膠戰4｜6膠首出國遠赴馬來西亞檳城取景 騎呢喼套現身機場 未開拍已洗版熱議

膠戰4｜「6膠」記者會大談出外景趣事

「6膠」談到最難忘的經驗，這次眾人被安排到榴槤園，Edan透露園主並不會用傳統方式丟榴槤，而是等榴槤自然掉落，場面充滿未知與危險感。珈其補充，現場有網防護，但卻不設頭盔，非常驚險！Hilary公開表示自己平日極度抗拒榴槤，但為了節目中的膠戰PK，她決定硬食榴槤：「為咗膠戰我都會食！」，不過就坦言即使嘗試後依然無法接受，並沒有因此而愛上榴槤。

馬來西亞拍攝Jeffrey罕有大解放

今季《膠戰S4》衝出香港到馬來西亞拍攝，讓觀眾見到6膠更真實一面。阿正就大爆Jeffrey在當地罕有地「大解放」，一改平日為求上鏡好看而節食的習慣。她驚訝表示：「第一次見佢食咁多嘢，平時佢唔肯食，話個鼻會大。今次俾嘢食吸引咗，第一次見佢幾碟嘢咁食，好驚訝！」

早在6月帶騎呢喼套現身機場

早於今年6月，就有網民喺社交平台爆料，發現「6膠」現身機場，眾人拖住滿滿「膠味」嘅行李箱套登場，每個行李套上都印住成員嘅超巨型大頭配埋誇張表情，場面相當吸睛。消息一出，即刻引爆網上熱議，大批網民瘋狂截圖瘋傳，仲紛紛揣測：「係咪準備出國開拍《膠戰4》？」

網民爆笑留言：咁高調得唔得

唔少網民都忍唔住留言調侃，指「6膠」今次高調出國，簡直係幫「爺爺」岑珈其圓夢，終於可以飛去開拍《膠戰4》。另外，亦有人大讚佢哋嘅喼套夠晒搶鏡，甚至即場點名ViuTV要出周邊：「想要個gip套！」、「Viu快啲出啦！」，仲有人笑言：「從未見過機場職員笑到咁燦爛！」等。

《膠戰S4》下周一首播 全新一季繼續發放笑彈

《膠戰》系列一直深受觀眾追捧，經過膠粉們漫長等待，全新一季終於回歸！《膠戰S4》將於9月15日起，逢星期一至五晚上9時30分隆重登場。今季「6膠」成員呂爵安（Edan）、魏浚笙（Jeffrey）、黃正宜（阿正）、岑珈其、劉沛蘅（Hillary）及徐浩昌（肥腸），將因一股神秘力量而被捲入異世界。他們要接受層出不窮、千奇百怪的遊戲挑戰，唯有闖關成功，才能打開通往現實世界的大門。