前有網民喺社交平台爆料，發現「6膠」現身機場，眾人拖住滿滿「膠味」嘅喼套登場，每個行李套上都印住成員嘅超巨型大頭配埋誇張表情，場面相當吸睛。消息一出，即刻引爆網上熱議，大批網民瘋狂截圖瘋傳，仲紛紛揣測：「係咪準備出國開拍《膠戰4》？」

網民爆笑留言：咁高調得唔得

唔少網民都忍唔住留言調侃，指「6膠」今次高調出國，簡直係幫「爺爺」岑珈其圓夢，終於可以飛去開拍《膠戰4》。另外，亦有人大讚佢哋嘅喼套夠晒搶鏡，甚至即場點名ViuTV要出周邊：「想要個gip套！」、「Viu快啲出啦！」，仲有人笑言：「從未見過機場職員笑到咁燦爛！」等。